ଆଜିକାଲି ଇଣ୍ଟରନେଟ୍ ଓ ସ୍ମାର୍ଟଫୋନ୍ ଜୀବନର ଏକ ମୁଖ୍ୟ ଅଂଶ ପାଲଟିଗଲାଣି। ଏଥିରେ ମଣିଷ ଏତେ ସମୟ ବିତାଉଛି ଯେ, ଅନ୍ୟ ସବୁ କିଛି ଭୁଲି ଯାଉଛି। ଫଳରେ ଅନେକ ସମସ୍ୟା ଦେଖାଦେଉଛି। ଯେଉଁଥିରେ ଅନିଦ୍ରା ଏକ ବଡ଼ ସମସ୍ୟା। ଏହାକୁ ଦୂର କରିବା ପାଇଁ ଏକ ଟେକ୍ କମ୍ପାନୀ ନୂଆ ଉପାୟ ବାହାର କରିଛି। କମ୍ପାନୀ ଅନିଦ୍ରାଗ୍ରସ୍ତ ଲୋକଙ୍କ ପାଇଁ ‘ଏମା ସ୍ଲିପ୍’ ନାମକ ଏକ ସ୍ଲିପ୍ ସାଙ୍କଚୁଆରୀ ତିଆରି କରିବାର ଯୋଜନା କରୁଛି। ଏହାଦ୍ୱାରା ଇନସୋମ୍ନିଆ ତଥା ଅନିଦ୍ରା ଜନିତ ସମସ୍ୟା ଭୋଗୁଥିବା ଲୋକଙ୍କୁ ଗଭିର ନିଦରେ ଶୋଇବାରେ ସାହାଯ୍ୟ ମିଳିବ। ଏହି ‘ଏମା ସ୍ଲିପ’ ହୋଟେଲ ଖୋଲା ଘାସ ପଡିଆରେ ତିଆରି ହେବ। ଘାସ ପଡିଆ ମଝିରେ କାଚର ଏକ ଡୋମ୍ ବା ଗୋଲାକାର ଘର ତିଆରି କରାଯିବ, ଯାହାକି ସମ୍ପୂର୍ଣ୍ଣ ଟ୍ରାନ୍ସପରେଣ୍ଟ ହେବ। ଏହା ଭିତରେ ଏକ ଶେଜ ପଡିବ। ଯେଉଁମାନଙ୍କର ଅନିଦ୍ରା ସମସ୍ୟା ଥିବ ସେମାନେ ଏହି ହୋଟେଲରେ ରହିବେ। ଆଉ ବେଡ୍ରେ ଥାଇ ରାତିରେ ପଡିଆରେ ଚରୁଥିବା ମେଣ୍ଢାଗୁଡିକୁ ଗଣିବେ। ସେଇ ମେଣ୍ଢାଗୁଡିକ ଉପରେ ନମ୍ବର ଲେଖାଯାଇଥିବ। ଅନିଦ୍ରା ସମସ୍ୟା ଭୋଗୁଥିବା ବ୍ୟକ୍ତିଙ୍କୁ ସେହି ନମ୍ବର କରାଯାଇଥିବା ମେଣ୍ଢାଗୁଡିକୁ କ୍ରମାନୁସାରେ ଗଣିବାକୁ ହେବ। ସେମାନେ ସେ ପର୍ଯ୍ୟନ୍ତ ଗଣିବେ ଯେପର୍ଯ୍ୟନ୍ତ ଗଭିର ନିଦ ନ ଆସିଛି। ଏହାର ଏକ୍ସପେରିମେଣ୍ଟ ସସେକ୍ସ, ବ୍ରିଟେନ୍ରେ ୨୦୨୩ରେ ହେବାକୁ ଯାଉଛି। ଏହା ମାଧ୍ୟମରେ କମ୍ପାନୀ ପ୍ରକୃତି ଓ ବିଜ୍ଞାନକୁ ଏକାଠି କରିବାକୁ ଚାହାନ୍ତି।