ସାକ୍ଷୀଗୋପାଳ,୨୪ା୨(ପ୍ରଶାନ୍ତ କୁମାର ବାରିକ/କିଶୋର ମହାପାତ୍ର/ଭରତ ବାରିକ): ଆସନ୍ତା ସାଧାରଣ ନିର୍ବାଚନକୁ ଦୃଷ୍ଟିରେ ରଖି ପୁରୀ ଜିଲା ସତ୍ୟବାଦୀର ଏକ ମଣ୍ଡପରେ ଶୁକ୍ରବାର ବିଧାୟକ ଉମାକାନ୍ତ ସାମନ୍ତରାୟଙ୍କ ତତ୍ତ୍ୱାବଧାନରେ ବିଜେଡିର ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ବ୍ଲକ ବିଜେଡି ସଭାପତି ପ୍ରମୋଦ ରାଉତରାୟ ସଭା ପରିଚାଳନା କରିଥିଲେ। ସତ୍ୟବାଦୀ ବ୍ଲକ ଅଧ୍ୟକ୍ଷ ସୁନୀଲ କୁମାର ପଣ୍ଡା, କଣାସ ବ୍ଲକ ସଭାପତି ସୁରେଶ କୁମାର ସାହୁ, ଜିଲା ମହିଳା ଉପସଭାପତି କନକଲତା ପଣ୍ଡାଙ୍କ ସମେତ ବହୁ ଦଳୀୟ ସରପଞ୍ଚ, ଜିଲାପରିଷଦ ସଭ୍ୟାସଭ୍ୟ, ସମିତି ସଭ୍ୟାସଭ୍ୟ ଏବଂ କର୍ମୀ ଉପସ୍ଥିତ ଥିଲେ। ସମ୍ପ୍ରତି ସୋସିଆଲ ମିଡିଆଠାରୁ ଆରମ୍ଭ କରି ସାଧାରଣରେ ପ୍ରଚାରିତ ହେଉଛି ଯେ, ସତ୍ୟବାଦୀ ନିର୍ବାଚନମଣ୍ଡଳୀରୁ ଏଥର ବ୍ରହ୍ମଗିରିର ପୂର୍ବତନ ବିଧାୟକ ସଞ୍ଜୟ ଦାସବର୍ମା ପ୍ରାର୍ଥୀ ହୋଇପାରନ୍ତି। ଏହି ଚର୍ଚ୍ଚାକୁ ନେଇ ବିଧାୟକ ସାମନ୍ତରାୟଙ୍କ ସମର୍ଥକମାନେ ବିରୋଧୀ ଗୋଷ୍ଠୀଙ୍କୁ ଟାର୍ଗେଟ କରିଛନ୍ତି। ଏହା ସାମନ୍ତରାୟଙ୍କ ବିରୋଧରେ ଅପପ୍ରଚାର ଓ ଚକ୍ରାନ୍ତ ବୋଲି ଶୁକ୍ରବାର ଅନୁଷ୍ଠିତ ବୈଠକରେ ବିଜେଡି କର୍ମୀମାନେ ମତ ପ୍ରକାଶ କରି ସମ୍ପୃକ୍ତ ଗୋଷ୍ଠୀକୁ ସମାଲୋଚନା କରିଥିଲେ। ସତ୍ୟବାଦୀରେ ବିଜେଡିର ସାଙ୍ଗଠନିକ କାର୍ଯ୍ୟ ଓ ବିକାଶ ବହୁତ ଭଲ ହେଉଥିବାବେଳେ କୁଚକ୍ରୀ ଗୋଷ୍ଠୀଙ୍କ ଅପପ୍ରଚାର ଜିଲା ପର୍ଯ୍ୟବେକ୍ଷକ ଏବଂ ମୁଖ୍ୟମନ୍ତ୍ରୀଙ୍କ କାନରେ କାହିଁକି ପଡୁନାହିଁ ବୋଲି କର୍ମୀମାନେ ପ୍ରଶ୍ନ ଉଠାଇଥିଲେ। ଆଗକୁ ଯଦି ଦଳୀୟ ଆଧାରରେ କିଛି ଭୁଲ୍ ନିଷ୍ପତ୍ତି ନିଆଯିବ ତେବେ ଏହାକୁ ସାମ୍ନା କରିବାକୁ ସମସ୍ତେ ଶପଥ ନେଇଥିଲେ। ବିଧାୟକ ସାମନ୍ତରାୟ ଭାବପ୍ରବଣ ହୋଇ କହିଥିଲେ, ବିରୋଧୀ ଗୋଷ୍ଠୀ ଭୋଟ ବିଭାଜନ କରିବାକୁ ଏହି ସମୟରେ କାର୍ଯ୍ୟ କରିଥାନ୍ତି। ତଥାପି ଦଳକୁ ମୁଁ ସର୍ବଦା ପ୍ରାଧାନ୍ୟ ଦେଇଛି। ମୁଁ ସବୁବେଳେ ମୋ ନିର୍ବାଚନମଣ୍ଡଳୀର ଲୋକଙ୍କ ସହ ରହିଛି। ମୁଁ ଶେଷ ନିଃଶ୍ୱାସ ଯାଏ ସତ୍ୟବାଦୀ ସେବାରେ ଜୀବନ ଉତ୍ସର୍ଗ କରିବି ବୋଲି ସାମନ୍ତରାୟ କହିଥିଲେ। ଆସନ୍ତା ମାର୍ଚ୍ଚ ୫ରେ ୩୦ ହଜାର ଲୋକଙ୍କ ଉପସ୍ଥିତିରେ ଶକ୍ତି ପ୍ରଦର୍ଶନ କରିବା ନେଇ ସେ ସୂଚନା ଦେଇଥିଲେ।