ଢେଙ୍କାନାଳ ଅଫିସ,୧୬।୩ – ଢେଙ୍କାନାଳ ଜିଲା କାର୍ଯ୍ୟାଳୟଠାରେ ମଙ୍ଗଳବାର ଜିଲାପାଳ ସରୋଜ କୁମାର ସେଠୀ ବିଭିନ୍ନ ରାଜନୈତିକ ଦଳର ପ୍ରତିନିଧିଙ୍କ ସହିତ ଆଲୋଚନା କରିଛନ୍ତି। ଚଳିତ ପୌର ନିର୍ବାଚନକୁ କିପରି ଶାନ୍ତିଶୃଙ୍ଖଳାର ସହ ସମାପନ କରାଯିବ ତାହା ଉପରେ ଜିଲାପାଳ ଗୁରୁତ୍ୱାରୋପ କରିଥିଲେ। ଏଥିସହ ଜିଲାପାଳ ସମସ୍ତଙ୍କ ସହଯୋଗ କାମନା କରିଥିଲେ। ପୌର ନିର୍ବାଚନର ଆଚରଣବିଧି ସମ୍ପର୍କରେ ଜିଲାପାଳ ଉପସ୍ଥିତ ସମସ୍ତ ପ୍ରତିନିଧିଙ୍କୁ ଅବଗତ କରାଇବା ସହିତ ଏହାକୁ ମାନି ପ୍ରାର୍ଥୀମାନେ ନିର୍ବାଚନ ପ୍ରଚାର, ଶୋଭାଯାତ୍ରା ଓ ସଭା ଆୟୋଜନ କରିବାକୁ ପରାମର୍ଶ ଦେଇଥିଲେ। ନିର୍ବାଚନ ପ୍ରଚାର, ଶୋଭାଯାତ୍ରା ଓ ସଭା ଆୟୋଜନରେ କୌଣସି ପ୍ରକାର ବିଶୃଙ୍ଖଳା ଆଚରଣ କଲେ ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଏସ୍ପି ଲୋଗାନୟାଗୀ ଦିବ୍ୟା ଭି କହିଥିଲେ। ନିର୍ବାଚନ ଅଧିକାରୀ ସ୍ନିଗ୍ଧାରାଣୀ ଧଳ କୋଭିଡ୍ କଟକଣା ମାନି ନିର୍ବାଚନକୁ ଶୃଙ୍ଖଳାର ସହ ସମାପନ କରିବାକୁ ଦଳୀୟ ପ୍ରତିନିଧିଙ୍କୁ ଅନୁରୋଧ କରିଥିଲେ। ବିଜେଡିର ପ୍ରତିନିଧି ଦେବାଶିଷ ମିଶ୍ର, ଭାଜପାର ରାମଚନ୍ଦ୍ର ପାତ୍ର, କଂଗ୍ରେସର ପ୍ରେମ ଶଙ୍କର ମିଶ୍ର ଏବଂ ଏଏପି ପ୍ରତିନିଧି ପ୍ରଭାତ କୁମାର ବେହେରା ଯୋଗଦେଇଥିଲେ। ଡେପୁଟି କଲେକ୍ଟର ସ୍ମୃତିରଞ୍ଜନ ମହାପାତ୍ର, ତହସିଲଦାର ଝସକେତନ ନାୟକ ଓ ଭୁବନ ତହସିଲଦାର ରୋଜାଲିନ ବେହେରା ଉପସ୍ଥିତ ଥିଲେ।