ଭୁବନେଶ୍ୱର,୨୧ା୯(ବ୍ୟୁରୋ): ଆଗକୁ ଆସୁଛି ପାର୍ବଣ ଋତୁ। କରୋନା ସଂକ୍ରମଣ ହ୍ରାସ ପରେ ପ୍ରଥମ ଥର ଲାଗି ବିଭିନ୍ନ ମଣ୍ଡପରେ ପୂଜାର ଆୟୋଜନ କରାଯାଉଛି । ଦୁର୍ଗାପୂଜା, କାଳୀପୂଜା ଆଦି ଅନ୍ୟାନ୍ୟ ପୂଜାରେ ଯେପରି କୌଣସି ପ୍ରଦୂଷଣ ନ ହେବ ସେଥିପ୍ରତି ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ(ଏସ୍ପିସିବି) ଜୋର ଦେଇଛି। ଏସ୍ପିସିବg ମେମ୍ବର ସେକ୍ରେଟାରି କେ. ମୁରୁଗେସେନ ସମସ୍ତ ଆଞ୍ଚଳିକ ପ୍ରଦୂଷଣ ନିୟନ୍ତ୍ରଣ କାର୍ଯ୍ୟାଳୟକୁ ଏ ସମ୍ପର୍କରେ ଚିଠି ଲେଖିଛନ୍ତି।
ମୂର୍ତ୍ତି ନିର୍ମାଣରେ ବେକେଡ କ୍ଲେ, ପ୍ଲାଷ୍ଟର ପ୍ୟାରିସ ବଦଳରେ ପ୍ରାକୃତିକ ମାଟି ବ୍ୟବହାର କରିବାକୁ ପୂଜା କମିଟି ଓ ଆୟୋଜକଙ୍କୁ ପରାମର୍ଶ ଦିଆଯାଇଛି। ମୂର୍ତ୍ତି ଦେହରେ ବିଷାକ୍ତ କେମିକାଲ ରଙ୍ଗ ନ ଲଗାଇ ପାଣିରେ ଦ୍ରବୀଭୂତ ହେଉଥିବା ଅଣବିଷାକ୍ତ ପ୍ରାକୃତିକ ରଙ୍ଗ ଲେପନ କରିବାକୁ କୁହାଯାଇଛି। ମଣ୍ଡପର ଉଚ୍ଚତା ୪୦ ଫୁଟ ଏବଂ ମୂର୍ତ୍ତିର ଉଚ୍ଚତା ୨୦ ଫୁଟରୁ ଅଧିକ ହେବ ନାହିଁ। ଜିଲା ପ୍ରଶାସନ କିମ୍ବା ସ୍ବାୟତ୍ତ ଶାସନ ସଂସ୍ଥା ଦ୍ୱାରା କରାଯାଇଥିବା କୃତ୍ରିମ ପୋଖରୀରେ ମୂର୍ତ୍ତି ବିସର୍ଜନ କରିବାକୁ ପରାମର୍ଶ ଦିଆଯାଇଛି। ମୂର୍ତ୍ତି ବିସର୍ଜନ ପୂର୍ବରୁ ଆୟୋଜକ ଫୁଲ, ସଜ୍ଜାଯାଇଥିବା ବିଭିନ୍ନ ସାମଗ୍ରୀକୁ କାଢ଼ି ଦେବା ଆବଶ୍ୟକ। ସେଗୁଡ଼ିକୁ ପୋଖରୀ ନିକଟରେ ନ ଫୋପାଡ଼ିବାକୁ କୁହାଯାଇଛି। ଏଥିସହିତ ପୂଜାମଣ୍ଡପ ସାଜସଜ୍ଜା କିମ୍ବା ପ୍ରସାଦ ସେବନ ଆଦି କାର୍ଯ୍ୟରେ ଥରେ ବ୍ୟବହାର ହେଉଥିବା ପ୍ଲାଷ୍ଟିକ କିମ୍ବା ପଲିଥିନ ବ୍ୟବହାର ନ କରିବାକୁ ପରାମର୍ଶ ଦିଆଯାଇଛି। ମୂର୍ତ୍ତି ବିସର୍ଜନ ପାଇଁ ଅଧିକ ସଂଖ୍ୟାରେ କୃତ୍ରିମ ପୋଖରୀ ପାଇଁ ସ୍ଥାନ ଚିହ୍ନଟ କରିବା ସହ ଏ ବିଷୟରେ ପୂଜା କମିଟିଗୁଡ଼ିକୁ ଆଗୁଆ ସୂଚନା ଦେବାକୁ ଆଞ୍ଚଳିକ ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି। ଯଦି ନଦୀ କିମ୍ବା ହ୍ରଦରେ ମୂର୍ତ୍ତି ବିଜର୍ସଜ କରିବାକୁ ପଡୁଥାଏ ତେବେ ସେଠାରେ କୃତ୍ରିମ ପୋଖରୀ ଖନନ କରିବାକୁ ପରାମର୍ଶ ଦିଆଯାଇଛି। ଏଥିସହିତ ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ ନିୟମ ଉଲ୍ଲଂଘନକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ମଧ୍ୟ ଚେତାବନୀ ଦିଆଯାଇଛି। ଓଡ଼ିଶା ପ୍ରିଭେନଶନ ଆଣ୍ଡ କଣ୍ଟ୍ରୋଲ ଅଫ୍ ଓ୍ବାଟର ପଲ୍ୟୁଶନ (ପ୍ରୋସିଜିଓର ଫର୍ ଇମରସନ ଅଫ୍ ଆଇଡଲ ଆଫଟର ପୂଜା) ରୁଲ୍ସ-୨୦୨୧ର ସେକ୍ସନ ୩କୁ ଉଲ୍ଲଂଘନ କରି ମୂର୍ତ୍ତି ନିର୍ମାଣ କଲେ ମୂର୍ତ୍ତି ନିର୍ମାତାଙ୍କ ଉପରେ ୨ ବର୍ଷ ପାଇଁ ପ୍ରତିବନ୍ଧକ ଲଗାଯିବ। ସେହିପରି ରୁଲ୍ର ସେକ୍ସନ ୫ ଓ ୬କୁ ଉଲ୍ଲଂଘନ କଲେ ପୂଜା କମିଟି ଆୟୋଜକଙ୍କ ଉପରେ ଜରିମାନା କରାଯିବ। ପଞ୍ଚାୟତ ଅଧୀନ ପୂଜା କମିଟି ଉପରେ ୩ ହଜାର, ସହରାଞ୍ଚଳ କମିଟି ଉପରେ ୫ ହଜାର ଏବଂ ମହାନଗର ନିଗମ ଅଞ୍ଚଳରେ ପୂଜା କମିଟି ଉପରେ ୭ ହଜାର ଟଙ୍କା ଜରିମାନା କରାଯିବ।