ନୂଆଦିଲ୍ଲୀ,୯।୨: ଦେଶର ପ୍ରମୁଖ ସାମାଜିକ ଅନୁଷ୍ଠାନ ଇନ୍ଫୋସିସ୍ ଫାଉଣ୍ଡେଶନ ପକ୍ଷରୁ ଚଳିତ ବର୍ଷ ପାଇଁ ‘ଆରୋହଣ ସାମାଜିକ ଅଭିନବ ପୁରସ୍କାରର ୩ୟ ସଂସ୍କରଣର ଶୁଭାରମ୍ଭ ସମ୍ପର୍କରେ ଘୋଷଣା କରାଯାଇଛି। ଏପରିକି ଭାରତରେ ସାମାଜିକ ନବସୃଜନକୁ ଆଗକୁ ନେବା ପାଇଁ ଫାଉଣ୍ଡେଶନ ଉକ୍ତ ପୁରସ୍କାର କାର୍ଯ୍ୟକ୍ରମରେ ଭାଗନେବାକୁ ଦେଶର ବିଭିନ୍ନ ସ୍ଥାନରୁ ଅଭିନବ ଓ ସାମାଜିକ ଉଦ୍ୟୋଗୀଙ୍କୁ ଆମନ୍ତ୍ରଣ କରୁଛି। ବିଶେଷକରି ଆରୋହଣ ସୋସିଆଲ ଇନୋଭେଶନ ପୁରସ୍କାର-୨୦୨୩ ବ୍ୟକ୍ତିବିଶେଷ, ଦଳ ଓ ଏନ୍ଜିଓଗୁଡ଼ିକୁ ସ୍ବତନ୍ତ୍ର ବୈଷୟିକ ଆଧାରିତ ସମାଧାନର ବିକାଶ ପାଇଁ ଉତ୍ସାହିତ ଓ ପୁରସ୍କୃତ କରିଥାଏ। ଫଳରେ ଦେଶର ଅଳ୍ପ ସଂଖ୍ୟକ ଲୋକଙ୍କ ପାଇଁ ଏହା ଏକ ମହତ୍ତ୍ୱପୂର୍ଣ୍ଣ ପାର୍ଥକ୍ୟ ଆଣିବାରେ ସାମର୍ଥ୍ୟ ରଖେ ବୋଲି ଫାଉଣ୍ଡେଶନ ପକ୍ଷରୁ କୁହାଯାଇଛି। ସୂଚନାଯୋଗ୍ୟ, ଇନ୍ଫୋସିସ୍ ଫାଉଣ୍ଡେଶନର ବିଜେତାଙ୍କୁ ୫୦ ଲକ୍ଷ ପର୍ଯ୍ୟନ୍ତ ମୋଟ ୨କୋଟି ଟଙ୍କାର ପୁରସ୍କାର ପ୍ରଦାନ କରିବ।
ଏ ସମ୍ପର୍କରେ ଇନ୍ଫୋସିସ୍ ଫାଉଣ୍ଡେଶନର ପ୍ରମୁଖ ସୁମିତ ଭିରାମଣୀ କହିଛନ୍ତି, ଆମେ ସର୍ବଦା ସାମାଜିକ କଲ୍ୟାଣ ଦିଗରେ ନିରନ୍ତର କାର୍ଯ୍ୟ କରିବାର ଶକ୍ତି ଉପରେ ବିଶ୍ୱାସ ରଖିଥାଉ। ଏପରିକି ଆରୋହଣ ସୋସିଆଲ ଫାଉଣ୍ଡେଶନର ପୁରସ୍କାରଗୁଡ଼ିକ ଏକ ପ୍ଲାଟ୍ଫର୍ମ ମାଧ୍ୟମରେ ଉକ୍ତ ଲକ୍ଷ୍ୟକୁ ଆଗକୁ ବଢାଇଥାଏ। ଯେଉଁଠାରେ ସାମାଜିକ କାର୍ଯ୍ୟକୁ ପ୍ରଭାବିତ କରିବାର ସାମର୍ଥ୍ୟ ସହ ସର୍ବୋତ୍ତମ ଉଦ୍ଭାବନଗୁଡ଼ିକ ମୂଲ୍ୟବାନ୍, ଉତ୍ସାହିତ ଓ ପୁରସ୍କୃତ ହୋଇଥାଏ।
