ଏରସମା,୩୧।୧୨(ସ୍ବ.ପ୍ର.): ଏରସମା ବ୍ଲକ ସଭାଗୃହରେ ଶୁକ୍ରବାର ପଞ୍ଚାୟତ ସମିତି ବୈଠକ ହଟ୍ଟଗୋଳ ମଧ୍ୟରେ ଶେଷ ହୋଇଛି। ଅଧ୍ୟକ୍ଷ ଲକ୍ଷ୍ମୀପ୍ରିୟା ମହାପାତ୍ର ଏଥିରେ ସଭାପତିତ୍ୱ କରିଥିଲେ। ଏହି ଅବସରରେ ବ୍ଲକର ବିଭିନ୍ନ ଉନ୍ନୟନମୂଳକ କାର୍ଯ୍ୟ ମେଶିନରେ ନ କରି ଜବ କାର୍ଡଧାରୀଙ୍କ ମାଧ୍ୟମରେ କରିବାକୁ ଦାବି ହୋଇଥିଲା। ପ୍ରତି ପଞ୍ଚାୟତରେ ଜଳ ଜୀବନ ମିଶନ ପକ୍ଷରୁ ସ୍ଥାପନ କରାଯାଇଥିବା ମେଗା ପ୍ରକଳ୍ପ କାର୍ଯ୍ୟକ୍ଷମ ହେବାରେ ଆଶାତୀତ ବିଳମ୍ବ ହେଉଛି ବୋଲି ନାରଦିଆ ପଞ୍ଚାୟତ ସରପଞ୍ଚ ସିମାଇ ଭୋଳ ଅଭିଯୋଗ କରିଥିଲେ। ବସୁଧା ଯୋଜନାରେ ବର୍ଷକୁ ୨ ଥର ଜଳରମାନ ପରୀକ୍ଷଣ ହେବା କଥା ମାତ୍ର ତାହା କରାଯାଉ ନ ଥିବାରୁ ଲେକେ ରୋଗାକ୍ରାନ୍ତ ହେଉଥିବା ନେଇ ସେ ଅଭିଯୋଗ କରିଥିଲେ ା ଏଥିସହ ପଞ୍ଚପଲି-ଗୋଡା ଆରଡି ରାସ୍ତା ଦୁରବସ୍ତା ଉପରେ ବୈଠକରେ ଅଭିଯୋଗ ହୋଇଥିଲା। ସୌଭାଗ୍ୟ ଯୋଜନାରେ ବିଦ୍ୟୁତ୍ ସଂଯୋଗ ଦିଆଯାଇଥିବା ହିତାଧିକାରୀଙ୍କ ଖର୍ଚ୍ଚ ତୁଳନାରେ ଅଧିକ ବିଲ ଆସୁଥିବା ନେଇ ହଟ୍ଟଗୋଳ ହୋଇଥିଲା। ତୁରନ୍ତ ଏନେଇ ପଦକ୍ଷେପ ନିଆ ନ ଗଲେ ହିତାଧିକାରୀ ଆନ୍ଦୋଳନକୁ ଓହ୍ଲାଇବେ ବୋଲି ଚେତାବନୀ ଦିଆଯାଇଥିଲା। ଗୋପାଳପୁର ଗ୍ରାମରୁ ଭାରିଶୋଳ ଦେଇ ମିର୍ଜାପୁର ପର୍ଯ୍ୟନ୍ତ ଯାଇଥିବା ସଫେଇରେ ଜଳ ନିଷ୍କାସନ ହୋଇପାରୁ ନାହଁ। ଫଳରେ ଚାଷୀମାନେ କ୍ଷତିଗ୍ରସ୍ତ ହେଉଛନ୍ତି ବୋଲି ସମିତି ସଭ୍ୟା ସନ୍ଧ୍ୟାରାଣୀ କୁଅଁର ଅଭିଯୋଗ କରିଥିଲେ ା କ୍ଷତିଗ୍ରସ୍ତ ଚାଷୀଙ୍କୁ ଉପଯୁକ୍ତ ସହାୟତା ଯୋଗାଇ ଦିଆଯାଇ ନ ଥିବା ନେଇ କୁଅଁର କହି ଥିଲେ ା ଅନ୍ୟମାନଙ୍କ ମଧ୍ୟରେ ବୈଠକରେ ବିଡିଓ କୈଳାସ ଚନ୍ଦ୍ର ବେହେରା, ଉପାଧ୍ୟକ୍ଷ ବିକାଶ ପରିଡାଙ୍କ ସହ ସରପଞ୍ଚ,ସମିତି ସଭ୍ୟ ଓ ବିଭିନ୍ନ ବିଭାଗୀୟ ଅଧିକାରୀମାନେ ଉପସ୍ଥିତ ଥିଲେ ା
