ଭଦ୍ରକ ଅଫିସ, ୧୮।୫ – ଭଦ୍ରକ ବରପଦା ଇଞ୍ଜିନିୟରିଂ କଲେଜ ଫାଟକ ସମ୍ମୁଖରେ କର୍ମଚାରୀମାନଙ୍କ ଧାରଣା ୨୩ ଦିନରେ ପହଞ୍ଚିଛି। ଗତ ଏପ୍ରିଲ ୨୫ରୁ ଧାରଣା ଆରମ୍ଭ ହୋଇଥିବା ବେଳେ ୨୯ ତାରିଖରେ ଭଦ୍ରକ ଉପଜିଲାପାଳ ମନୋଜ ପାତ୍ର, ଗ୍ରାମାଞ୍ଚଳ ଥାନାଧିକାରୀ ମୃତ୍ୟୁଞ୍ଜୟ ପ୍ରଧାନ, କଲେଜ ଅଧ୍ୟକ୍ଷ ଡ. ମୋହନ ପଣ୍ଡା ଧାରଣାରତ କର୍ମଚାରୀମାନଙ୍କ ସହ ଆଲୋଚନା କରିଥିଲେ। କଲେଜର ବିଭିନ୍ନ ସୂତ୍ରରୁ ଆସୁଥିବା ଅର୍ଥକୁ ହିସାବ କରି କର୍ମଚାରୀମାନଙ୍କ ବକେୟା ଦରମା ପ୍ରଦାନ କରାଯିବ ବୋଲି ଉପଜିଲାପାଳ କହିଥିଲେ। କଲେଜ ଆୟବ୍ୟୟ ହିସାବରେ ଧାରଣା ଦେଇଥିବା କର୍ମଚାରୀଙ୍କୁ ସାମିଲ ନିମନ୍ତେ ସେମାନେ ଦାବି କରିଥିଲେ। ଏହା ଏପର୍ଯ୍ୟନ୍ତ କାର୍ଯ୍ୟକାରୀ ହୋଇ ନ ଥିବାରୁ ଧାରଣା ଜାରି ରହିଥିବା କର୍ମଚାରୀମାନେ ପ୍ରକାଶ କରିଛନ୍ତି। ପ୍ରବଳ ଗ୍ରୀଷ୍ମପ୍ରବାହ ସତ୍ତ୍ୱେ ଏହି ଧାରଣା ଚାଲିଥିବା ବେଳେ ଧାରଣାସ୍ଥଳକୁ କୌଣସି ପ୍ରଶାସନିକ ଅଧିକାରୀ ନ ଆସିବା ସେମାନଙ୍କୁ ମର୍ମାହତ କରିଛି ବୋଲି କହିଛନ୍ତି।
କର୍ମଚାରୀଙ୍କୁ ପ୍ରତି ମାସ ୭ ତାରିଖରେ ନିୟମିତ ଦରମା ପ୍ରଦାନ, ୧୭ ମାସର ବକେୟା ପ୍ରାପ୍ୟ, ଅବସରପ୍ରାପ୍ତ ଏବଂ ମୃତ କର୍ମଚାରୀଙ୍କ ବକେୟା, ଏଲ୍ଆଇସି, ଇପିଏଫ୍, ଇଏସ୍ଆଇ, ବ୍ୟାଙ୍କ ଲୋନର କିସ୍ତି ନିର୍ଦ୍ଧାରିତ ସମୟରେ ଦାଖଲ କରିବା ଆଦି ଦାବିରେ କର୍ମଚାରୀ ସଂଘ ପକ୍ଷରୁ ପ୍ରବୀର ମହାନ୍ତି, ବୀରେନ୍ଦ୍ର ବାରିକ, ପ୍ରଫୁଲ୍ଲ ଜେନା, ବିଜୟ ରାଉତ, ରଶ୍ମି ପଣ୍ଡା, ରଘୁନାଥ ନାୟକ, ନିତ୍ୟାନନ୍ଦ ଜେନା ପ୍ରମୁଖ କର୍ମଚାରୀ ଧାରଣାରେ ବସିଛନ୍ତି।