ମୁମ୍ବାଇ, ୪ା୧୨:ନିଯୁକ୍ତି ଭିତ୍ତିକ ଗ୍ରୀନ୍କାର୍ଡ ଉପରେ ଥିବା ଦେଶର ସୀମା ହଟାଇବା ପାଇଁ ବୁଧବାର ଆମେରିକା ସିନେଟ୍ରେ ଏକ ବିଲ୍ ଗୃହୀତ ହୋଇଛି। ଉଚ୍ଚ କୁଶଳୀ ପ୍ରବାସୀ ଆଇନର ସ୍ବଚ୍ଛତା ପାଇଁ ଅଣାଯାଇଥିବା ଏହି ବିଲ୍ (ଏସ୍.୩୮୬ ବିଲ୍) ହଜାର ହଜାର ଭାରତୀୟଙ୍କ ମଧ୍ୟରେ ଆଶା ସଞ୍ଚାର କରିଛି। ଦୀର୍ଘଦଶନ୍ଧି ଧରି ସେମାନେ ଗ୍ରୀନ୍କାର୍ଡ ବ୍ୟାକ୍ଲଗ୍ରେ ଥିଲେ। ସମ୍ପ୍ରତି ଆମେରିକା ବାର୍ଷିକ ଇସ୍ୟୁ କରୁଥିବା ୧,୪୦,୦୦୦ ଗ୍ରୀନ୍ କାର୍ଡରେ ଦେଶର ସର୍ବାଧିକ ସୀମା ୭ ପ୍ରତିଶତ ରହିଛି। ଆମେରିକା ନାଗରିକତ୍ୱ ଓ ଇମିଗ୍ରେଶନ ସେବା (ୟୁଏସ୍ସିଆଇଏସ୍) ତଥ୍ୟ ଅନୁଯାୟୀ ଗତ ଏପ୍ରିଲ ସୁଦ୍ଧା ୮ ଲକ୍ଷରୁ ଊର୍ଦ୍ଧ୍ୱ ଭାରତୀୟ ନିଯୁକ୍ତିଭିତ୍ତିକ ଇମିଗ୍ରାଣ୍ଟ ଭିଜା (ଗ୍ରୀନ୍କାର୍ଡ) ଅପେକ୍ଷାରେ ଥିଲେ। ଏଥିସହିତ ପରିବାର ଭିତ୍ତିକ ଇମିଗ୍ରାଣ୍ଟ ଭିଜା ଦେଶପ୍ରତି ସୀମା ୭ ପ୍ରତିଶତ ଥିଲାବେଳେ ଏହାକୁ ନିର୍ଦ୍ଦିଷ୍ଟ ବର୍ଷରେ ୧୫ ପ୍ରତିଶତ ପର୍ଯ୍ୟନ୍ତ ବଢ଼ାଯାଇପାରିବ। ଫଳରେ ଆମେରିକା ଶ୍ରମଶକ୍ତିରେ ଡାକ୍ତର, ସଫ୍ଟଓ୍ବେର ଡେଭେଲପର ଓ ଅନ୍ୟ ଉଚ୍ଚ କୁଶଳୀ କର୍ମଚାରୀ ଆଦି ଜରୁରୀ ଆବଶ୍ୟକତା ପୂରଣ କରୁଥିବା ହଜାର ହଜାର ପରିଶ୍ରମୀ ପ୍ରବାସୀଙ୍କୁ ଆଇନଗତ ସ୍ବୀକୃତି ମିଳିପାରିବ ବୋଲି ସିନେଟର କେଭିନ୍ କ୍ରାମର କହିଛନ୍ତି। ଏହି ବିଲ୍ ପୂର୍ବରୁ ହାଉସ୍ ଅଫ୍ ରିପ୍ରେଜେଣ୍ଟେଟିଭ୍ସରେ ଗୃହୀତ ହୋଇଥିଲା।