![](https://www.dharitri.com/wp-content/uploads/2022/04/n-4-15.jpg)
ନୂଆଦିଲ୍ଲୀ, ୧୯।୪ : ଏକ ରିପୋର୍ଟ ଅନୁଯାୟୀ, ଦେଶରେ କରୋନା ସଂକ୍ରମଣ ମାମଲା ହ୍ରାସ ପାଇବା ପରେ ଅର୍ଥନୈତିକ କାର୍ଯ୍ୟକଳାପରେ ଉନ୍ନତି ଘଟିଛି। ଏହା ସହିତ, ଚାକିରୀ ବଜାର ମଧ୍ୟ ସ୍ବାଭାବିକ ସ୍ଥିତିକୁ ଫେରିବାରେ ଲାଗିଛି। ଇତିମଧ୍ୟରେ ବିଭିନ୍ନ କମ୍ପାନୀ ସେମାନଙ୍କର ନିଯୁକ୍ତ ବୃଦ୍ଧି କରିବାରେ ଲାଗିଛନ୍ତି। ମାର୍ଚ୍ଚ ମାସରେ ନିଯୁକ୍ତି ହାରରେ ୬ ପ୍ରତିଶତ ବୃଦ୍ଧି ଘଟିଛି। ମୋନଷ୍ଟର ଏମ୍ପ୍ଲଏମେଣ୍ଟ୍ ଇଣ୍ଡେକ୍ସ୍ (ଏପ୍ଇଆଇ) ପକ୍ଷରୁ ଦେଶର ୧୩ଟି ସହରର କମ୍ପାନୀଗୁଡିକ ଦ୍ୱାରା ନିଯୁକ୍ତି ତଥ୍ୟ ବିଶ୍ଳେଷଣ କରି ଏହି ରିପୋର୍ଟ ପ୍ରସ୍ତୁତ କରାଯାଇଛି।
ଏହି ରିପୋର୍ଟରେ ଅନଲାଇନ ନିଯୁକ୍ତି କାର୍ଯ୍ୟକଳାପ ଉପରେ ନଜର ରଖାଯାଇଥିଲା ଏବଂ ଏକ ବର୍ଷ ପୂର୍ବେ ସ୍ତର ତୁଳନାରେ ଏହା ୬ ପ୍ରତିଶତ ବୃଦ୍ଧି ହୋଇଥିବା ପଞ୍ଜିକୃତ ହୋଇଛି। ୧୩ଟି ସହର ମଧ୍ୟରେ ଅନ୍ତର୍ଭୁକ୍ତ ସମସ୍ତ ମେଟ୍ରୋରେ ବାର୍ଷିକ ନିଯୁକ୍ତି ହାରରେ ଦୁଇ ଅଙ୍କ ବିଶିଷ୍ଟ ଅଭିବୃଦ୍ଧି ପଞ୍ଜିକୃତ ହୋଇଛି।
ରିପୋର୍ଟ ଅନୁଯାୟୀ, କମ୍ପାନୀଗୁଡିକରେ ନିଯୁକ୍ତି କ୍ଷେତ୍ରରେ ମୁମ୍ବାଇ ପ୍ରଥମ ସ୍ଥାନ ଅଧିକାର କରିଛି। ଏଠାରେ ମାର୍ଚ୍ଚରେ ନିଯୁକ୍ତି ହାର ଗତ ବର୍ଷ ତୁଳନାରେ ୨୧ ପ୍ରତିଶତ ଅଧିକ ରହିଛି। ଏହା ପରେ କୋଏମ୍ବାଟୁର ୨୦ ପ୍ରତିଶତ ଅଭିବୃଦ୍ଧି ସହିତ ଦ୍ୱିତୀୟ ସ୍ଥାନରେ ଥିବାବେଳେ ଚେନ୍ନାଇ ଏବଂ ହାଇଦ୍ରାବାଦ ୧୬ ପ୍ରତିଶତ ଅଭିବୃଦ୍ଧି ସହିତ ତୃତୀୟ ସ୍ଥାନରେ ରହିଛନ୍ତି।
ଏହି ରିପୋର୍ଟରେ, ବେଙ୍ଗାଲୁରୁରେ ଅନଲାଇନ ନିଯୁକ୍ତିରେ ୧୫ ପ୍ରତିଶତ ବୃଦ୍ଧି ରେକର୍ଡ କରାଯାଇଛି। କୋଲକାତା ଏବଂ ଦିଲ୍ଲୀ-ଏନସିଆରରେ ଏହା ୧୩ ପ୍ରତିଶତ ରହିଛି। ପୁଣେରେ ଏଥିରେ ୧୨ ପ୍ରତିଶତ ବୃଦ୍ଧି ଘଟିଛି। ମାର୍ଚ୍ଚ ୨୦୨୨ର ତଥ୍ୟ ଅନୁଯାୟୀ ବ୍ୟାଙ୍କିଙ୍ଗ, ଆର୍ଥିକ ସେବା ଏବଂ ବୀମା କମ୍ପାନୀଗୁଡିକରେ ନିଯୁକ୍ତି ପାଇଁ ସର୍ବାଧିକ ଚାହିଦା ଦେଖିବାକୁ ମିଳିଥିଲା। ଏଥିରେ ନିଯୁକ୍ତି ହାର ୩୭ ପ୍ରତିଶତ ଅଧିକ ରେକର୍ଡ କରାଯାଇଛି। ଏହା ପରେ ଟେଲିକମ, ଆଇଏସପିରେ ୧୭ ପ୍ରତିଶତ ଏବଂ ମାନ୍ୟୁଫାକଚରିଂ ତଥା ଉତ୍ପାଦନ କମ୍ପାନୀଗୁଡିକରେ ନିଯୁକ୍ତିରେ ୧୬ ପ୍ରତିଶତ ବୃଦ୍ଧି ଘଟିଛି। ସେହିପରି ହସ୍ପିଟାଲିଟି କ୍ଷେତ୍ରରେ ନିଯୁକ୍ତିରେ ମାର୍ଚ୍ଚରେ ୧୧ ପ୍ରତିଶତ ବୃଦ୍ଧି ଦେଖାଦେଇଛି। ଅପରପକ୍ଷରେ ଇଞ୍ଜିନିୟରିଂ, ର୍ନିମାଣ ଏବଂ ଲୁହା, ଇସ୍ପାତ ସମ୍ବନ୍ଧୀୟ କମ୍ପାନୀଗୁଡିକରେ ନିଯୁକ୍ତି ୨୦ ପ୍ରତିଶତ ହ୍ରାସ ପାଇଛି।
ମୋନଷ୍ଟର ଡଟ କମର ସିଇଓ ଶେଖର ଗାରିସା କହିଛନ୍ତି ଯେ କରୋନା ମହାମାରୀ ସଙ୍କଟ ମଧ୍ୟରେ ଗତ ଦୁଇ ବର୍ଷ ନିଯୁକ୍ତି କ୍ଷେତ୍ର ଅତ୍ୟନ୍ତ ଖରାପ ଥିଲା। କିନ୍ତୁ ୨୦୨୦ ତୁଳନାରେ ଚ୍ୟାଲେଞ୍ଜକୁ ଅତିକ୍ରମ କରି ଭାରତୀୟ ଅର୍ଥନୀତି ଚଳିତ ବର୍ଷ ଏକ ଉନ୍ନତି ପଞ୍ଜିକରଣ କରିଛି। ରୋଜଗାର ହାର ମଧ୍ୟ ବୃଦ୍ଧି ପାଇଛି। ବ୍ୟାଙ୍କିଂ ଏବଂ ଟେଲି ଯୋଗାଯୋଗ ପରି କ୍ଷେତ୍ରଗୁଡିକରେ ଦେଶରେ ନିଯୁକ୍ତି ସୃଷ୍ଟି କ୍ଷେତ୍ରରେ ଭଲ ପ୍ରଦର୍ଶନ କରିଛନ୍ତି । ଦ୍ୱିତୀୟ ଶ୍ରେଣୀ ସହରଗୁଡ଼ିକରେ ବ୍ୟବସାୟିକ କାର୍ଯ୍ୟକଳାପରେ ଯଥେଷ୍ଟ ବୃଦ୍ଧି ଘଟିଛି।