ଲକ୍ଷ୍ନୌ,୨୦।୭: ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ଶାସନରେ ଏନ୍କାଉଣ୍ଟରରେ ୧୩୯ ଅପରାଧୀଙ୍କ ମୁଣ୍ଡ ଗଡ଼ିଛି। ସେହିପରି ୧୫୭୪ କୋଟିରୁ ଅଧିକ ବେଆଇନ ସମ୍ପତ୍ତି ଜବତ ହୋଇଛି। ଏସମ୍ପର୍କରେ ରାଜ୍ୟ ଗୃହ ବିଭାଗର ମୁଖ୍ୟ ସଚିବ ଅବନୀଶ କୁମାର ଅଓ୍ବସ୍ଥି ସୂଚନା ଦେଇଛନ୍ତି। ସେହିପରି ପୋଲିସ କାର୍ଯ୍ୟାନୁଷ୍ଠାନରେ ୩,୧୯୬ ଜଣ ଅପରାଧୀ ଆହତ ହୋଇଛନ୍ତି। ୨୦୧୭ ମାର୍ଚ୍ଚ ୨୦ରୁ ୨୦୨୧ ଜୁନ୍ ୨୦ ମଧ୍ୟରେ ଏଭଳି ଘଟିଛି। ଅପରପକ୍ଷରେ ୧୩ ଜଣ ଯବାନ ଶହୀଦ୍ ହୋଇଥିବାବେଳେ ୧,୧୨୨ ପୋଲିସ ଆହତ ହୋଇଛନ୍ତି। ଏହି ସମୟ ମଧ୍ୟରେ ଗ୍ୟାଙ୍ଗଷ୍ଟର ଅଧିନିୟମ ଅନ୍ତର୍ଗତ ୧୩୭୦୦ ମାମଲା ରୁଜୁ ହୋଇଛି ଏବଂ ୪୩ ହଜାରରୁ ଅଧିକ ଅଭିଯୁକ୍ତଙ୍କୁ ଗିରଫ କରାଯାଇଛି। ବାରାଣସୀ ଜୋନ୍ରେ ସର୍ବାଧିକ ୪୨୦ ମାମଲା ରୁଜୁ ହେବା ସହିତ ୨୦୨ କୋଟି ୨୯ ଲକ୍ଷ ଟଙ୍କାରୁ ଅଧିକ ସମ୍ପତ୍ତି ଜବତ ହୋଇଛି। ଗୋରଖପୁର ଜୋନ୍ରେ ୨୦୮ ମାମଲା ରୁଜୁ ହୋଇଥିବାବେଳେ ୨୬୪ କୋଟି ୮୫ ଲକ୍ଷରୁ ଅଧିକ ଟଙ୍କା ମୂଲ୍ୟର ସମ୍ପତ୍ତି ଜବତ କରାଯାଇଛି। ବରେଲୀ ଜୋନ୍ରେ ୧୮୪ କୋଟି ୮୨ ଲକ୍ଷ ଟଙ୍କାରୁ ଅଧିକ ବେଆଇନ ସମ୍ପତ୍ତିକୁ ସରକାର ଦଖଲ କରିଥିବା ମୁଖ୍ୟ ସଚିବ କହିଛନ୍ତି।