ନୂଆଦିଲ୍ଲୀ,୧୬|୧୨: ଭାରତରେ ଦେଖାଦେଇଥିବା ସେମିକଣ୍ଡକ୍ଟର ଚିପ୍ସ ଅଭାବ ଜନିତ ସମସ୍ୟା ଦୂର କରିବା ପାଇଁ ଆଗେଇ ଆସିଛନ୍ତି କେନ୍ଦ୍ର ସରକାର। ସେମିକଣ୍ଡକ୍ଟର ଅଭାବରୁ ଦେଶର କାର୍, ଫୋନ୍ ନିର୍ମାଣରେ ଗୁରୁତର ସମସ୍ୟା ସୃଷ୍ଟି ହୋଇଛି। ଲୋକଙ୍କ ଚାହିଦା ଥିଲେ ମଧ୍ୟ କମ୍ପାନୀଗୁଡ଼ିକ ବଜାରରେ ଗାଡ଼ି ଉପଲବ୍ଧ କରିପାରୁନାହାନ୍ତି। ଏଭଳିସ୍ଥଳେ କେନ୍ଦ୍ର କ୍ୟାବିନେଟ୍ ବୁଧବାର ସେମିକଣ୍ଡକ୍ଟର ଏବଂ ଡିସ୍ପ୍ଲେ ବୋଡର୍ର୍ ନିର୍ମାଣ ୟୁନିଟ୍ଗୁଡ଼ିକ ପାଇଁ ଉତ୍ପାଦନ ସଂଯୁକ୍ତ ପ୍ରୋତ୍ସାହନ (ପିଏଲ୍ଆଇ) ଯୋଜନାକୁ ଅନୁମୋଦନ କରିଥିବା ସୂଚନା ଓ ପ୍ରସାରଣ ମନ୍ତ୍ରୀ ଅନୁରାଗ ଠାକୁର କହିଛନ୍ତି। ଏହି ଯୋଜନାରେ ଆସନ୍ତା ୫/୬ ବର୍ଷ ମଧ୍ୟରେ ସେମିକଣ୍ଡକ୍ଟର ଉତ୍ପାଦନରେ ୭୬,୦୦୦ କୋଟି ଟଙ୍କା ବିନିଯୋଗ ହେବାର ଯୋଜନା ରହିଛି ବୋଲି ସେ କହିଛନ୍ତି।
ଟେଲିକମ ଏବଂ ଆଇଟି ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି, ଏହି ନିଷ୍ପତ୍ତି ଏକ ସମ୍ପୂର୍ଣ୍ଣ ଇକୋସିଷ୍ଟମ ବିକାଶ କରିବ, ଯଦ୍ଦ୍ବାରା ମାଇକ୍ରୋଚିପ୍ସର ଡିଜାଇନ, ଫାବ୍ରିକେଶନ, ପ୍ୟାକିଂ ଏବଂ ଟେଷ୍ଟିଂରେ ସହାୟକ ହେବ। ଚିପ୍ସ ଷ୍ଟାର୍ଟଅପ୍ କରିବା ପାଇଁ ଏହି ଯୋଜନାରେ ୮୫ ହଜାର ସେମିକଣ୍ଡକ୍ଟର ଇଞ୍ଜିିନିୟରଙ୍କୁ ତାଲିମ ଦିଆଯିବାକୁ ଯୋଜନା ରହିଛି। ସରକାର ଏହାର ୫୦% ଖର୍ଚ୍ଚ ବହନ କରିବେ ବୋଲି ବୈଷ୍ଣବ କହିଛନ୍ତି। ଗୋଟିଏ କିମ୍ବା ଦୁଇଟି ଡିସ୍ପ୍ଲେ ବୋର୍ଡ ଉତ୍ପାଦନ ୟୁନିଟ୍ ଏବଂ ୧୦ଟି ଲେଖାଏ ସେମିକଣ୍ଡକ୍ଟର ଡିଜାଇନ ଓ କମ୍ପୋନେଣ୍ଟ ୟୁନିଟ୍ ପ୍ରତିଷ୍ଠା ପାଇଁ ସରକାର ବର୍ତ୍ତମାନ ଟାର୍ଗେଟ୍ କରିଛନ୍ତି। ଏହା ମାଧ୍ୟମରେ ୩୫ ହଜାର ନିଯୁକ୍ତି ଏବଂ ପ୍ରାୟ ୧ ଲକ୍ଷ ପରୋକ୍ଷ ନିଯୁକ୍ତି ସୃଷ୍ଟି ହେବ ବୋଲି ବୈଷ୍ଣବ କହିଛନ୍ତି। ସୂଚନାଥାଉ କି, ସେମିକଣ୍ଡକ୍ଟର ପ୍ରାୟତଃ କାର୍ ଓ ଫୋନଗୁଡ଼ିକରେ ବ୍ୟାପକ ଭାବେ ବ୍ୟବହାର ହେଉଛି। ଏହାସହିତ ଅନ୍ୟ ଦୈନନ୍ଦିନ ବ୍ୟବହାରଯୋଗ୍ୟ ଉପକରଣ ତଥା ଟିଭି, ଲାପ୍ଟପ୍, ଓ୍ବାଶିଂମେଶିନ ପାଇଁ ତାହା ଆବଶ୍ୟକ ହେଉଛି। ସମ୍ପ୍ରତି ସାରା ବିଶ୍ୱରେ କେତେକ କାରଣ ଯୋଗୁ ସେମିକଣ୍ଡକ୍ଟର ଚିପ୍ସ ଯୋଗାଣ ବ୍ୟାହତ ହେବା ଯୋଗୁ ଅଟୋମୋବାଇଲ, ଗାଜେଟ୍ସ ସମେତ ବହୁ ଉଦ୍ୟୋଗ ପାଇଁ ସଙ୍କଟ ସୃଷ୍ଟି ହୋଇଛି।