କୋରାପୁଟ,୧୧ା୫(ଅମିତାଭ ବେହେରା): ଆସନ୍ତା ୧୩ ତାରିଖରେ ଓଡିଶାର ପ୍ରଥମ ପର୍ଯ୍ୟାୟ ନିର୍ବାଚନ ଅନୁଷ୍ଠିତ ହେବ। ଶନିବାର ଅପରାହ୍ନରେ ନିର୍ବାଚନ ନେଇ ସମସ୍ତ ପ୍ରାର୍ଥୀଙ୍କ ନିର୍ବାଚନ ପ୍ରଚାର କାର୍ଯ୍ୟ ଶେଷ ହୋଇଥିବା ବେଳେ ଅନ୍ୟପକ୍ଷେ ନିର୍ବାଚନ ନେଇ ଜିଲାର ରହିଥିବା ମୋଟ୍ ୧୧୫୯ ବୁଥ୍ ନିମନ୍ତେ ପୋଲିଂ ଅଧିକାରୀ ସମସ୍ତ ପୋଲିଂ ସାମଗ୍ରୀ ନେଇ ଗାଡ଼ିରେ ଯାତ୍ରା କରିଛନ୍ତି। କୋରାପୁଟ ଲୋକ ସଭା କ୍ଷେତ୍ରରେ ରହିଥିବା ସମସ୍ତ ବିଧାନସଭା କ୍ଷେତ୍ରରେ ନିର୍ବାଚନ ଅନୁଷ୍ଠିତ ହେବ। ତେଣୁ ଶନିବାର ଲାଣ୍ଡିଗୁଡ଼ାସ୍ଥିତ କୋରାପୁଟ ସରକାରୀ ମହାବିଦ୍ୟାଳୟଠାରେ କୋରାପୁଟ ଉପଖଣ୍ଡର କୋରାପୁଟର ୨୧୫ ବୁଥ୍, ଲକ୍ଷ୍ମୀପୁର ୨୨୫ଟି ଓ ପଟ୍ଟାଙ୍ଗି ନିର୍ବାଚନର ମଣ୍ଡଳୀର ୨୩୮ଟି ବୁଥ୍ରେ ନିୟୋଜିତ ପୋଲିଂ ଅଧିକାରୀମାନଙ୍କୁ ନିର୍ବାଚନ ସମ୍ବନ୍ଧୀୟ ସମସ୍ତ କିଟ୍ ପ୍ରଦାନ କରାଯାଇଥିଲା। କୋରାପୁଟ ଜିଲାପାଳ କୀର୍ତ୍ତି ଭାସନ ଉପସ୍ଥିତ ରହି ଏହି କାର୍ଯ୍ୟ ତଦାରଖ କରୁଥିବା ଲକ୍ଷ୍ୟ ରଖାଯାଇଥିଲା। ଏଥି ନିମନ୍ତେ ଜିଲା ପ୍ରଶାସନ ସମସ୍ତ ବ୍ୟବସ୍ଥା କରିଥିବାରୁ ନିର୍ଦ୍ଧାରିତ ସମୟରେ ପୋଲିଂ ଅଫିସରମାନେ କିଟ୍ ଧରି ନିଜ ନିଜ ବୁଥ୍ ଅଭିମୁଖେ ଯାତ୍ରା କରିଥିବା ଜଣାପଡ଼ିଛି।
ରବିବାର ଜୟପୁର ନିର୍ବାଚନ ମଣ୍ଡଳୀର ସମସ୍ତ ବୁଥ୍ ସମେତ ଜିଲାରେ ହୋଇଥିବା ସମସ୍ତ ୧୧୭ ବୁଥ୍ର ପୋଲିଂ ଅଫିସର ନିଜ ନିଜ ବୁଥ୍କୁ କିଟ୍ ଧରି ଯିବେ ବୋଲି ଜିଲାପାଳ ସୂଚନା ଦେଇଛନ୍ତି। ସେହିପରି ଜିଲାର ସୀମାନ୍ତ କୋଟିଆ ପଞ୍ଚାୟତର ୯ଟି ବୁଥ୍ କରାଯାଇଥିବା ବେଳେ ସେଠାରେ ମତଦାନ ନିମନ୍ତେ ସମସ୍ତ ବ୍ୟବସ୍ଥା କରାଯାଇଥିବା ଜିଲାପାଳ ସୂଚନା ଦେଇଛନ୍ତି।
