ତେହରାନ,୨।୧୧: ଇସ୍ରାଏଲର ପାଲଟା ଆକ୍ରମଣ ପରେ ଏବେ ଇରାନ ପୁଣିଥରେ ଆକ୍ରମଣ ଲାଗି ଯୋଜନା କରୁଛି। ଆମେରିକା ହେଉ କି ଇସ୍ରାଏଲ, ଶତ୍ରୁ ଦେଶକୁ ଉପଯୁକ୍ତ ଜବାବ ଦିଆଯିବ ବୋଲି ଇରାନ ସ୍ପଷ୍ଟ କରିଛି। ଶନିବାର ଇରାନର ସର୍ବୋଚ୍ଚ ନେତା ଆୟତୋଲ୍ଲା ଅଲି ଖାମେନେଇ ସାମ୍ନାକୁ ଆସି ଆମେରିକା ଏବଂ ଇସ୍ରାଏଲକୁ ଏହି ଧମକ ଦେଇଛନ୍ତି।
ଅକ୍ଟୋବର ୨୬ ରେ ଇରାନ ଉପରେ ହୋଇଥିବା ଆକ୍ରମଣ ପରେ ଇରାନ ଅଧିକାରୀମାନେ ଇସ୍ରାଏଲ ବିରୋଧରେ ଆଉ ଏକ ଆକ୍ରମଣ ବିଷୟରେ ଯୋଜନା କରୁଥିବା କୁହାଯାଉଥିବା ବେଳେ ଆୟତୋଲ୍ଲା ଏହି ଧମକ ଦେଇଛନ୍ତି। ଏହି ଆକ୍ରମଣରେ ଇସ୍ରାଏଲ ଇରାନର ସାମରିକ ବେସ ଏବଂ ଅନ୍ୟାନ୍ୟ ସ୍ଥାନକୁ ଟାର୍ଗେଟ କରାଯାଇଥିଲା, ଯେଉଁଥିରେ ଅତି କମରେ ୫ ଜଣଙ୍କର ମୃତ୍ୟୁ ଘଟିଥିଲା। ଏହା ପୂର୍ବରୁ ଏପ୍ରିଲ ଏବଂ ଅକ୍ଟୋବରରେ ଇରାନ ଇସ୍ରାଏଲ ଉପରେ ଦୁଇଟି ପ୍ରତ୍ୟକ୍ଷ ଆକ୍ରମଣ କରିଛି।
ଅପରପକ୍ଷେ ଆମେରିକା ରାଷ୍ଟ୍ରପତି ନିର୍ବାଚନ ପୂର୍ବରୁ ଉଭୟଙ୍କ ଆକ୍ରମଣ ପଶ୍ଚିମ ଏସିଆରେ ଉତ୍ତେଜନାକୁ ବଢ଼ାଇପାରେ ବୋଲି ଆକଳନ କରାଯାଉଛି। ଏମିତିରେ ଆମେରିକୀୟ ସେନା ସମଗ୍ର ପଶ୍ଚିମ ଏସିଆରେ ସକ୍ରିୟ ଅଛନ୍ତି। ଏହାର କିଛି ଯବାନ ଏବେ ଇସ୍ରାଏଲରେ ‘ଟର୍ମିନାଲ ହାଇ ଅଲ୍ଟିଟ୍ୟୁଡ୍ ଏରିଆ ଡିଫେନ୍ସ(ଥାଡ୍) ବାୟୁ ପ୍ରତିରକ୍ଷା ପ୍ରଣାଳୀ ପରିଚାଳନା କରୁଛନ୍ତି। ୟୁଏନ୍ଏସ୍ ଆବ୍ରାହମ ଲିଙ୍କନ୍ ବିମାନ ପରିବହନକାରୀ ଆରବ ସାଗରରେ ଥିବାର ସମ୍ଭାବନା ରହିଥିବା ବେଳେ ପେଣ୍ଟାଗନ୍ ପ୍ରେସ୍ ସେକ୍ରେଟାରୀ ମେଜର୍ ଜେନେରାଲ୍ ପ୍ୟାଟ୍ ରାଇଡର ଶୁକ୍ରମାର କହିଛନ୍ତି ଯେ ଇରାନ ଏବଂ ଏହାର ଉଗ୍ରବାଦୀ ସହଯୋଗୀଙ୍କୁ ରୋକିବା ଲାଗି ଅଧିକ ବିନାଶକାରୀ, ଯୁଦ୍ଧବିମାନ ସ୍କ୍ବାର୍ଡନ, ଟ୍ୟାଙ୍କର, ଦୂରଗାମୀ କ୍ଷେପଣାସ୍ତ୍ର ନିୟୋଜିତ କରାଯାଉଛି।
