ପିୟରସିଂର ଟ୍ରେଣ୍ଡ ତ ବହୁ ଆଗରୁ ଆରମ୍ଭ ହୋଇସାରିଛି। କିନ୍ତୁ ଏବେ ଏନ୍ଗେଜ୍ମେଣ୍ଟ ପିୟରସିଂ ଏକ ନୂଆ ଟ୍ରେଣ୍ଡ ଭାବେ ଉଭା ହୋଇଛି। ଏହାକୁ କେହି କେହି ଏନ୍ଗେଜ୍ମେଣ୍ଟ ରିଂ ପିୟରସିଂ, ଓ୍ବେଡିଂ ରିଂ ପିୟରସିଂ ଅବା କେବଳ ଫିଙ୍ଗର୍ ପିୟରସିଂ ବୋଲି ବି କହିଥାନ୍ତି। ଏଥିରେ ଏନ୍ଗେଜ୍ମେଣ୍ଟ ବା ନିର୍ବନ୍ଧ ଦିନ ପୁଅଝିଅ ଉଭୟ ଉଭୟଙ୍କୁ ଆଉ ମୁଦି ନ ପିନ୍ଧାଇ ତା’ ବଦଳରେ ସେମାନେ ଆଙ୍ଗୁଠିରେ ରିଙ୍ଗ୍ ପିୟରସିଂ କରାଇଥାନ୍ତି। ଏହି ପିୟରସିଂ ପ୍ରାୟତଃ ମାଇକ୍ରୋ ଡର୍ମାଲ ପିୟରସିଂ ପରି, ଯାହାକୁ ମୁଖ୍ୟତଃ କଲାର୍ ବୋନ୍, ପିଠି, ଏବଂ ଗାଲରେ କରାଯାଇଥାଏ। କିନ୍ତୁ ଏନ୍ଗେଜ୍ମେଣ୍ଟ ପିୟରସିଂକୁ କେବଳ ହାତ ଆଙ୍ଗୁଠିରେ କରାଯାଇଥାଏ। ବିଶେଷକରି ରିଂ ଫିଙ୍ଗର୍ରେ ଏହାକୁ ଦମ୍ପତିମାନେ କରିଥାନ୍ତି। ଏଥିରେ ଦୁଇ ପ୍ରକାରର ମେଟାଲ୍ ବ୍ୟବହାର କରାଯାଏ। ଗୋଟେ ଆଙ୍ଗୁଠିର ଚମଡା ଭିତରେ ରୁହେ, ଯେଉଁଥିରେ ସ୍ବତନ୍ତ୍ର ଧରଣର ଏକ ପେଚ ଲାଗିଥାଏ। ଅନ୍ୟଟି ହେଉଛି ମେଟାଲ୍ ଷ୍ଟଡ୍ ବା ଷ୍ଟୋନ୍, ଯାହା ବାହାରକୁ ଦେଖାଯାଇଥାଏ। ପ୍ରଥମେ ଆଙ୍ଗୁଠିର ଚମଡ଼ାକୁ ଛିଦ୍ର କରି ତା’ମଧ୍ୟରେ ପେଚକୁ ଭର୍ତ୍ତି କରାଯାଏ, ପରେ ମେଟାଲ୍ ଷ୍ଟଡ୍ ବା ଷ୍ଟୋନ୍କୁ ଉକ୍ତ ପେଚରେ ପୂରାଇ ଟାଇଟ୍ କରାଯାଇଥାଏ। ତେବେ ଏହି ପିୟରସିଂ କରାଇବା ଖୁବ୍ କଷ୍ଟଦାୟକ ହୋଇଥିଲେ ବି ମନର ମଣିଷ ଆଗରେ ନିଜର ଭଲ ପାଇବାକୁ ପରିପ୍ରକାଶ କରିବାର ଏହା ଏକ ଭିନ୍ନ ମାଧ୍ୟମ ଭାବେ ଏବେ ଖୁବ୍ ଚାଲିଛି।
