ମାଲକାନଗିରି,୧୨ା୧୨(ଡି.ଏନ.ଏ.): ମାଲକାନଗିରି ଜିଲା କାଲିମେଳା ବିଏଲକେ ଅନ୍ତର୍ଗତ ଏମପିଭି-୨୯ ଗ୍ରାମ ନିକଟସ୍ଥ ପୋଟେରୁ ଜଳସେଚନ ବିଭାଗର ଶାଖା କେନାଲରେ ନିର୍ମାଣାଧୀନ କଂକ୍ରିଟ କାମ ନିମ୍ନମାନର କରାଯାଉଥିବା ଅଭିଯୋଗ ହୋଇଛି। ଏଥିସହ ଏହି କାର୍ଯ୍ୟରେ ଶିଶୁ ଶ୍ରମିକ ନିୟୋଜିତ କରାଯାଇଥିବା କୁହାଯାଉଛି। ଏହି ଶାଖା କେନାଲ ମଧ୍ୟରେ ୨୪୫ ମିଟର ଲମ୍ବର କଂକ୍ରିଟ ନାଳ ନିର୍ମାଣ କରାଯାଉଛି। ଯେଉଁଥିରେ ମାଟି ମିଶ୍ରିତ ବାଲି ବ୍ୟବହାର ହେଉଛି। ସରକାରୀ ନିୟମ ଅନୁସାରେ ବାଲି, ମେଟାଲ ଓ ସିମେଣ୍ଟର ପରିମାଣ ୬-୪-୧ ରହିଥିବା ବେଳେ ଠିକାଦାର ଜଣଙ୍କ ୧୨ ଗାମଲା ବାଲିରେ ୪ଗାମଲା ଚିପ୍ସ ଏବଂ ନିମ୍ନମାନର ସିମେଣ୍ଟ ମିଶାଇ କାମ କରୁଥିବା ଅଭିଯୋଗ ହୋଇଛି। କାର୍ଯ୍ୟ ସ୍ଥଳରେ ନାମଫଳକ ନ ଥିବା ବେଳେ ଏହାକୁ ରାହୁଲଦେବ ନାମକ ଠିକାଦାର କରୁଥିବା ଜଣାପଡିଛି। ଏନେଇ ସଂପୃକ୍ତ ଯନ୍ତ୍ରୀ ମଳୟ ମିସ୍ତ୍ରୀଙ୍କୁ ପଚାରିବାରୁ ସେ ଏହାର ଅଟକଳ ମୂଲ୍ୟ ଜାଣି ନ ଥିବା କହିଥିଲେ। ବେଳେ କାମ ଠିକ ଠାକ୍ ଚାଲିଥିବା ଏବଂ ମାର୍କେଟରେ ଯେଉ ସିମେଣ୍ଟ ମିଳୁଛି ତାହା ଦ୍ୱାରା କାମ ହେଉଥିବା ପ୍ରକାଶ କରଥିଲେ। ଯନ୍ତ୍ରୀ ଜଣକ ସବୁ ସମୟରେ କାର୍ଯ୍ୟ ତଦାରଖ କରୁଥିବା ବେଳେ ଶିଶୁ ଶ୍ରମିକ ନିୟୋଜିତ ହେଉଥିବା କିପରି ଜାଣିପାରୁନାହାନ୍ତି ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏହାର ତଦନ୍ତ କରିବାକୁ ସାଧାରଣରେ ଦାବି ହୋଇଛି।
