ହିନ୍ଦୋଳ, ୩୧।୧୦(ଡି.ଏନ.ଏ.) ପ୍ରଧାନମନ୍ତ୍ରୀ ଆବାସ ଯୋଜନାରେ ଫାଇନାଲ୍ ବିଲ୍ କରାଇଦେବା ପାଇଁ ୧୫୦୦ ଟଙ୍କା ଲାଞ୍ଚ ନେଉଥିବାବେଳେ ଭିଜିଲାନ୍ସ ହାତରେ ଧରାପଡ଼ିଛନ୍ତି ଢେଙ୍କାନାଳ ଜିଲା ହିନ୍ଦୋଳ ଏନ୍ଏସିର କାର୍ଯ୍ୟରତ ଯନ୍ତ୍ରୀ ରଶ୍ମିରଞ୍ଜନ ବେହେରା। ତାଙ୍କୁ ଗିରଫ କରାଯିବା ପରେ ଅନୁଗୋଳ ନିଆଯାଇଛି। ଏନ୍ଏସି ଅଧୀନ ୬ନଂ. ଓ୍ବାର୍ଡ ସରଧାପୁରର ଶାନ୍ତିଲତା ବେହେରାଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ କାର୍ଯ୍ୟାଦେଶ ମିଳିଥିଲା। ତେବେ ବିଲ୍ କରାଇଦେବା ପାଇଁ ଯନ୍ତ୍ରୀ ବେହେରା ୩୦୦୦ ଟଙ୍କା ଦାବି କରିଥିଲେ। ଶାନ୍ତିଲତାଙ୍କ ପୁଅ ମାନସଙ୍କଠାରୁ ଅଭିଯୁକ୍ତ ଯନ୍ତ୍ରୀ ୧୫୦୦ ଟଙ୍କା ନେଇଥିବା ବେଳେ ଫାଇନାଲ ବିଲ୍ ପାଇଁ ଅଧିକ ୧୫୦୦ ଟଙ୍କା ମାଗିଥିଲେ। ଏ ନେଇ ମାନସ ଅନୁଗୋଳ ଭିଜିଲାନ୍ସର ଦ୍ୱାରସ୍ଥ ହୋଇଥିଲେ। ଶନିବାର କାର୍ଯ୍ୟାଳୟରେ ମାନସଙ୍କଠାରୁ ୧୫୦୦ ଟଙ୍କା ନେଉଥିବାବେଳେ ପୂର୍ବଯୋଜନା ଅନୁଯାୟୀ ଭିଜିଲାନ୍ସ ଅଧିକାରୀମାନେ ଯନ୍ତ୍ରୀଙ୍କୁ ଧରିଥିଲେ। କଟକ ଭିଜଲାନ୍ସ ଏସ୍ପି ଅକ୍ଷୟ ମିଶ୍ରଙ୍କ ନିର୍ଦ୍ଦେଶକ୍ରମେ ଜଗତ୍ସିଂହପୁର ଡିଏସ୍ପି ଏଚ.କେ. ମହାନ୍ତି, ଅନୁଗୋଳ ଇନ୍ସପେକ୍ଟର ପି.କେ.ସାମଲ, କେନ୍ଦ୍ରାପଡ଼ା ଇନ୍ସପେକ୍ଟର ଏସ୍.କେ. କଅଁର, ଅନୁଗୋଳ ଭିଜଲାନ୍ସ ଟିମ୍ର ଏସ୍ଆଇ ସିଦ୍ଧାର୍ଥ କୁମାର ରାଉତ ପ୍ରମୁଖ ଚଢ଼ାଉରେ ସାମିଲ ହୋଇଥିଲେ।