ହୋଟେଲ ବାଥ୍ରୁମ୍ରେ ମହିଳାଙ୍କ ଭିଡିଓ କରୁଥିଲେ ଇଞ୍ଜିନିୟର, ପଡ଼ିଗଲେ ଧରା
04 ଭୁବନେଶ୍ୱର,୫ା୯: ଭୁବନେଶ୍ୱର ଲକ୍ଷ୍ମୀସାଗର ଥାନା ଅଞ୍ଚଳରେ ଥିବା ଏକ ହୋଟେଲ ବାଥ୍ରୁମ୍ରେ ବୁଧବାର ଜଣେ ମହିଳା ଗାଧୋଉଥିବା ବେଳେ ଏହାର ଭିଡିଓ ଶୁଟ୍ କରି ଜଣେ ଇଞ୍ଜିନିୟର ଫସିଛନ୍ତି। କମିଶନରେଟ୍ ପୋଲିସର ହାଇ-ଏଫିସିଏନ୍ସି ରେସ୍ପନ୍ସ (ହର୍) ଟିମ୍ ସମ୍ପୃକ୍ତ ଇଞ୍ଜିନିୟରଙ୍କୁ ଧରିବାରେ ସକ୍ଷମ ହୋଇଛି। ଅଭିଯୁକ୍ତ ଇଞ୍ଜିନିୟର ହେଲେ ତାମିଲନାଡୁର ଚନ୍ଦ୍ର ଶେଖରନ୍। ଲକ୍ଷ୍ମୀସାଗର ଥାନା ପକ୍ଷରୁ ଚନ୍ଦ୍ର ଶେଖରନ୍ଙ୍କୁ ଗିରଫ କରାଯାଇଛି। ମହିଳାଙ୍କ ଏତଲା ଆଧାରରେ ଥାନା ପକ୍ଷରୁ ଏ ସଂକ୍ରାନ୍ତରେ ଏକ ମାମଲା ରୁଜୁ କରାଯାଇ କାର୍ଯ୍ୟାନୁଷ୍ଠାନ ନିଆଯାଇଛି।
ସୂଚନା ଅନୁଯାୟୀ, ଅଭିଯୋଗକାରିଣୀ ୪୫ ବର୍ଷୀୟା ମହିଳାଙ୍କ ଘର ଛତିଶଗଡ଼ରେ। ତାଙ୍କ ଝିଅ ବ୍ୟାଙ୍କ ପିଓ ପାଇଛନ୍ତି। ସେ ଭୁବନେଶ୍ୱରର ଏକ ବ୍ୟାଙ୍କରେ ଚାକିରିରେ ଯୋଗ ଦେବାର ଥିଲା। ଏଥିପାଇଁ ମା’ ଓ ଝିଅ ମଙ୍ଗଳବାର ଭୁବନେଶ୍ୱର ଆସି ଲକ୍ଷ୍ମୀସାଗରସ୍ଥିତ ଉକ୍ତ ହୋଟେଲରେ ରହିଥିଲେ। ଅନ୍ୟପକ୍ଷରେ ଚନ୍ଦ୍ର ଶେଖରନ୍ ପଶ୍ଚିମ ଓଡ଼ିଶାର ଏକ ବେସରକାରୀ କମ୍ପାନୀରେ ଇଞ୍ଜିନିୟର ଥିବାବେଳେ ୨ଦିନ ହେଲା କମ୍ପାନୀ କାମରେ ଭୁବନେଶ୍ୱର ଆସି ଉକ୍ତ ହୋଟେଲରେ ରହିଥିଲେ। ଚନ୍ଦ୍ର ଶେଖରନ୍ଙ୍କ ରୁମ୍ ଓ ଅଭିଯୋଗକାରିଣୀଙ୍କ ରୁମ୍ ପାଖାପାଖି ଥିଲା। ମହିଳା ଜଣଙ୍କ ବୁଧବାର ସକାଳେ ବାଥରୁମ୍ରେ ଥିଲେ। ଏହି ସମୟରେ ବାଥୁରମ୍ ଏକ୍ଜଷ୍ଟ୍ ଭେଣ୍ଟ୍ ଫାଙ୍କ ଦ୍ୱାରା ମୋବାଇଲରେ ଚନ୍ଦ୍ରଶେଖରନ୍ ଭିଡିଓ ଶୁଟ୍ କରୁଥିଲେ। ଏହାକୁ ମହିଳା ଜଣଙ୍କ ଦେଖି ବିରୋଧ କରିଥିଲେ। ଏନେଇ ହୋଟେଲ କର୍ତ୍ତୃପକ୍ଷଙ୍କୁ ଜଣାଇବା ପରେ ଚନ୍ଦ୍ର ଶେଖରନଙ୍କୁ ଡକାଯାଇ ପଚରାଯାଇଥିଲା। ପରିସ୍ଥିତି ବିଗିଡ଼ିବାରୁ ଚନ୍ଦ୍ରଶେଖରନ୍ ହୋଟେଲରୁ କୌଶଳ କରି ଫେରାର ହୋଇଯାଇଥିଲେ। ମହିଳା ଜଣଙ୍କ ଏନେଇ ହର୍ ଟିମ୍କୁ ଜଣାଇ ଅଭିଯୋଗ କରିଥିଲେ। ଚନ୍ଦ୍ରଶେଖର ଲକ୍ଷ୍ମୀସାଗର ଅଞ୍ଚଳରେ ରହିବା ପାଇଁ ଆଉ ଏକ ହୋଟେଲ ଖୋଜୁଥିବାବେଳେ ହର୍ ଟିମ୍ ତାଙ୍କୁ ଧରିବାରେ ସକ୍ଷମ ହୋଇଥିଲା। ପରେ ତାଙ୍କୁ ଲକ୍ଷ୍ମୀସାଗର ଥାନାକୁ ହସ୍ତାନ୍ତର କରାଯାଇଥିଲା।