ବାରିପଦା ଅଫିସ,୨୦ା୯: ମୟୂରଭଞ୍ଜ ଜିଲା ବାରିପଦା ସହରରେ ଥିବା ଗାନ୍ଧୀ ପାର୍କ ନିକଟରୁ କ୍ରାଇମବ୍ରାଞ୍ଚର ସ୍ବତନ୍ତ୍ର ଟାସ୍କ ଫୋର୍ସ(ଏସ୍ଟିଏଫ୍) ଚଢ଼ାଉ କରି ୨ଫୁଟର କଲରାପତରିଆ ବାଘଛାଲ ଜବତ କରିଛି। ଏହି କାରବାରରେ ସମ୍ପୃକ୍ତ ଜଣେ ଇଞ୍ଜିନିୟରିଂ ଛାତ୍ରଙ୍କ ସମେତ ୨ଜଣଙ୍କୁ ଗିରଫ କରାଯାଇଛି। ଅଭିଯୁକ୍ତଦ୍ୱୟ ହେଲେ ବଡ଼ସାହି ଥାନା ଅଧୀନ ଉଠାଣୀନୂଆଗାଁ ଗ୍ରାମର ବିକାଶ ବେଣ୍ଟକର(୨୭) ଓ ଖାନୁଆ ପଞ୍ଚାୟତ ପଳାଶବଣୀ ଗ୍ରାମର ବିକାଶ ବିନୟ ସିଂ(୨୬)।
ସୂଚନା ଅନୁଯାୟୀ, ବିକାଶ ରଙ୍ଗ ମିସ୍ତ୍ରି ଭାବେ କାମ କରନ୍ତି। ଶିମିଳିପାଳ ଅଞ୍ଚଳକୁ ସେ କାମ କରିବାକୁ ଯାଇଥିବା ବେଳେ ବାଘ ଛାଲ କିଣିଥିଲେ। ଏହାକୁ ବିକ୍ରି କରିବା ପାଇଁ ସହଯୋଗୀ ଭାବେ ଡିଗ୍ରୀ ଇଞ୍ଜନିୟରିଂ ପାସ୍ କରିଥିବା ବିକାଶ ବିନୟଙ୍କ ସହିତ ଯୋଗାଯୋଗ କରିଥିଲେ। ପରେ ବିକାଶ ବିନୟ ଏହି ବାଘଛାଲର ଫଟୋକୁ ବିକ୍ରି କରିବା ଉଦ୍ଦେଶ୍ୟରେ ନିଜ ଫେସ୍ବୁକ୍ରେ ପୋଷ୍ଟ କରିଥିଲେ। ଚେନ୍ନାଇର କ୍ରାଇମ୍ କଣ୍ଟ୍ରୋଲ ବୋର୍ଡ ଏହି ଫଟୋ ଦେଖି ୱାଇଲ୍ଡ ଲାଇଫ୍ କ୍ରାଇମ୍ କଣ୍ଟ୍ରୋଲ ବୋର୍ଡ ଜବଲପୁରକୁ ଖବର ଦେଇଥିଲା। ଜବଲପୁରରୁ ଓଡ଼ିଶା ଏସ୍ଟିଏଫ୍କୁ ସୂଚନା ଦିଆଯାଇଥିଲା। ଏସ୍ଟିଏଫ୍ ପକ୍ଷରୁ ବାରିପଦା ବନ ବିଭାଗକୁ ଖବର ଦିଆଯିବା ସହ ଜଣେ କର୍ମଚାରୀ ଗ୍ରାହକ ସାଜି ବିକାଶ ବିନୟଙ୍କ ସହ ଯୋଗାଯୋଗ କରିଥିଲେ। ଯୋଜନା ଅନୁଯାୟୀ ସୋମବାର ବାଘଛାଲ ନେଇ ଆସିଥିବା ବେଳେ ଏସଟିଏଫ୍ ଓ ବନ କର୍ମଚାରୀମାନେ ବିକାଶ ବିନୟଙ୍କୁ କାବୁ କରିଥିଲେ। ତାଙ୍କଠାରୁ ବାଘଛାଲ ଓ ଦାନ୍ତ ଜବତ କରାଯାଇଛି। ବାଘଟି ଅଳ୍ପ ବୟସର ହୋଇଥିବା ବେଳେ ଏହାର ଲିଙ୍ଗ ଜଣାପଡ଼ିନାହିଁ। ବାଘଛାଲର ଡିଏନ୍ଏ ପରୀକ୍ଷା ପରେ ଲିଙ୍ଗ ଓ ବୟସ ଜଣାପଡ଼ିବ ବୋଲି ବିଭାଗ ସୂଚନା ଦେଇଛି। ଏହି ଚଢ଼ାଉରେ ୱାଇଲ୍ଡ ଲାଇଫ୍ କଣ୍ଟ୍ରୋଲ ବୋର୍ଡର କନଷ୍ଟେବଳ ରାଜୀବ ଦୀକ୍ଷିତ, ସହକାରୀ ବନ ସଂରକ୍ଷକ ଦିଲୀପ କୁମାର ବାରିକ, ବାରିପଦା ବନାଞ୍ଚଳ ଅଧିକାରୀ ଲକ୍ଷ୍ମୀଧର ବେହେରା ପ୍ରମୁଖ ସାମିଲ ଥିଲେ ା ଏ ସଂକ୍ରାନ୍ତରେ ଏକ ମାମଲା (ଓଆର ୭୮/୨୦୨୧-୨୨) ରୁଜୁ କରାଯାଇ ଅଧିକ ତଦନ୍ତ ଜାରି ରହିଛି।