ଲଣ୍ଡନ, ୨୨ା୧(ପି.ଟି.)-ଭାରତ ବିପକ୍ଷ ପ୍ରଥମ ଦୁଇ ଟେଷ୍ଟ ମ୍ୟାଚ ପାଇଁ ୧୬ ଜଣିଆ ଇଂଲଣ୍ଡ କ୍ରିକେଟ ଦଳ ଘୋଷଣା କରାଯାଇଛି। ଏଥିରେ ବିସ୍ଫୋରକ ଅଲରାଉଣ୍ଡର ବେନ୍ ଷ୍ଟୋକ୍ସ ଏବଂ ପେସ୍ ବୋଲର ଜୋଫ୍ରା ଆର୍ଚରଙ୍କୁ ନିଆଯାଇଛି। ଫେବୃୟାରୀ ୫ରୁ ଚେନ୍ନାଇର ଏମ୍ଏ ଚିଦାମ୍ବରମ ଷ୍ଟାଡିୟମରେ ଖେଳାଯିବାକୁ ଥିବା ଏହି ଦୁଇଟି ମ୍ୟାଚ ଲାଗି ଚୟନକର୍ତ୍ତାମାନେ ଆହୁରି ମଧ୍ୟ ଇଂଲଣ୍ଡ ୬ ଟ୍ରାଭେଲିଂ ରିଜର୍ଭ ଖେଳାଳିଙ୍କ ନାମ ଘୋଷଣା କରିଛନ୍ତି। ଉଭୟ ଷ୍ଟୋକ୍ସ ଏବଂ ଆର୍ଚରଙ୍କୁ ଶ୍ରୀଲଙ୍କା ବିପକ୍ଷ ୨ ମ୍ୟାଚ ବିଶିଷ୍ଟ ଟେଷ୍ଟ ସିରିଜରୁ ବିଶ୍ରାମ ଦିଆଯାଇଥିଲା। ପିତୃତ୍ୱ ଲାଭ କରିବାକୁ ଥିବାରୁ ରୋରି ବନର୍ସ ଶ୍ରୀଲଙ୍କା ଗସ୍ତରେ ସାମିଲ ହୋଇ ନ ଥିଲେ। ଜୋ ରୁଟ୍ ଅଧିନାୟକ ପଦ ବଜାୟ ରଖିଛନ୍ତି। ସରେ’ର ଓଲି ପୋପ୍ ଭାରତ ଗସ୍ତରେ ଯିିବେ। ତେବେ ଏହା ପୂର୍ବରୁ ତାଙ୍କୁ ଫିଟ୍ନେସ୍ ପରୀକ୍ଷାରେ ଉତ୍ତୀର୍ଣ୍ଣ ହେବାକୁ ପଡ଼ିବ। ଜାତୀୟ ଚୟନକର୍ତ୍ତାମାନେ ଜୋନାଥନ ବେୟାରଷ୍ଟୋ, ସାମ୍ କୁରାନ ଓ ମାର୍କ ଉଡ୍ ପ୍ରମୁଖ ୩ ଖେଳାଳିଙ୍କୁ ବିଶ୍ରାମ ଦେଇଛନ୍ତି। ଏହି ଖେଳାଳିମାନେ ବର୍ତ୍ତମାନ ଶ୍ରୀଲଙ୍କା ଟୁର୍ରେ ଅଛନ୍ତି। ସେମାନେ ଭାରତ ବିପକ୍ଷ ପ୍ରଥମ ଦୁଇ ଟେଷ୍ଟ ଖେଳିବେ ନାହିଁ। ଶ୍ରୀଲଙ୍କା ସିରିଜ ପରେ ସମରସେଟ୍ର କ୍ରେଗ୍ ଓଭରଟନ ସ୍ବଦେଶ ପ୍ରତ୍ୟାବର୍ତ୍ତନ କରିବେ ବୋଲି ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ପ୍ରକାଶ କରିଛି। ଗାଲେରେ ଦ୍ୱିତୀୟ ଟେଷ୍ଟ ଶେଷ ହେବାପରେ ଇଂଲଣ୍ଡ ଖେଳାଳିମାନେ ଏକ ଚାର୍ଟର ବିମାନ ଯୋଗେ ଚେନ୍ନାଇରେ ଓହ୍ଲାଇବେ। ଚେନ୍ନାଇ ପରେ ଅହମ୍ମଦାବାଦର ମୋଟେରା ଷ୍ଟାଡିୟମରେ ଖେଳ ଅନୁଷ୍ଠିତ ହେବ। ୧,୧୦,୦୦୦ ଆସନ ବିଶିଷ୍ଟ ବିଶ୍ୱର ଏହି ସର୍ବବୃହତ୍ କ୍ରିକେଟ ଷ୍ଟାଡିୟମରେ ଭାରତ ନିଜ ମାଟିରେ ଏହାର ଦ୍ୱିତୀୟ ଦିବାରାତ୍ର ଟେଷ୍ଟ ମ୍ୟାଚ ଖେଳିବ। ପ୍ରଥମ ପିଙ୍କ୍ବଲ ଟେଷ୍ଟ କୋଲକାତାରେ ଖେଳାଯାଇଥିଲା।
ପ୍ରଥମ ଦୁଇ ଟେଷ୍ଟ ପାଇଁ ଇଂଲଣ୍ଡ ଦଳ: ଜୋ ରୁଟ୍, ଜୋଫ୍ରା ଆର୍ଚର, ମୋଇନ ଅଲି, ଜେମ୍ସ ଆଣ୍ଡରସନ, ଡମ୍ ବେସ୍, ଷ୍ଟୁଆର୍ଟ ବ୍ରଡ୍, ରୋରି ବନର୍ସ, ଜୋସ୍ ବଟଲର, ଜ୍ୟାକ୍ କ୍ରଲି, ବେନ୍ ଫୋକ୍ସ, ଡାନ୍ ଲରେନ୍ସ, ଜ୍ୟାକ୍ ଲିଚ୍, ବେନ୍ ଷ୍ଟୋକ୍ସ, ଓଲି ଷ୍ଟୋନ୍, କ୍ରିସ୍ ଓକ୍ସ।