ମୁମ୍ବାଇ, ୯ା୧୨: ଶନିବାର ମୁମ୍ବାଇରେ ଷ୍ଟାଡିୟମରେ ଭାରତ ଏବଂ ଇଂଲଣ୍ଡ ମହିଳା ଟିମ୍ ମଧ୍ୟରେ ଖେଳାଯାଇଥିବା ଦ୍ୱିତୀୟ ଟି୨୦ ମ୍ୟାଚକୁ ୪ ଉଇକେଟରେ ଜିତି ତିନି ମ୍ୟାଚ୍ ବିଶିଷ୍ଟ ୨-୦ରେ ସିରିଜକୁ ଆଗୁଆ କବଜା କରିଛି ଭ୍ରମଣକାରୀ ଦଳ। ଏହି ମ୍ୟାଚରେ ଉଭୟର ଦଳର ବୋଲରଙ୍କ ପ୍ରାଧାନ୍ୟ ଦେଖିବାକୁ ମିଳିଥିଲା। ଟସ୍ ଜିତି ଇଂଲଣ୍ଡ ଅଧିନାୟକ ହେଥର ନାଇଟ ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲେ।
ଅଧିନାୟକଙ୍କ ନିଷ୍ପତ୍ତିକୁ ଯଥାର୍ଥ ସାବ୍ୟସ୍ତ କରି ଇଂଲଣ୍ଡର ବୋଲରମାନେ ଭାରତୀୟ ଟିମକୁ ମାତ୍ର ୮୦ ରନରେ ଅଲଆଉଟ କରି ଦେଇଥିଲେ। ପ୍ରାରମ୍ଭିକ ବ୍ୟାଟର ସ୍ମୃତି ମନ୍ଧାନା ଏବଂ ଜେମିମାଙ୍କ ବ୍ୟତୀତ କୌଣସି ବ୍ୟାଟର ଦୁଇ ଅଙ୍କ ଛୁଇଁ ପାରି ନଥିଲେ। ଇଂଲଣ୍ଡ ପାଇଁ ୬ ବୋଲର ବୋଲିଂ କରିଥିଲା ବେଳେ ସମସ୍ତଙ୍କୁ ଉଇକେଟ ମିଳିଥିଲା।
୮୧ ରନର ବିଜୟ ଲକ୍ଷ୍ୟକୁ ପିଛା କରି ଇଂଲଣ୍ଡ ଟିମ୍ ମଧ୍ୟ ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟର ସାମ୍ନା କରିଥିଲା। ଭାରତର ଷ୍ଟ୍ରାଇକ ବୋଲର ରେଣୁକା ସିଂ ୧୯ ରନ୍ ମଧ୍ୟରେ ଓପନର ସୋଫିଆ ଏବଂ ଡାନିଏଲ ୱାୟେଟଙ୍କୁ ପ୍ୟାଭିଲିଅନ ଫେରାଇ ଦେଇଥିଲେ। ଏହାପରେ ଏଲିସ କପିସି ଏବଂ ନାଟ ବ୍ରଣ୍ଟଙ୍କ ମଧ୍ୟରେ ୪୦ ରନର ପାର୍ଟନରସିପ ଭାରତଠାରୁ ବିଜୟ ଛଡାଇ ନେଇଥିଲା। ତେବେ ଇଂଲଣ୍ଡ ୧୧ ଓଭର ଦୁଇଟି ବଲରେ ମ୍ୟାଚ୍ ଜିତିଥିଲେ ମଧ୍ୟ ଭାରତୀୟ ବୋଲର ୬ ଉଇକେଟ ନେଇ ମ୍ୟାଚ ପାଲଟାଇଦେବା ସ୍ଥିତିକୁ ନେଇ ଆସିଥିଲେ। ପ୍ରଥମ ଦୁଇଟି ମ୍ୟାଚ୍ ହାରି ଭାରତ ସିରିଜ ହରାଇ ସାରିଥିବା ବେଳେ ଅନ୍ତିମ ମ୍ୟାଚ୍ ରବିବାର ଖେଳାଯିବ।
