ଚେନ୍ନାଇ,୫।୨: ଚେନ୍ନାଇରେ ଭାରତ ବିପକ୍ଷ ପ୍ରଥମ ଟେଷ୍ଟ ମ୍ୟାଚରେ ଇଂଲଣ୍ଡ ଦଳର ଖେଳାଳିମାନେ ହାତରେ ଏକ କଳା ବ୍ୟାଣ୍ଡ୍ ପିନ୍ଧି ଖେଳୁଛନ୍ତି। ଇଂଲଣ୍ଡ ଖେଳାଳିମାନେ ବ୍ରିଟିଶ ସେନାର ପୂର୍ବତନ କ୍ୟାପ୍ଟେନ୍ ତଥା କରୋନା ମହାମାରୀ ବିରୋଧରେ ଲଢେଇ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିବା ସାର୍ ଟମ ମୁରେଙ୍କ ସମ୍ମାନାର୍ଥେ କଳା ବ୍ୟାଣ୍ଡ୍ ପିନ୍ଧିଛନ୍ତି। କରୋନା ସଂକ୍ରମଣ ହେତୁ ଡାକ୍ତରଖାନାରେ ଭର୍ତ୍ତି ହୋଇଥିବା ଏହି ସପ୍ତାହରେ ମୁରେ ୧୦୦ ବର୍ଷ ବୟସରେ ମୃତ୍ୟୁବରଣ କରିଥିଲେ। ସାର୍ ଟମ ମୁରେ ୧୯୨୦ରେ ୟର୍କସାୟାରର ଏକ ଗାଁ କିଘଲିରେ ଜନ୍ମଗ୍ରହଣ କରିଥିଲେ । ମାତ୍ର ୨୦ ବର୍ଷ ବୟସରେ ସେ ବ୍ରିଟିଶ ସେନାରେ ଯୋଗ ଦେଇଥିଲେ। ଦ୍ୱିତୀୟ ବିଶ୍ୱଯୁଦ୍ଧ ସମୟରେ ଡ୍ୟୁକ ଅଫ ୱେଲିଙ୍ଗଟନ ରେଜିମେଣ୍ଟର ଅଷ୍ଟମ ବାଟାଲିୟନରେ ଯୋଗ ଦେଇ ମୁରେ ଭାରତ ଏବଂ ବର୍ମାରେ ସାମରିକ ସେବା କରିଥିଲେ। ସେନାରେ ଯୋଗଦେବା ପରେ ଦ୍ୱିତୀୟ ବର୍ଷ ମୁରେ ଦ୍ୱିତୀୟ ଲେଫ୍ଟନାଣ୍ଟ ଭାବରେ ପଦୋନ୍ନତି ପାଇ ରୟାଲ ଆର୍ମଡ କର୍ପସର ସଦସ୍ୟ ହୋଇ ଭାରତରେ ପୋଷ୍ଟ କରାଯାଇଥିଲା। ଭାରତରେ ସେ ନିଜ ସାଥୀ ସୈନିକମାନଙ୍କୁ ଟ୍ୟାଙ୍କ ଯୁଦ୍ଧ ଏବଂ ମୋଟରସାଇକେଲ ଚଲାଇବାରେ ତାଲିମ ଦେଇଥିଲେ। ସେ ୧୯୪୫ ପ୍ରାରମ୍ଭରେ ବ୍ରିଟେନକୁ ଫେରିବା ପୂର୍ବରୁ ବର୍ମା (ବର୍ତ୍ତମାନ ମିଆଁମାର)ରେ ଜାପାନର ସାମରିକ ଯୁଦ୍ଧରେ ଲଢୁଥିଲେ। ୧୯୪୬ ମସିହାରେ ମାତ୍ର ୨୬ ବର୍ଷ ବୟସରେ ସାମରିକ ପ୍ରଶିକ୍ଷକ ହୋଇଥିଲେ। ତାଙ୍କର ୧୦୦ ତମ ଜନ୍ମଦିନ ପୂର୍ବରୁ, ମୁରେ କରୋନା ପାଇଁ ପାଣ୍ଠି ସଂଗ୍ରହ କରିଥିଲେ। ଏଥିରେ ସେ ପ୍ରାୟ ୧୦୪ କୋଟି ଟଙ୍କା ଦାନ ଭାବରେ ପାଇଥିଲେ।
