ଲଣ୍ଡନ,୧୧।୮ : ଐତିହାସିକ ଲଡର୍ସ ଗ୍ରାଉଣ୍ଡରେ ଗୁରୁବାର ଠାରୁ ଭାରତ ଓ ଇଂଲଣ୍ଡ ମଧ୍ୟରେ ଆରମ୍ଭ ହେବାକୁ ଯାଉଛି ଦ୍ୱିତୀୟ ଟେଷ୍ଟ। ପ୍ରଥମ ମ୍ୟାଚ୍ରେ ବର୍ଷା ଯୋଗୁ ପରାଜୟରୁ ବର୍ତ୍ତି ଯାଇଥିବା ଘରୋଇ ଦଳର ମ୍ୟାନେଜମେଣ୍ଟ ଏବେ ଚିନ୍ତାରେ। ଦ୍ୱିତୀୟ ମ୍ୟାଚ୍ରେ ଦଳର ଦୁଇ କିମ୍ବଦନ୍ତୀ ପେସର ଜେମ୍ସ ଆଣ୍ଡରସନ ଓ ଷ୍ଟ୍ରୁଆର୍ଟ ବ୍ରାଡଙ୍କ ଖେଳିବା ସମ୍ଭାବନା ଖୁବ୍ କମ୍। ବୁଧବାର ଦଳର ପ୍ରାକ୍ଟିସ ସେସନ୍ରେ ସେମାନଙ୍କୁ ଦେଖିବାକୁ ମିଳି ନ ଥିଲା।
ମଙ୍ଗଳବାର ଓ୍ବାର୍ମଅପ୍ ବେଳେ ବ୍ରଡଙ୍କ ଗୋଇଠିରେ ଆଘାତ ଲାଗିଥିଲା। ଆଉ ଜଙ୍ଘ ଜନିତ ଆହତ ସମସ୍ୟା କାରଣରୁ ଆଣ୍ଡରସନ ନେଟ୍ ସେସନରେ ଭାଗ ନେଇ ନ ଥିଲେ। ବିଶ୍ୱ ଇତିହାସର ଅନ୍ୟତମ ଘାତକ ଯୋଡ଼ି ୩୧୨ ମ୍ୟାଚ୍ରେ ୧୧୪୫ ଉଇକେଟ ନେଇଛନ୍ତି। ୨୦୧୬ ପରେ ପ୍ରଥମ ଥର ପାଇଁ ଇଂଲଣ୍ଡକୁ ଆଣ୍ଡରସନ ଓ ବ୍ରଡ୍ଙ୍କ ବିନା ଖେଳିବାକୁ ପଡ଼ିପାରେ। ଏହା ଘରୋଇ ଦଳ ଲାଗି ଏକ ବଡ଼ ଚ୍ୟାଲେଞ୍ଜ ସଦୃଶ ହେବ।
ଇଂଲଣ୍ଡ ଦଳରେ ସ୍ଥାନ ପାଇଛନ୍ତି ସାକିବ ମେହମ୍ମୁଦ। ତାଙ୍କ ସହ ଓଲି ରବିନସନ, ମାର୍କ ଉଡ, କ୍ରେଗ ଓଭର୍ଟନ ଓ ଅଲରାଉଣ୍ଡର ସାମ କୁରାନ ଇଂଲଣ୍ଡ ଦଳର ବୋଲିଂ ଭାର ସମ୍ଭାଳିବେ।
