ପୁଣେ,୨୧।୩: ଟେଷ୍ଟ ଏବଂ ଟି -୨୦ପରେ ଭାରତ ଏବଂ ଇଂଲଣ୍ଡ ମଧ୍ୟରେ ଏକଦିବସୀୟ ସିରିଜ ଅନୁଷ୍ଠିତ ହେବ। ଏଥିପାଇଁ ୧୪ ଜଣିଆ ଇଂଲଣ୍ଡ ଦଳ ଘୋଷଣା କରିଛି। ଇୟନ ମୋର୍ଗାନଙ୍କ ନେତୃତ୍ୱରେ ଏହି ଦଳକୁ ବଡ଼ ଝଟ୍କା ଲାଗିଛି। ଦଳର ଗୁରୁତ୍ୱପୂର୍ଣ୍ଣ ଖେଳାଳି ଜୋଫ୍ରା ଆର୍ଚର ଆହତ ଯୋଗୁ ସିରିଜ୍ରୁ ବାଦ୍ ପଡିଛନ୍ତି। ଆଘାତର ଚିକିତ୍ସା ପାଇଁ ଇଂଲଣ୍ଡ ଫେରିବେ। ଏଥି ସହିତ ଇଂଲଣ୍ଡର ଟେଷ୍ଟ ଦଳର ଅଧିନାୟକ ଜୋ ରୁଟଙ୍କୁ ମଧ୍ୟ ଏହି ଦଳରେ ସ୍ଥାନ ମିଳିନାହିଁ। ପ୍ରଥମ ଥର ପାଇଁ ଇଂଲଣ୍ଡର ଏକଦିବସୀୟ ଦଳରେ ଲିଆମ ଲିଭିଙ୍ଗଷ୍ଟୋନ ସାମିଲ ହୋଇଛନ୍ତି। ସେ ଟି -୨୦ ସିରିଜରେ ଦଳର ଅଂଶ ହୋଇଥିଲେ ମଧ୍ୟ ଗୋଟିଏ ମ୍ୟାଚ ଖେଳିବାର ସୁଯୋଗ ପାଇନଥିଲେ। ଜ୍ୟାକ ବଲ, କ୍ରିସ ଜୋର୍ଡାନ ଏବଂ ଡେଭିଡ ମାଲାନ କଭର ଭାବରେ ଦଳ ସହିତ ଜଡିତ ହେବେ।
ସୂଚନାଯୋଗ୍ୟ, ପୁଣେର ଏମସିଏ ଷ୍ଟାଡିୟମରେ ଭାରତ ଏବଂ ଇଂଲଣ୍ଡ ମଧ୍ୟରେ ଏକଦିବସୀୟ ସିରିଜର ୩ଟି ମ୍ୟାଚ ଖେଳାଯିବ। ସିରିଜର ପ୍ରଥମ ମ୍ୟାଚ ମାର୍ଚ୍ଚ ୨୩ରେ ଖେଳାଯିବ, ଏହା ପରେ ୨୬ ଏବଂ ୨୮ ମାର୍ଚ୍ଚରେ ଅବଶିଷ୍ଟ ଦୁଇଟି ଏକଦିବସୀୟ ପୁଣେରେ ମଧ୍ୟ ଖେଳାଯିବ। ବିରାଟ କୋହଲିଙ୍କ ନେତୃତ୍ୱରେ ଭାରତୀୟ ଦଳ ଟେଷ୍ଟ ସିରିଜରେ ଇଂଲଣ୍ଡକୁ ୩-୧ ଏବଂ ଟି-୨୦ ସିରିଜରେ ୩-୨ରେ ପରାସ୍ତ କରିଛି।