ଗାଲେ, ୧୯ା୧ (ଏପି)- ସପ୍ତମ ଉଇକେଟରେ ଜନ୍ନି ବେୟାରଷ୍ଟୋ ଓ ଡାନିଏଲ୍ ଲରେନ୍ସଙ୍କ ମଧ୍ୟରେ ଅପରାଜିତ ୫୨ରନର ପାର୍ଟନରଶିପ୍ ଯୋଗୁ ଏଠାରେ ଚାଲିଥିବା ପ୍ରଥମ କ୍ରିକେଟ ଟେଷ୍ଟରେ ଇଂଲଣ୍ଡ ୭ ଉଇକେଟରେ ଶ୍ରୀଲଙ୍କାକୁ ପରାସ୍ତ କରିଛି। ଏହି ମ୍ୟାଚରେ ଶ୍ରୀଲଙ୍କା ଦ୍ୱାରା ଧାର୍ଯ୍ୟ ୭୪ରନର ବିଜୟ ଲକ୍ଷ୍ୟକୁ ଦଳ ବିନା ଦ୍ୱିଧାରେ ହାସଲ କରିନେଇଥିଲା।
ଇଂଲଣ୍ଡ ରବିବାର ଖେଳ ଶେଷ ସୁଦ୍ଧା ଏହାର ଦ୍ୱିତୀୟ ଇନିଂସରେ ୩ ଉଇକେଟ ହରାଇ ୩୮ ରନ କରିଥିଲା। ସୋମବାର ୫ମ ତଥା ଅନ୍ତିମ ଦିବସରେ ବିଜୟ ପାଇଁ ଭ୍ରମଣକାରୀ ଦଳ ଆଉ ମାତ୍ର ୩୬ ରନ ଆବଶ୍ୟକ କରୁଥିଲା। ପୂର୍ବଦିନରୁ ଅପରାଜିତ ରହିଥିବା ବେୟାରଷ୍ଟୋ ଓ ଲରେନ୍ସ ଦୃଢ ବ୍ୟାଟିଂ କରି ଦଳର ସ୍କୋରକୁ ୭୬/୩ରେ ପହଞ୍ଚାଇ ବିଜୟୀ କରାଇଥିଲେ। ବେୟାରଷ୍ଟୋ ୬୫ ବଲ୍ରୁ ୩୫ ରନ କରି ଅପରାଜିତ ରହିଥିଲେ। ପ୍ରଥମ ଇନିଂସରେ ଅର୍ଦ୍ଧଶତକ ହାସଲ କରିଥିବା ଲରେନ୍ସ ୨୧ରନ କରି ନଟଆଉଟ ରହିଥିଲେ। ସକାଳେ ଖେଳ ଆରମ୍ଭରେ ଶ୍ରୀଲଙ୍କା ପାଇଁ ଏକ ବ୍ରେକ୍ ଥ୍ରୁର ସୁଯୋଗ ଥିଲା। ତୃତୀୟ ଓଭରରେ ଅଫ୍ ସ୍ପିନର ଦିଲରୁଓ୍ବାନ ପେରେରାଙ୍କ ବଲ୍ରେ ହୁଏତ ବେୟାରଷ୍ଟୋ ଏଲ୍ବିଡବ୍ଲ୍ୟୁ ହୋଇପାରି ଥାନ୍ତେ,ହେଲେ କାମଚଳା ଅଧିନାୟକ ଦିନେଶ ଚାଣ୍ଡିମଲ ଟେଲିଭିଜନ ରେଫରାଲ ପାଇଁ ଅପିଲ କରି ନ ଥିଲେ। ଶ୍ରୀଲଙ୍କାରେ ଇଂଲଣ୍ଡର ଏହା ହେଉଛି କ୍ରମାଗତ ଚତୁର୍ଥ ଟେଷ୍ଟ ବିଜୟ। ଦଳ ପାଇଁ ନିଶ୍ଚୟ ଏହା ଏକ ବଡ଼ ସଫଳତା। ଆଉ ୪ ଦିନ ପରେ ଗାଲେଠାରେ ଦୁଇ ଦଳ ମଧ୍ୟରେ ଦ୍ୱିତୀୟ ତଥା ଅନ୍ତିମ ଟେଷ୍ଟ ମ୍ୟାଚ ଖେଳାଯିବ।
ସଂକ୍ଷିପ୍ତ ସ୍କୋର ବୋର୍ଡ
ଶ୍ରୀଲଙ୍କା ପ୍ରଥମ ଇନିଂସ: ୧୩୫
ଇଂଲଣ୍ଡ ପ୍ରଥମ ଇନିଂସ: ୪୨୧
ଶ୍ରୀଲଙ୍କା ଦ୍ୱିତୀୟ ଇନିଂସ: ୩୫୯
ଇଂଲଣ୍ଡ ଦ୍ୱିତୀୟ ଇନିଂସ: ୭୬/୩ (ଜନ୍ନି ବେୟାରଷ୍ଟୋ-୩୫*, ଡାନିଏଲ ଲରେନ୍ସ-୨୧*, ଲସିଥ୍ ଏମ୍ବୁଲଡେନିୟା-୨/୨୯)।
