ବାଙ୍ଗାଲୋର,୯।୨: ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ) ୧୫ତମ ସଂସ୍କରଣ ଲାଗି ଅଷ୍ଟ୍ରେଲିଆ ଖେଳାଳିଙ୍କ ଉପଲବ୍ଧତା ଏବେ କିଛି କଣ୍ଡିଶନ ଉପରେ ନିର୍ଭର କରୁଛି। ସବୁଠୁ ଧନୀ ଲିଗ୍ ସମୟରେ ହେବାକୁ ଥିବା ବାଂଲାଦେଶ ବିପକ୍ଷ ସିରିଜ୍ ଲାଗି ଶ୍ରୀଲଙ୍କା ଖେଳାଳିମାନେ ଉପଲବ୍ଧ ରହିବେ ନାହିଁ। କିନ୍ତୁ ଇଂଲଣ୍ଡ ଏବଂ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ସମେତ ପ୍ରାୟତଃ ବୋର୍ଡ ମାର୍ଚ୍ଚ ଶେଷରୁ ମେ ଶେଷ ସପ୍ତାହ ପର୍ଯ୍ୟନ୍ତ ଟୁର୍ନାମେଣ୍ଟରେ ଖେଳିବା ପାଇଁ ଖେଳାଳିଙ୍କୁ ଅନୁମତି ଦେଇଛନ୍ତି।
“ଆଇପିଏଲ୍ ପରେ ଇଂଲଣ୍ଡ ଦଳକୁ ନ୍ୟୁଜିଲାଣ୍ଡ ବିପକ୍ଷରେ ପ୍ରଥମ ଡବ୍ଲ୍ୟୁଟିସି ଟେଷ୍ଟ ମ୍ୟାଚ୍ ଖେଳିବାର ଅଛି। ଇଂଲଣ୍ଡର ସମସ୍ତ ଖେଳାଳି ମେ ୨୯ ତାରିଖ ପର୍ଯ୍ୟନ୍ତ ଉପଲବ୍ଧ ହେବେ” ବୋଲି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ପକ୍ଷରୁ ଫ୍ରାଞ୍ଚାଇଜମାନଙ୍କୁ ସୂଚନା ଦିଆଯାଇଛି।
ଏକ ଫ୍ରାଞ୍ଚାଇଜ ଅଧିକାରୀ କହିଛନ୍ତି, ବୁଧବାର ବୋର୍ଡ ପକ୍ଷରୁ ଏକ ମେଲ ଆସିଛି। ସେଥିରେ ଇଂଲଣ୍ଡ ଖେଳାଳିମାନେ ମାର୍ଚ୍ଚ ୨୮ ରୁ ମେ ୨୯ ତାରିଖ ପର୍ଯ୍ୟନ୍ତ ଉପଲବ୍ଧ ରହିବେ। ଚଳିତ ବର୍ଷର ଆଇପିଏଲ ମାର୍ଚ୍ଚ ୨୭ ତାରିଖରୁ ଆରମ୍ଭ ହେବ ବୋଲି ଆଶା କରାଯାଉଛି।