ମେଲବୋର୍ନ,୧୪।୮: ସୀମିତ ଓଭର ସିରିଜ ଖେଳିବାକୁ ଅଷ୍ଟ୍ରେଲିଆ ଇଂଲଣ୍ଡ ଗସ୍ତ କରିବା ନିଶ୍ଚିତ ହୋଇଛି। ଏ ସଂକ୍ରାନ୍ତରେ ଅଷ୍ଟ୍ରେଲିଆ ଶୁକ୍ରବାର ଘୋଷଣା କରିଛି। ଫଳରେ କୋଭିଡ୍-୧୯ କାରଣରୁ ଆର୍ଥିକ ଭାବେ ସଂଘର୍ଷ କରୁଥିବା ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ପାଇଁ ଏହା ଆଶୀର୍ବାଦ ସଦୃଶ ହୋଇଛି। ସେପ୍ଟେମ୍ବର ୪ରୁ ଏହି ଗସ୍ତ ଆରମ୍ଭ ହେବ। ସାଉଥାମ୍ପଟନରେ ଅଷ୍ଟ୍ରେଲିଆ ୩ଟି ଟି୨୦ ଅନ୍ତର୍ଜାତୀୟ ମ୍ୟାଚ୍ ଖେଳିବ। ଏହା ପରେ ଜୈବ ସୁରକ୍ଷିତ ପରିବେଶ ଅଷ୍ଟ୍ରେଲିଆ ମାଞ୍ଚେଷ୍ଟରରେ ୩ଟି ଦିନିକିଆ ମ୍ୟାଚ୍ ଖେଳିବ। ଏହି ମ୍ୟାଚ୍ଗୁଡିକ ପୂର୍ବରୁ ଜୁଲାଇରେ ଖେଳାଯିବାର କାର୍ଯ୍ୟକ୍ରମ ଥିଲା। ଏହି ଗସ୍ତ ନିଶ୍ଚିତ ହୋଇଥିବାରୁ ଆମେ କ୍ରିକେଟ ଅଷ୍ଟ୍ରେଲିଆ (ସିଏ)ର ଖେଳାଳି, ଷ୍ଟାଫ୍, ପ୍ରଶାସନଙ୍କ ନିକଟରେ କୃତଜ୍ଞ ରହିବୁ ବୋଲି ଇସିବି ମୁଖ୍ୟ କାର୍ଯ୍ୟନିର୍ବାହୀ ଟମ୍ ହାରିସନ କହିଛନ୍ତି।
କୋଭିଡ୍-୧୯ ଦ୍ୱାରା ଗତ ୪ ମାସ ମଧ୍ୟରେ ଅନ୍ତର୍ଜାତୀୟ କାର୍ଯ୍ୟସୂଚୀ ସମ୍ପୂର୍ଣ୍ଣ ରୂପ ପ୍ରଭାବିତ ହୋଇଥିଲା। ତେବେ ଅଷ୍ଟ୍ରେଲିଆର ଏହି ଗସ୍ତ ଦ୍ୱାରା ଇସିବି ତା’ର ସବୁ ୧୮ଟି ଅନ୍ତର୍ଜାତୀୟ କାର୍ଯ୍ୟସୂଚୀ ଆୟୋଜନ କରିବାରେ ସକ୍ଷମ ହେବ। ଏହି ଗସ୍ତ ପାଇଁ ଅଷ୍ଟ୍ରେଲିଆ ସରକାରଙ୍କ ଅନୁମୋଦନ ମିଳିଛି ବୋଲି କ୍ରିକେଟ ଅଷ୍ଟ୍ରେଲିଆ ତରଫରୁ କୁହାଯାଇଛି। କରୋନା ଭାଇରସ ସଂକ୍ରମଣ ପରେ ଅଷ୍ଟ୍ରେଲିଆ ପ୍ରଥମ ଥର ପାଇଁ ଅନ୍ତର୍ଜତାୟ ଗସ୍ତ କରିବାକୁ ଯାଉଛି। ଏହି ହାଇପ୍ରୋଫାଇଲ ଗସ୍ତ ପାଇଁ ଆରୋନ ଫିଞ୍ଚ୍ଙ୍କ ନେତୃତ୍ୱରେ ଏକ ୨୧ ଜଣିଆ ଅଷ୍ଟ୍ରେଲିଆ ଦଳ ଘୋଷଣା କରାଯାଇଛି। ଏହି କଷ୍ଟକର ସମୟରେ କ୍ରିକେଟ ଖେଳ ଜାରି ରଖିବା ସବୁଠାରୁ ଗୁରୁତ୍ୱପୂର୍ଣ୍ଣ ବିଷୟ ବୋଲି ଅଷ୍ଟ୍ରେଲିଆ କୋଚ୍ ଜଷ୍ଟିନ ଲାଙ୍ଗର କହିଛନ୍ତି। ଗତବର୍ଷ ମାନସିକ ବିଷାଦ କାରଣରୁ କ୍ରିକେଟରୁ ଦୂରେଇ ରହିଥିବା ଅଲରାଉଣ୍ଡର ଗ୍ଲେନ୍ ମ୍ୟାକ୍ସଓ୍ବେଲ ଇତିମଧ୍ୟରେ ଏଲ୍ବୋ ଇଞ୍ଜୁରୀରୁ ମୁକୁଳି ଦଳକୁ ପ୍ରତ୍ୟାବର୍ତ୍ତନ କରିଛନ୍ତି।
ଅଷ୍ଟ୍ରେଲିଆ ଦଳ: ଆରୋନ ଫିଞ୍ଚ୍ (ଅଧିନାୟକ), ସିନ୍ ଆବୋଟ, ଆଷ୍ଟନ ଅଗର, ଆଲେକ୍ସ କାରେ, ପ୍ୟାଟ୍ସ କୁମିନ୍ସ, ଜୋଶ ହାଜେଲଉଡ୍, ମାର୍ନସ ଲାବୁସେନ୍, ନାଥନ ଲିୟନ, ମିଚେଲ ମାର୍ଶ, ଗ୍ଲେନ୍ ମ୍ୟାକ୍ସଓ୍ବେଲ, ରିଲେ ମେରେଡିଥ୍, ଜୋଶ ଫିଲିପ୍, ଡାନିଏଲ ସାମ୍ସ, କେନ୍ ରିଚାର୍ଡସନ, ଷ୍ଟିଭେନ୍ ସ୍ମିଥ୍, ମିଚେଲ ଷ୍ଟାର୍କ, ମାର୍କସ ଷ୍ଟୋଇନିସ୍, ଆଣ୍ଡ୍ର୍ୟୁ ଟାଏ, ମାଥ୍ୟୁ ଓ୍ବେଡ୍, ଡେଭିଡ୍ ଓ୍ବାର୍ନର ଓ ଆଡାମ ଜାମ୍ପା।