କେପ୍ଟାଉନ୍,୨୩।୧୦(ଏପି): ୬ଟି ସୀମିତ ଓଭର ମ୍ୟାଚ୍ ଖେଳିବାକୁ ଇଂଲଣ୍ଡ ଆସନ୍ତାମାସରେ ଦକ୍ଷିଣ ଆଫ୍ରିକା ଗସ୍ତ କରିବ। ଦକ୍ଷିଣ ଆଫ୍ରିକା ସରକାର ଭ୍ରମଣକାରୀ ଦଳଗୁଡିକ ପାଇଁ କରୋନା ଭାଇରସ୍ ଯାତ୍ରା କଟକଣା କୋହଳ କରିବା ପରେ ଇଂଲଣ୍ଡ ଗସ୍ତ କରିବା ସ୍ପଷ୍ଟ ହୋଇଛି।
କରୋନା ଭାଇରସ୍ ଦ୍ୱାରା ଅତ୍ୟଧିକ ଭାବେ ସଂକ୍ରମିତ ହୋଇଥିବା ଦେଶଗୁଡିକରୁ କୌଣସି ନାଗରିକଙ୍କୁ ଦକ୍ଷିଣ ଆଫ୍ରିକାରେ ପ୍ରବେଶ୍ କରିବାକୁ ଅନୁମତି ଦିଆଯାଇ ନାହିଁ। ଏଥିରେ ବ୍ରିଟେନ ସମେତ ୨୨ଟି ଦେଶ ସାମିଲ ରହିଛନ୍ତି। ତେବେ ଇଂଲଣ୍ଡ ଦଳ ପାଇଁ ଦକ୍ଷିଣ ଆଫ୍ରିକା ତା’ର ନିୟମରେ କୋହଳ କରିଛି। କେପ୍ଟାଉନ୍ରେ ଇଂଲଣ୍ଡର ଏହି ୩ ସପ୍ତାହ ବିଶିଷ୍ଟ ଗସ୍ତ ସୀମିତ ରହିବ। ଦୁଇ ଦଳ ୩ଟି ଲେଖାଏ ଟି୨୦ ଓ ଦିନିକିଆ ମ୍ୟାଚ୍ ଖେଳିବେ। ୪ଟି ମ୍ୟାଚ୍ କେପ୍ଟାଉନର ନ୍ୟୁଲାଣ୍ଡ୍ସରେ ଖେଳାଯିବ। ସେହିପରି ଅନ୍ୟ ଦୁଇଟି ମ୍ୟାଚ୍ କେପ୍ଟାଉନର ପାଖ ସହର ପାର୍ଲରେ ଆୟୋଜନ ହେବ। ଅର୍ଥାତ ଇଂଲଣ୍ଡ ପୂରା ଗସ୍ତରେ ବାୟୋ ବବଲରେ ଥିବା ଗୋଟିଏ ହୋଟେଲରେ ହିଁ ରହିବ। ଦକ୍ଷିଣ ଆଫ୍ରିକାରେ ଏପର୍ଯ୍ୟନ୍ତ ୭୦୦,୦୦୦ କରୋନା ସଂକ୍ରମିତ ଚିହ୍ନଟ ହୋଇଛନ୍ତି।
ନଭେମ୍ବର ୧୬ ତାରିଖରେ ଇଂଲଣ୍ଡ ଦଳ ଏକ ଚାର୍ଟର ଫ୍ଲାଇଟ୍ରେ ସ୍ବଦେଶ ଛାଡି ଦକ୍ଷିଣ ଆଫ୍ରିକା ଗସ୍ତ କରିବ। ନଭେମ୍ବର ୨୭, ୨୯ ଓ ଡିସେମ୍ବର ୧ ତାରିଖରେ ଟି୨୦ ମ୍ୟାଚ୍ଗୁଡିକ ଖେଳାଯିବ। ସେହିପରି ଡିସେମ୍ବର ୪, ୬ ଓ ୯ ତାରିଖରେ ୩ଟି ଦିନିକିଆ ମ୍ୟାଚ୍ ଖେଳାଯିବ। ପହଞ୍ଚିବା ପରେ ଇଂଲଣ୍ଡ ଖେଳାଳି ଓ ସପୋର୍ଟ ଷ୍ଟାଫ୍ ଅତିକମ୍ରେ ଗୋଟିଏ ସପ୍ତାହ କ୍ୱାରାଣ୍ଟାଇନ୍ରେ ରହିବେ। କରୋନା ସଂକ୍ରମଣ ସମୟରେ ଓ୍ବେଷ୍ଟଇଣ୍ଡିଜ୍, ଆୟର୍ଲାଣ୍ଡ, ପାକିସ୍ତାନ ଓ ଅଷ୍ଟ୍ରେଲିଆ ସହିତ ସିରିଜ ଖେଳିଛି। ତେବେ ଦକ୍ଷିଣ ଆଫ୍ରିକା ଗତ ମାର୍ଚ୍ଚ ପରଠାରୁ କୌଣସି ସିରିଜ ଖେଳିବାର ସୁଯୋଗ ପାଇନାହିଁ।