ଗାଲେ, ୨୬ା୧- ଶ୍ରୀଲଙ୍କା ବିପକ୍ଷ ଦ୍ୱିତୀୟ କ୍ରିକେଟ ଟେଷ୍ଟକୁ ଇଂଲଣ୍ଡ ୬ ଉଇକେଟରେ ଜିତି ନେଇଛି। ଏହା ଦ୍ୱାରା ଦଳ ୨ ମ୍ୟାଚ ବିଶିଷ୍ଟ ସିରିଜକୁ ୨-୦ରେ କ୍ଲିନ୍ ସୁଇପ୍ କରି ବିଜୟ ହାସଲ କରିଛି। ସୋମବାର ଚତୁର୍ଥ ଦିବସ ଖେଳରେ ୧୬୪ ରନର ବିଜୟ ଲକ୍ଷ୍ୟକୁ ପିଛା କରିବା ବେଳେ ଇଂଲଣ୍ଡ ଏକଦା ୮୯ ରନରେ ଏହାର ୪ ବ୍ୟାଟ୍ସମ୍ୟାନଙ୍କୁ ହରାଇଥିଲା। ମାତ୍ର ୫ମ ଉଇକେଟରେ ଜୋସ୍ ବଟଲର (୪୬*) ଓ ଡମ୍ ସିବ୍ଲି (୫୬*)ଙ୍କ ମଧ୍ୟରେ ଅପରାଜିତ ୭୫ରନ ପାର୍ଟନରଶିପ୍ ଯୋଗୁ ଦଳ ବିଜୟ ଲକ୍ଷ୍ୟ ହାସଲ କରିପାରିଥିଲା। ଗତ ୩ଟି ଇନିଂସରେ ମାତ୍ର ୬ ରନ କରିଥିବା ସିବ୍ଲି ଠିକଣା ସମୟରେ ଫର୍ମକୁ ଫେରିଥିଲେ। ଫାଇନାଲ ଇନିଂସରେ ସେ ଉପଯୋଗୀ ଅର୍ଦ୍ଧଶତକ ହାସଲ କରିଥିଲେ। ସୋମବାର ପୂର୍ବଦିନର ଅସମାପ୍ତ ସ୍କୋର ୩୩୯/୯ରୁ ଖେଳ ଆରମ୍ଭ କରିବା ପରେ ଇଂଲଣ୍ଡ ୩୪୪ରେ ଅଲ୍ଆଉଟ ହୋଇଯାଇଥିଲା। ପ୍ରଥମ ଇନିଂସରେ ୩୭ ରନ ଅଗ୍ରଣୀ ଲାଭ କରିଥିବା ଶ୍ରୀଲଙ୍କା କିନ୍ତୁ ଦ୍ୱିତୀୟ ଇନିଂସରେ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ମାତ୍ର ୧୨୬ ରନରେ ଅଲ୍ଆଉଟ ହୋଇଯାଇଥିଲା। ଇଂଲଣ୍ଡର ଦୁଇ ସ୍ପିନର ଜ୍ୟାକ୍ ଲିଚ୍ ଓ ଡୋମିନିକ୍ ବେସ୍ ମିଳିତ ଭାବେ ୮ ଉଇକେଟ ନେଇ ଘରୋଇ ଦଳର ପତନ ଘଟାଇଥିଲେ। ଫଳରେ ଇଂଲଣ୍ଡ ପାଇଁ ଦ୍ୱିତୀୟ ଇନିଂସରେ ମାତ୍ର ୧୬୪ ରନ ବିଜୟ ଲକ୍ଷ୍ୟ ଧାର୍ଯ୍ୟ ହୋଇଥିଲା। ଇଂଲଣ୍ଡ ବର୍ତ୍ତମାନ ୪ ଟେଷ୍ଟ, ୫ ଅନ୍ତର୍ଜାତୀୟ ଟି୨୦ ଏବଂ ୩ ଅନ୍ତର୍ଜାତୀୟ ଦିନିକିଆ ଖେଳିବା ଲାଗି ଭାରତ ଗସ୍ତ କରିବ।
ସଂକ୍ଷିପ୍ତ ସ୍କୋର
ଶ୍ରୀଲଙ୍କା ପ୍ରଥମ ଇନିଂସ: ୩୮୧
ଇଂଲଣ୍ଡ ପ୍ରଥମ ଇନିଂସ: ୩୪୪
ଶ୍ରୀଲଙ୍କା ଦ୍ୱିତୀୟ ଇନିଂସ: ୩୫.୫ ଓଭରରେ ୧୨୬/ ଅଲଆଉଟ (ଲସିଥ ଏମ୍ବୁଲଡେନିୟା-୪୦, ବେସ୍-୪/୪୯, ଜ୍ୟାକ୍ ଲିଚ୍-୪/୫୯)।
ଇଂଲଣ୍ଡ ଦ୍ୱିତୀୟ ଇନିଂସ: ୧୬୪/୪ ( ଡମ୍୍୍ ସିବ୍ଲି-୫୬*, ଜୋସ୍ ବଟଲର-୪୬*, ଲସିଥ ଏମ୍ବୁଲଡେନିୟା-୩/୭୩)।
