ଜୋହାନ୍ସବର୍ଗ, ୭।୧୨- ଭ୍ରମଣକାରୀ ଇଂଲଣ୍ଡ ଓ ଦକ୍ଷିଣ ଆଫ୍ରିକା ମଧ୍ୟରେ ହେବାକୁ ଥିବା ଦିନିକିଆ ସିରିଜ୍କୁ ବାତିଲ କରି ଦିଆଯାଇଛି। ଦୁଇ ଦଳର କିଛି ଖେଳାଳିଙ୍କ କୋଭିଡ୍-୧୯ ଟେଷ୍ଟ ରିପୋର୍ଟ ପଜେଟିଭ ଆସିବା ପରେ ସିରିଜ୍କୁ ବାତିଲ କରିବାକୁ ନିଷ୍ପତ୍ତି ନେଇଛନ୍ତି ଦୁଇ ବୋର୍ଡ। ଭ୍ରମଣକାରୀ ଇଂଲଣ୍ଡ ଦଳର ଦୁଇ ଖେଳାଳି ପଜେଟିଭ ବାହାରିବା ପରେ ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ର ପ୍ରଥମ ମ୍ୟାଚ୍କୁ ରବିବାର ବାତିଲ କରାଯାଇଥିଲା। ଏବେ ଇଂଲଣ୍ଡ କୌଣସି ଦିନିକିଆ ମ୍ୟାଚ୍ ନ ଖେଳି ସ୍ବଦେଶ ଫେରିବ।
ବଳକା ଦିନିକିଆ ସିରିଜ୍କୁ ବାତିଲ କରିବାକୁ କ୍ରିକେଟ୍ ଦକ୍ଷିଣ ଆଫ୍ରିକା (ସିଏସ୍ଏ) ଏବଂ ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ରାଜି ହୋଇଥିବା ଏକ ମିଳିତ ବିବୃତି ପ୍ରକାଶ ପାଇଛି। ଖେଳାଳିଙ୍କ ଶରୀରିକ ଓ ମାନସିକ ସ୍ବାସ୍ଥ୍ୟକୁ ଦୃଷ୍ଟିରେ ରଖି ଏହି ନିଷ୍ପତ୍ତି ନେଇଛନ୍ତି ଦୁଇ ବୋର୍ଡ। ଭବିଷ୍ୟତରେ ଏହି ସିରିଜ୍ ଆୟୋଜିତ ହୋଇ ପାରିବ ନା ନାହିଁ, ସେ ସମ୍ପର୍କରେ ଦୁଇ ବୋର୍ଡ ପରବର୍ତ୍ତୀ ସମୟରେ ଘୋଷଣା କରିବେ।