ଇହ୍ନି ଲୋଗୋ ନେ ଲେ ଲିନା ଦୁପଟ୍ଟା ମେରା….

ମୁମ୍ବାଇ: ଫିଲ୍ମ ପରଦାରେ ନିଖୁଣ ଅଭିନୟ କରି ପ୍ରଶଂସା ସାଉଁଟିଥିବା ବଲିଉଡ୍‌ ଅଭିନେତ୍ରୀ ମୀନା କୁମାରୀଙ୍କ ଦୁଃଖଭରା କାହାଣୀ ଶୁଣିଲେ ମନରେ ସମବେଦନା ଜାତ ହୋଇଥାଏ। ଜନ୍ମ ପରେ ପରେ ତାଙ୍କର ଦୁଃଖ ଆରମ୍ଭ ହୋଇଥିଲା। ସେ ୧୯୩୩ ଅଗଷ୍ଟ ୧ରେ ମୁମ୍ବାଇର ଦାଦରଠାରେ ଜନ୍ମଗ୍ରହଣ କରିଥିଲେ। ଝିଅ ହୋଇଥିବାରୁ ପିତା ତାଙ୍କୁ ନେଇ ଅନାଥାଶ୍ରମରେ ଛାଡି ଆସିଥିଲେ। ତେବେ ମା’ଙ୍କର କାନ୍ଦ ଦେଖି ଶେଷରେ ମୀନା କୁମାରୀଙ୍କୁ ପିତା ଘରକୁ ଫେରାଇ ଆଣିଥିଲେ। ଜନ୍ମ ସମୟରେ ତାଙ୍କ ନାମ ମାହଜେବିନ୍‌ ବାନୋ ରଖାଯାଇଥିଲା। ପରେ ତାଙ୍କର ସ୍କ୍ରିନ୍‌ ନାମ ମୀନା କୁମାରୀ ରଖାଯାଇଥିଲା। ଖୁବ୍‌ କମ୍‌ ବୟସରେ ସେ ବଲିଉଡ୍‌ରେ ପାଦ ଦେଇଥିଲେ। ୧୯୩୯ରେ ସେ ମାତ୍ର ୪ ବର୍ଷ ବୟସରେ ବିଜୟ ଭଟ୍ଟଙ୍କ ଫିଲ୍ମ ଲେଦରଫେସ୍‌ରେ ଅଭିନୟ କରିଥିଲେ। ୧୯୫୪ରେ ତାଙ୍କର ଫିଲ୍ମ ବିରଜୁ ବାବରା ୧୦୦ ସପ୍ତାହ ପର୍ଯ୍ୟନ୍ତ ହଲରେ ପ୍ରଦର୍ଶିତ ହୋଇଥିଲା। ମୀନା କୁମାରୀ ବଲିଉଡ୍‌ରେ ଟ୍ରାଜେଡି କୁଇନ ଭାବେ ବେଶ୍‌ ପରିଚିତିି ହାସଲ କରିଥିଲେ। ରିଲ୍‌ ଲାଇଫ୍‌ ଭଳି ତାଙ୍କ ରିୟଲ ଲାଇଫ୍‌ ମଧ୍ୟ ବେଶ୍‌ ଦୁଃଖଭରା ଥିଲା। ସେ ତିନି ତଲାକ୍‌ର ଶିକାର ହୋଇଥିଲେ। ଏହାପରେ ହଲାଲା ପରମ୍ପରା ମାଧ୍ୟମରେ ପ୍ରଥମ ସ୍ବାମୀଙ୍କ ପାଖକୁ ଫେରିଥିଲେ ମଧ୍ୟ ଏହା ତାଙ୍କୁ ମାନସିକସ୍ତରରେ ଗଭୀର ଆଘାତ ଦେଇଥିଲା। ୧୯୫୧ରେ ତମାସା ଶୁଟିଂ ସେଟରେ କମଲ ଆମରୋହିଙ୍କୁ ମୀନା କୁମାରୀ ଭେଟିଥିଲେ। ଚିହ୍ନା ପରିଚୟ ତାପରେ ଦୁହିଁଙ୍କ ମଧ୍ୟରେ ବିବାହ ହୋଇଥିଲା। ତେବେ ବୈବାହିକ ଜୀବନ ୧୨ ମାସ ବି ତିଷ୍ଠି ପାରି ନ ଥିଲା। ଦୁହିଁଙ୍କ ମଧ୍ୟରେ ତଲାକ ହୋଇଥିଲା। ଏହାପରେ କମଲ ନିଜର ଭୁଲ ବୁଝିପାରିଥିଲେ। ସେ ମୀନା କୁମାରୀଙ୍କୁ ପୁଣିଥିରେ ବିବାହ କରିବାକୁ ଚାହିଁଥିଲେ। ତେବେ ମୁସଲମାନ ଧାର୍ମିକ ପରମ୍ପରା ହଲାଲା ଅନୁସାରେ ଅନ୍ୟ ଜଣଙ୍କୁ ମୀନା କୁମାରୀ ବିବାହ କରିବା ପରେ ହିଁ ସେ ପୁଣି କମଲଙ୍କୁ ବିବାହ କରିପାରିବେ ବୋଲି ଧର୍ମଗୁରୁ କହିଥିଲେ। ଏହାପରେ ମୀନା କୁମାରୀଙ୍କ ବିବାହ ଜିନତ୍‌ ଅମନଙ୍କ ପିତା ଉମାନଉଲ୍ଲା ଖାଁଙ୍କ ସହିତ କମଲ କରାଇଥିଲେ। ପରେ ଏକ ମାସ ପରେ ପୁଣି ମୀନା କୁମାରୀ କମଲଙ୍କୁ ବିବାହ କରିଥିଲେ। ମନର ମଣିଷ ପାଖକୁ ଫେରିବା ଲାଗି ତାଙ୍କ ବାଟରେ ବାଧା ସାଜିଥିଲା ଧାର୍ମିକ ପରମ୍ପରା। ଏଥିରେ ମୀନା କୁମାରୀଙ୍କ ହୃଦୟ ଦୁଃଖରେ ଭାଙ୍ଗି ପଡ଼ିଥିଲା। ମୀନା କୁମାରୀ ଦୁଃଖ ଭୁଲାଇବା ପାଇଁ ମଦ୍ୟପାନ କରୁଥିଲେ। ଶେଷରେ ୧୯୭୨ ମାର୍ଚ୍ଚ ୩୧ରେ ମୁମ୍ବାଇରେ ସେ ଶେଷ ନିଶ୍ୱାସ ତ୍ୟାଗ କରିଥିଲେ। ପାକିଜା ଫିଲ୍ମରେ ମୀନା କୁମାରୀଙ୍କ ଗୀତ ଚଲୋ ଦିଲ୍‌ଦାର୍‌ ଚଲୋ ଚାନ୍ଦ୍‌ କେ ପାର୍‌ ଚଲୋ… ଏବଂ ଇହ୍ନି ଲୋଗୋ ନେ ଲେ ଲିନା ଦୁପଟ୍ଟା ମେରା…. ଆଜି ବି ମନରେ ଭାବାବେଗ ସୃଷ୍ଟି କରିଥାଏ।