କେନ୍ଦ୍ରାପଡ଼ା ଅଫିସ, ୨୭ା୮: କେନ୍ଦ୍ରାପଡ଼ା ସ୍ବୟଂଶାସିତ ମହାବିଦ୍ୟାଳୟ ନାମଲେଖା ଫି’ ବୃଦ୍ଧିକୁ ନେଇ ଗତ ସପ୍ତାହ ଧରି ଜନଅସନ୍ତୋଷ ଓ ବିରୋଧ ଲାଗି ରହିଥିଲା। ଏହାକୁ ଦୃଷ୍ଟିରେ ରଖି ଜିଲାପାଳ ଅମୃତ ଋତୁରାଜ ଓ ମହାବିଦ୍ୟାଳୟର ପରିଚାଳନା କମିଟି ସଦସ୍ୟଙ୍କ ଗୁରୁବାର ବୈଠକ ହୋଇଥିଲା। ଫଳରେ ମହାବିଦ୍ୟାଳୟ ଅଧ୍ୟକ୍ଷ ପ୍ରଫେସର ଗୋପାଳ ଚନ୍ଦ୍ର ବେହେରା ନାମଲେଖା ଫ’ କମିଥିବା ଜିଲାପାଳଙ୍କୁ ଶୁକ୍ରବାର ଏକ ଚିଠି (ନଂ. ୨୦୮୧) କରିଛନ୍ତି। ଏହି ଚିିଠିରେ ଅଧ୍ୟକ୍ଷ ବେହେରା ଦର୍ଶାଇଛନ୍ତି ଯେ, ଗତବର୍ଷ ନାମଲେଖା ଫି’ରୁ ମାତ୍ର ୧୫ ପ୍ରତିଶତ ଟଙ୍କା ବୃଦ୍ଧି କରାଯାଉଛି। ଗତବର୍ଷ ଯୁକ୍ତ ୨ କଳା ବିଭାଗରେ ନାମଲେଖା ଫି’ ୨୩୦୫ ଟଙ୍କା ଥିବାବେଳେ ଚଳିତବର୍ଷ ୩୪୫ ଟଙ୍କା ବଢ଼ାଯାଇ ୨୬୫୦ ଟଙ୍କା ହୋଇଛି। ସେହିପରି ଯୁକ୍ତ ୨ ବିଜ୍ଞାନରେ ୩୩୦୫ ଟଙ୍କାରୁ ୩୮୦୦ ଟଙ୍କା, ଯୁକ୍ତ ୨ ବାଣିଜ୍ୟରେ ୨୩୦୫ ଟଙ୍କାରୁ ୨୬୫୦ ଟଙ୍କା, ଯୁକ୍ତ ୩ କଳାରେ ୩୭୦୦ରୁ ୫୫୫ ଟଙ୍କା ବୃଦ୍ଧି କରାଯାଇ ୪୨୫୫ ଟଙ୍କା, ଯୁକ୍ତ ୩ ବିଜ୍ଞାନରେ ୪୭୦୦ରୁ ୫୪୦୫ ଟଙ୍କା ଓ ଯୁକ୍ତ ୩ ବାଣିଜ୍ୟରେ ୪୦୦୦ ଟଙ୍କାରୁ ୪୬୦୦ ଟଙ୍କା ବୃଦ୍ଧି କରାଯାଇଛି। ଏହି ସଂଶୋଧନ ପରିଚାଳନା କମିଟିର ସଦସ୍ୟଙ୍କ ସମ୍ମତି ଥିବା ବେଳେ ଦସ୍ତଖତ ଅପେକ୍ଷାରେ ଅଛି ବୋଲି ଚିଠିରେ ଉଲ୍ଲେଖ କରାଯାଇଛି। ସୂଚନାଯୋଗ୍ୟ, ଚଳିତବର୍ଷର ନାମଲେଖା ଫି ପୂର୍ବ ବର୍ଷଠାରୁ ପ୍ରାୟ ୫୫ ପ୍ରତିଶତ ଅଧିକ ଥିବାରୁ ଛାତ୍ରନେତା ରାଜେଶ ପଣ୍ଡା, ପରମାନନ୍ଦ ମହାରଣା, ସତ୍ୟନାରାୟଣ ସେନାପତିଙ୍କ ସମେତ ବହୁ ବୁଦ୍ଧିଜୀବୀ ବିରୋଧ କରିଥିଲେ। ଏହାକୁ ନେଇ ବିଭିନ୍ନ ଛାତ୍ର ସଙ୍ଗଠନ ପକ୍ଷରୁ ପ୍ରତିବାଦ ପତ୍ର ଅଧ୍ୟକ୍ଷ ଓ ଜିଲା ପ୍ରଶାସନକୁ ଦିଆଯାଇଥିଲା।