ଭୁବନେଶ୍ୱର,୨୪ା୭(ଅନୁରାଧା ମହାରଣା): ସିଟ୍ ତୁଳନାରେ ଯୁକ୍ତ୨ ନାମଲେଖା ହାର କମ୍ ଥିବା ବା ଆଦୌ ହୋଇ ନ ଥିବା ଉଚ୍ଚ ମାଧ୍ୟମିକ ବିଦ୍ୟାଳୟ (ଏଚ୍ଏସ୍ଏସ୍୍) ଉପରେ ପଦକ୍ଷେପ ଆରମ୍ଭ ହୋଇଛି। ରାଜ୍ୟର ୮୯ଟି ଏଚ୍ଏସ୍ଏସ୍ରେ ଆଉ ନାମଲେଖା ହେବ ନାହିଁ। ସେହିପରି ୩୨୫ଟି ଏଚ୍ଏସ୍ଏସ୍ରେ ୫୦ ପ୍ରତିଶତ୍ ସିଟ୍ ହ୍ରାସ ହେବ ଓ ୨୫୩ଟି ଉଚ୍ଚ ମାଧ୍ୟମିକ ବିଦ୍ୟାଳୟରୁ ବର୍ଦ୍ଧିତ ସିଟ୍ ପ୍ରତ୍ୟାହାର କରିନିଆଯିବ। ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ଗଠିତ ଉଚ୍ଚସ୍ତରୀୟ କମିଟି ଦ୍ୱାରା ନିଆଯାଇଥିବା ଏହି ନିଷ୍ପତ୍ତିକୁ କାର୍ଯ୍ୟକାରୀ କରିବାକୁ ଉଚ୍ଚ ମାଧ୍ୟମିକ ଶିକ୍ଷା ନିର୍ଦ୍ଦେଶାଳୟ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି। ଏହାଦ୍ୱାରା ରାଜ୍ୟରେ ପ୍ରାୟ ୩୬ ହଜାର ୩୨ଟି ସିଟ୍ ହ୍ରାସ କରାଯାଇ ନାମଲେଖା ହାର ଅପେକ୍ଷାକୃତ ଅଧିକ ରହିଥିବା ଓ ଆବଶ୍ୟକତା ଥିବା ଏଚ୍ଏସ୍ଏସ୍ଗୁଡ଼ିକୁ ଉକ୍ତ ସିଟ୍ ଆବଣ୍ଟନ କରାଯିବ ବୋଲି କୁହାଯାଇଛି।
ତେବେ ପ୍ରକାଶିତ ବିଜ୍ଞପ୍ତି ଅନୁସାରେ, ୨୦୨୧-୨୨ ଓ ୨୦୨୨-୨୩ ଶିକ୍ଷାବର୍ଷରେ ରାଜ୍ୟର ୮୯ଟି ଏଚ୍ଏସ୍ଏସ୍ରେ ଜଣେ ମଧ୍ୟ ଛାତ୍ରୀଛାତ୍ର ନାମ ଲେଖାଇନାହାନ୍ତି। ତେଣୁ ଉକ୍ତ ଏଚଏସ୍ଏସ୍ଗୁଡ଼ିକରେ ନାମଲେଖା ନେଇ ନିର୍ଦ୍ଦେଶାଳୟ ପକ୍ଷରୁ କଟକଣା ଜାରି କରାଯାଇଛି। ଓଇ ଆକ୍ଟ, ୧୯୬୯ ରୁଲ୍-୬-ବି(ଜେ)ଅନୁସାରେ ଚଳିତ ଶିକ୍ଷାବର୍ଷଠାରୁ ସମ୍ପୃକ୍ତ ବିଦ୍ୟାଳୟଗୁଡ଼ିକରେ ଥିବା ୬୮୦୪ ସିଟ୍ରେ ନାମଲେଖା ହେବନାହିଁ। ସେହିପରି ୨୦୨୧-୨୨ ଶିକ୍ଷାବର୍ଷରେ ବିଭିନ୍ନ ଏଚ୍ଏସ୍ଏସ୍ରେ ବୃଦ୍ଧି କରାଯାଇଥିବା ସିଟ୍ ମଧ୍ୟ ବିଭାଗ ପକ୍ଷରୁ ପ୍ରତ୍ୟାହାର କରିନିଆଯିବ। କାରଣ ୨୦୨୦-୨୧ ଶିକ୍ଷାବର୍ଷରେ ମାଟ୍ରିକ ପାସ୍ହାରକୁ ଦୃଷ୍ଟିରେ ରଖି ୮୭୨ ଏଚ୍ଏସ୍ଏସ୍ରେ ପ୍ରାୟ ୫୬ ହଜାର ସିଟ୍ ବୃଦ୍ଧି କରାଯାଇଥିଲା। ପର ଶିକ୍ଷାବର୍ଷରେ ମାଟ୍ରିକ୍ ପାସ୍ହାର କମିଛି। ତେଣୁ ଚଳିତବର୍ଷଠାରୁ ୨୫୩ ଏଚ୍ଏସ୍ଏସ୍ରେ ବର୍ଦ୍ଧିତ ୧୩ ହଜାର ୮୨୧ ସିଟ୍ ପ୍ରତ୍ୟାହୀର କରାଯିବାକୁ ନିଷ୍ପତ୍ତି ହୋଇଛି। ଅନ୍ୟପଟେ ଗତ ୨ ଶିକ୍ଷାବର୍ଷରେ ୩୨୫ଟି ଏଚ୍ଏସ୍ଏସ୍ରେ ଥିବା ୩୦,୮୧୪ ସିଟ୍ର ଏକ ଚତୁର୍ଥାଂଶ ସିଟ୍ରେ ନାମଲେଖା ହୋଇପାରିନାହିଁ। ତେଣୁ ଉକ୍ତ ଏଚ୍ଏସ୍ଏସଗୁଡ଼ିକରୁ ସିଟ୍ ସଂଖ୍ୟା ୫୦ ପ୍ରତିଶତ କମାଇବା ପାଇଁ ନିଷ୍ପତ୍ତି ହୋଇଛି। ଏହିକ୍ରମରେ ଉକ୍ତ ଶିକ୍ଷାନୁଷ୍ଠାନରେ ସିଟ୍ ସଂଖ୍ୟା ୧୫ ହଜାର ୪୦୭କୁ ହ୍ରାସ ପାଇବ।
ରାଜ୍ୟର ସମସ୍ତ ଜିଲାରୁ ବିଭିନ୍ନ ଏଚ୍ଏସ୍ଏସ୍ ଏହି ତାଲିକାରେ ରହିଛି। ଏହିକ୍ରମରେ ଭୁବନେଶ୍ୱରର ଏକାଧିକ ଉଚ୍ଚ ମାଧ୍ୟମିକ ବିଦ୍ୟାଳୟ ରହିଛି। ଭୁବନେଶ୍ୱର ବ୍ଲକର ପ୍ରାୟ ୯ଟି ଏଚ୍ଏସ୍ଏସ୍ରେ ଜଣେ ମଧ୍ୟ ବିଦ୍ୟାର୍ଥୀ ନାମ ଲେଖାଇନାହାନ୍ତି। ସେହିପରି ୨୦୨୦-୨୧ ଶିକ୍ଷା ବର୍ଷରେ ବୃଦ୍ଧି କରାଯାଇଥିବା ସିଟ୍ରେ କେହି ନାମ ଲେଖାଇ ନ ଥିବାରୁ ଭୁବନେଶ୍ୱରର ୧୯ଟି ଉଚ୍ଚ ମାଧ୍ୟମିକ ବିଦ୍ୟାଳୟରୁ ସିଟ୍ ପ୍ରତ୍ୟାହାର କରିନିଆଯିବ। ସେହିପରି ୩୩ଟି ଏଚ୍ଏସ୍ଏସ୍ କଳା, ବିଜ୍ଞାନ ଓ ବାଣିଜ୍ୟରେ ଏକ ଚତୁର୍ଥାଂଶ ନାମଲେଖା ହୋଇପାରି ନ ଥିବାରୁ ଉକ୍ତ ଶିକ୍ଷାନୁଷ୍ଠାନଗୁଡ଼ିକରେ ୫୦ ପ୍ରତିଶତ ସିଟ୍ ହ୍ରାସ କରାଯିବ ବୋଲି ସୂଚନା ଦିଆଯାଇଛି।