ଜୟପୁର,୨୨।୨: ରାଜସ୍ଥାନର ସିକରରେ ଏକ ହୃଦୟ ବିଦାରକ ଘଟଣା ଘଟିଛି। ଗୋଟିଏ ପରିବାରର ୪ ସଦସ୍ୟ ଆତ୍ମହତ୍ୟା କରିଛନ୍ତି। ଏହି ପରିବାର ପୁଅ ମୃତ୍ୟୁରେ ମାନସିକ ଭାରସାମ୍ୟ ହରାଇ ଦୁଇ ଝିଅଙ୍କ ସହ ମା-ବାପା ଆତ୍ମହତ୍ୟା କରିଥିବା ପୋଲିସ ପ୍ରାଥମିକ ତଦନ୍ତରୁ ଜାଣିପାରିଛି। ଘଟଣାସ୍ଥଳରୁ ଏକ ସୁଇସାଇଡ୍ ନୋଟ୍ ମଧ୍ୟ ପୋଲିସ ଜବତ କରିଛି।
ସୂଚନାଯୋଗ୍ୟ, ପରିବାରର ମୁଖ୍ୟ ସକିରର ହନୁମାନ ପ୍ରସାଦ ସୈନୀ ସ୍ତ୍ରୀ ତାରା ଏବଂ ଦୁଇ ଝିଅ ଅନୁ ଏବଂ ପୂଜା ଆତ୍ମହତ୍ୟା କରିଛନ୍ତି। ଏମାନେ ରଶି ଲଗାଇ ଆତ୍ମହତ୍ୟା କରିଛନ୍ତି। ହନୁମାନ ଏକ ସୁଇସାଇଡ୍ ନୋଟ୍ ଛାଡ଼ି ଯାଇଛନ୍ତି। ଯେଉଁଥିରେ ଲେଖା ହୋଇଛି, ପୁଅର ମୃତ୍ୟୁ ପରେ ଆମେମାନେ ବଞ୍ଚିପାରିବୁ ନାହିଁ। ସୁସ୍ଥ ମସ୍କିଷ୍କରେ ମୁଁ ଲେଖୁଛି କି, ମୋ ସ୍ତ୍ରୀ, ଦୁଇ ଝିଅ ପୁଅ ବିନା ବଞ୍ଚିପାରିବୁ ନାହିଁ। ମୋ ପୁଅ ଅମରଙ୍କ ୨୦୨୦ ସେପ୍ଟେମ୍ବର ୨୭ରେ ମୃତ୍ୟୁ ଘଟିଥିଲା। ଅମର ଆମ ୪ ଜଣଙ୍କ ଜୀବନ ଥିଲା। ସେ ତ ନାହିଁ ଆମେ ରହି କ’ଣ କରିବୁ?
ଏଥିରେ ଆହୁରି ମଧ୍ୟ ଲେଖାହୋଇଛି, ପ୍ରଶାସନ ଆମ ପରିବାରର କୌଣସି ସଦସ୍ୟଙ୍କୁ ହଇରାଣ ନ କରୁ। ଏହା ଆମର ନିଜସ୍ବ ନିଷ୍ପତ୍ତି। ଏଥିରେ କେହି ଦାୟୀ ନୁହନ୍ତି। ଏହି ସୁସାଇଡ୍ ନୋଟ୍ ହନୁମାନ ପ୍ରସାଦ ତାଙ୍କ ଛୋଟ ଭାଇ ସୁରେଶଙ୍କୁ ଲେଖିଛନ୍ତି। ଆମ ସମସ୍ତଙ୍କ ଅନ୍ତିମ ସଂସ୍କାର ପରିବାର ପରି କରାଯାଉ। ସୁରେଶ ମୋ ଉପରେ କାହାର କୌଣସି ଟଙ୍କା ବାକି ନାହିଁ। ଏହି ସୁସାଇଡ୍ ନୋଟ୍ ପାଇବା ପରେ ପରିବାରର ଅନ୍ୟ ସଦସ୍ୟଙ୍କ ଆଖିରେ ଲୁହ ଆସିଯାଉଛି।
ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚି ପରିବାରର ୪ ସଦସ୍ୟଙ୍କ ମୃତଦେହ ଜବତ କରିଛି।
