ଡେରାଡୁନ,୨୧।୫: ଦେଶରେ କରୋନା ଭାଇରସ୍ର ଦ୍ୱିତୀୟ ଲହରର ପ୍ରକୋପ ଜାରି ରହିଛି। ଏହି ସମୟରେ ଗୋଟିଏ ପରେ ଗୋଟିଏ ଦୁଃଖଦ ଖବର ସାମ୍ନାକୁ ଆସୁଛି। ଏହିକ୍ରମରେ ଶୁକ୍ରବାର ବେଶ୍ ଜଣାଶୁଣା ପରିବେଶବିତ୍ ସୁନ୍ଦରଲାଲ ବହୁଗୁଣାଙ୍କ ପରଲୋକ ଘଟିଛି। ମୃତ୍ୟୁବେଳକୁ ତାଙ୍କୁ ୯୪ ବର୍ଷ ବୟସ ହୋଇଥିଲା। କରୋନାଜନିତ ତାଙ୍କ ମୃତ୍ୟୁ ହୋଇଥିବା ଜଣାପଡ଼ିଛି। ଗତ କିଛି ଦିନ ତଳେ ସେ କରୋନାରେ ଆକ୍ରାନ୍ତ ହୋଇଥିଲେ। ମେ’୮ରେ ସ୍ବାସ୍ଥ୍ୟବସ୍ଥା ବିଗିଡ଼ିବାରୁ ତାଙ୍କୁ ଉତ୍ତରାଖଣ୍ଡ ଋଷିକେଶ ସ୍ଥିତ ଏମ୍ସ ହସ୍ପିଟାଲରେ ଭର୍ତ୍ତି କରାଯାଇ ଚିକତ୍ସା କରାଯାଉଥିଲା। ହେଲେ ଶୁକ୍ରବାର ଚିକତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ଘଟିଛିି। ତାଙ୍କ ବିିୟୋଗରେ ମୁଖ୍ୟମନ୍ତ୍ରୀ ତୀରଥ ସିଂହ ରାଓ୍ବତ ଶୋକ ପ୍ରକାଶ କରିଛନ୍ତି। ସୂଚନା ମୁତାବକ ସାରା ଜୀବନ ପରିବେଶର ସୁରକ୍ଷା ଦିଗରେ ସୁନ୍ଦରଲାଲ କାର୍ଯ୍ୟ କରିଆସୁଥିଲେ। ଚିପକୋ ଆନ୍ଦୋଳନର ଅନ୍ୟତମ ନେତା ସୁନ୍ଦରଲାଲଙ୍କୁ ହିମାଳୟର ରକ୍ଷକ ବୋଲି କୁହାଯାଏ। କାରଣ ହିମାଳୟରେ ଥିବା ଜଙ୍ଗଲଗୁଡ଼ିକ ସଂରକ୍ଷଣ ପାଇଁ ସେ ଦୀର୍ଘ ବର୍ଷ ଲଢ଼େଇ କରିଥିଲେ। ପରିବେଶ ସୁରକ୍ଷା ପାଇଁ ନିଜ ଜୀବନକୁ ଉର୍ତ୍ସଗୀତ କରିଥିବାରୁ ସୁନ୍ଦରଲାଲଙ୍କୁ ଭାରତ ସରକାର ୧୯୮୧ରେ ପଦ୍ମଶ୍ରୀ ଓ ୨୦୦୯ରେ ପଦ୍ମ ବିଭୂଷଣ ସମ୍ମାନରେ ସମ୍ମାନିତ କରିଥିଲେ। ସୂଚନାଯୋଗ୍ୟ, ଉତ୍ତରାଖଣ୍ଡର ଟିହରି ନକଟସ୍ଥ ଏକ ଗାଁରେ ୧୯୨୭ ଜାନୁଆରୀ ୯ରେ ସୁନ୍ଦରଲାଲ ଜନ୍ମଗ୍ରହଣ କରିଥିଲେ।