ୱାଶିଂଟନ,୨୫ ।୩: ଲସ ଆଞ୍ଜେଲସର ପୂର୍ବତନ ମେୟର ଏରିକ ଗାର୍ସିଟି ଭାରତରେ ଆମେରିକାର ନୂଆ ରାଷ୍ଟ୍ରଦୂତ ହୋଇଯାଇଛନ୍ତି । ଆମେରିକାର ଉପରାଷ୍ଟ୍ରପତି କମଲା ହ୍ୟାରିସ ଶୁକ୍ରବାର ଏରିକ ଗାର୍ସିଟିଙ୍କୁ ଭାରତରେ ଆମେରିକାର ରାଷ୍ଟ୍ରଦୂତ ଭାବେ ଔପଚାରିକ ଶପଥପାଠ କରାଇଛନ୍ତି । ସୂଚନାଯୋଗ୍ୟ, ଭାରତରେ ଆମେରିକାର ରାଷ୍ଟ୍ରଦୂତ ପଦ ଗତ ଦୁଇ ବର୍ଷ ହେବ ଖାଲି ରହିଥିଲା । ଆମେରିକା ସିନେଟ ଚଳିତ ମାସ ଆରମ୍ଭରେ ଭାରତରେ ଆମେରିକାର ଆଗାମୀ ରାଷ୍ଟ୍ରଦୂତ ଭାବେ ଗାର୍ସିଟଙ୍କ ନାମାଙ୍କନର ପୁଷ୍ଟି କରିଥିଲା । ଏହାଦ୍ୱାରା ଭାରତରେ ୨ ବର୍ଷରୁ ଅଧିକ ସମୟ ହେବ ଖାଲି ପଡିଥିବା ରାଷ୍ଟ୍ରଦୂତ ପଦରେ ଗାର୍ସିଟିଙ୍କ ନିଯୁକ୍ତିର ରାସ୍ତା ସଫା ହୋଇଯାଇଥିଲା ।
ଶପଥ ସମାରୋହ ପରେ ନିଜର ରାଜନୈତିକ ଭୂମିକାକୁ ନେଇ ପଚରା ଯାଇଥିବା ପ୍ରଶ୍ନରେ ଗାର୍ସିଟି କହିଛନ୍ତି, ମୁଁ ଏହି ପଦରେ ସେବା ଦେବାକୁ ଉତ୍ସୁକ ରହିଛି । ଶପଥ ସମାରୋହରେ ଗାର୍ସିଟିଙ୍କ ପତ୍ନୀ ଏମି ୱ୍ୱେକଲ୍ୟାଣ୍ଡ, ପିତା ଗିଲ ଗାର୍ସିଟି, ମାଆ ସୁକେ ଗାର୍ସିଟି, ଶାଶୁ ଡି ୱେକଲ୍ୟାଣ୍ଡ ଓ ପରିବାରର ଅନ୍ୟ ସଦସ୍ୟମାନେ ସାମିଲ ଥିଲେ ।