କଟକ ଅଫିସ,୧୨।୪: ଓଡ଼ିଶା ମାଧ୍ୟମିକ ସ୍କୁଲ ଶିକ୍ଷକ ଯୋଗ୍ୟତା ପରୀକ୍ଷା (ଓଏସ୍ଏସ୍ଟିଇଟି) ମୂଲ୍ୟାୟନରେ ତ୍ରୁଟି ଥିବା ଅଭିଯୋଗ ଉଠିଛି। ଓଡ଼ିଶା ମାଧ୍ୟମିକ ଶିକ୍ଷା ପରିଷଦ(ବୋର୍ଡ) ଦ୍ୱାରା ପରିଚାଳିତ ଓଏସ୍ଏସ୍ଟିଇଟିରେ କମ୍ ମାର୍କ ଯୋଗୁ ବହୁ ପରୀକ୍ଷାର୍ଥୀ କୃତକାର୍ଯ୍ୟ ହୋଇପାରି ନାହାନ୍ତି। ପରୀକ୍ଷା ଖାତାକୁ ପୁଣିଥରେ ଯାଞ୍ଚ କରି ନୂତନ ଭାବେ ମୂଲ୍ୟାୟନ କରିବାକୁ ସେମାନେ ଦାବି କରିଛନ୍ତି। ଏ ନେଇ ସୋମବାର ବିଭିନ୍ନ ଜିଲାରୁ ପରୀକ୍ଷାର୍ଥୀମାନେ କଟକ ଆସି ବୋର୍ଡ ସଭାପତି ଏବଂ କ୍ରେଣ୍ଟାଲରଙ୍କୁ ଭେଟିଛନ୍ତି। ଅଭିଯୋଗ ମୁତାବକ, ବୋର୍ଡ ପକ୍ଷରୁ ୱେବସାଇଟରେ ଦିଆଯାଇଥିବା ଉତ୍ତରଖାତା ଅନୁଯାୟୀ ଯାହା ମାର୍କ ରହିଛି ତାହା ବୋର୍ଡର ମାର୍କ ସହ ସମାନ ରହୁନାହିଁ। ବଲାଙ୍ଗୀରର କୁମାରୀ ବେହେରାଙ୍କ କହିବା ଅନୁଯାୟୀ, ଉତ୍ତରଖାତାରେ ତାଙ୍କର ୭୨ ମାର୍କ ରହିଥିଲା। ହେଲେ ଫଳ ପାଇବା ପରେ ସମୁଦାୟ ୫୦ ମାର୍କ ଥିବା ସେ ଅଭିଯୋଗ କରିଛନ୍ତି। ବାଲେଶ୍ୱରର ସୌଭାଗ୍ୟ ରଞ୍ଜନ ପତିଙ୍କ ଓଏମ୍ଆର ଉତ୍ତରଖାତା ଅନୁଯାୟୀ ୭୧ ମାର୍କ ରହିଥିଲା। କିନ୍ତୁ ବୋର୍ଡର ରେଜଲ୍ଟରେ ତାଙ୍କର ୬୭ ମାର୍କ ଥିବାରୁ ସେ ଫେଲ ହୋଇଯାଇଛନ୍ତି। ବୋର୍ଡ ଉପସଭାପତି ନୀହାର ରଞ୍ଜନ ମହାନ୍ତି କହିଛନ୍ତି, ମାର୍କକୁ ନେଇ ଆପତ୍ତି ଥିଲେ ଲିଖିତ ଭାବେ ବୋର୍ଡକୁ ଜଣାନ୍ତୁ। ତ୍ରୁଟି ଥିଲେ ବିଚାରକୁ ନିଆଯିବ।
