ନୂଆଦିଲ୍ଲୀ: ସାରା ବିଶ୍ୱ କୋଭିଡ୍ ମହାମାରୀ ଭୟରେ ଭୟଭୀତ ହୋଇ ରହିଛିି। ଏଭଳି ସମୟରେ ଭାରତରେ ପରିବାଠାରୁ ପେଟ୍ରୋଲ ପର୍ଯ୍ୟନ୍ତ ଏପରିକି ଔଷଧ ଭଳି ବହୁ ଗୁରୁତ୍ୱପୂର୍ଣ୍ଣ ଅତ୍ୟାବଶ୍ୟକ ସାମଗ୍ରୀର ଦର ଆକାଶଛୁଆଁ ରହିଛି। ଗତ ବର୍ଷ ଅପେକ୍ଷା ଚଳିତ ବର୍ଷ ଏହିସବୁ ଅତ୍ୟାବଶ୍ୟକ ସାମଗ୍ରୀର ଦର ୫% ବଢ଼ିଥିବା ବିଭିନ୍ନ ସର୍ଭେ ଓ ଖୁଚୁରା ବଜାର ଉପରେ ଅନୁସନ୍ଧାନ କରୁଥିବା ଅନୁଷ୍ଠାନଗୁଡିକ ପକ୍ଷରୁ କୁହାଯାଇଛି।
ଦେଶରେ ବର୍ତ୍ତମାନ କରୋନା ମହାମାରୀର ଦ୍ୱିତୀୟ ଲହର ଦ୍ରୁତଗତିରେ ବ୍ୟାପୁଛି। ଏପରି ସମୟରେ ଦରବୃଦ୍ଧି ଖାଉଟିଙ୍କ ମନୋବଳରେ ମଧ୍ୟ କିଛି ମାତ୍ରାରେ ପ୍ରଭାବ ପକାଉଛି। ଯଦି ଦେଶର ସଂକ୍ରମଣ ହାର ଏହି ଅନୁପାତରେ ବଢ଼ିଚାଲେ ତେବେ ହୁଏତ ସରକାର ସାରା ଦେଶରେ ଆଗକୁ ଆହୁରି କଡ଼ା କଟକଣା ଲାଗୁ କରିପାରନ୍ତି ବୋଲି ଆର୍ବିଆଇ ଆଶଙ୍କା କରିଛି। ସେହିପରି ଲକ୍ଡାଉନ ଓ ଶଟ୍ଡାଉନ ସମୟରେ ଯୋଗାଣ ଶୃଙ୍ଖଳ ପ୍ରଭାବିତ ନ ହେବା ସହ ଚାହିଦା ଓ ଯୋଗାଣ ଉପରେ କଡ଼ା ନଜର ରଖିବା ପାଇଁ ରାଜ୍ୟଗୁଡିକ କେନ୍ଦ୍ର ଖାଉଟି କଲ୍ୟାଣ ମନ୍ତ୍ରଣାଳୟ ପକ୍ଷରୁ କଡ଼ା ନିର୍ଦ୍ଦେଶନାମ ଜାରି କରାଯାଇଥିବା ସୂଚନା ମିଳିଛି।
ସ୍ଥିତି ଗଭୀର ହେବା ପୂର୍ବରୁ ଏ ସବୁ ବିଷୟ ପ୍ରତି ସରକାର ଧ୍ୟାନଦେବା ସହ ଯୋଗାଣ ଓ ପରିବହନ ବ୍ୟବସ୍ଥାକୁ ଠିକ୍ କରିବା ଆବଶ୍ୟକ ନ ହେଲେ ବଜାର ଦର ଆହୁରି ବଢ଼ିବା ନିଶ୍ଚିତ ବୋଲି କେନ୍ଦ୍ରୀୟ ବାଣିଜ୍ୟ ସଂଗଠନଗୁଡିକ ମତବ୍ୟକ୍ତ କରି କହିଛନ୍ତି। ସରକାର ଯଦି କରୋନା ଆୟତ୍ତ କରିବାରେ ବିଫଳ ହେଲେ ଏବଂ କଟକଣା ବୃଦ୍ଧି କଲେ ତା’ ହେଲେ ବିଭିନ୍ନ ସାମଗ୍ରୀର ଚାଲାଣ ଦୀର୍ଘ ସମୟ ପର୍ଯ୍ୟନ୍ତ ପ୍ରଭାବିତ ହୋଇପାରେ। ଏହାର ପ୍ରଭାବ ଯୋଗାଣ ଶୃଙ୍ଖଳା ଉପରେ ପଡିବା ଯୋଗୁ ବଜାରର ମୁଦ୍ରାସ୍ପୀତି ବଢିବ ବୋଲି ଜଣାପଡିଛି। ଫଳରେ ଅତ୍ୟାବଶ୍ୟକ ସାମଗ୍ରୀଠାରୁ ଆରମ୍ଭକରି ତୈଳ ଓ ଔଷଧ ଦର ବୃଦ୍ଧି ପାଇବ ବୋଲି ଆର୍ବିଆଇ ଆକଳନ କରିଛି। ଆର୍ବିଆଇର ତଥ୍ୟ ଅନୁସାରେ ଉପଭୋକ୍ତା ମୂଲ୍ୟ ସୂଚକାଙ୍କ ମାର୍ଚ୍ଚରେ ୫.୫% ଥିଲା। ଏହା ପୂର୍ବ ମାସରେ ଏହି ହାର ୫% ପର୍ଯ୍ୟନ୍ତ ସୀମିତ ଥିବାବେଳେ ଖାଦ୍ୟ ଓ ଇନ୍ଧନ ମୂଲ୍ୟ ବୃଦ୍ଧି ହୋଇଥିଲା। ତେବେ ମେ ଓ ଜୁନ୍ ମାସରେ ମୁଦ୍ରାସ୍ପୀତି ଆହୁରି ଅଧିକ ବଢ଼ିପାରେ ବୋଲି ଆର୍ବିଆଇ ଆଶଙ୍କା କରିଛି। ଏଭଳି ସମୟରେ ଓଡ଼ିଶା ବଜାରରେ ପରିବା ଦର ୨୦ରୁ ଆରମ୍ଭ ହୋଇ ୧୦୦ ଟଙ୍କା ପର୍ଯ୍ୟନ୍ତ ଥିବାବେଳେ ଡାଲି ଜାତୀୟ ଖାଦ୍ୟର ଦର ୧୦୦ରୁ ୧୫୦ ଟଙ୍କା ମଧ୍ୟରେ ରହିଛି। ସେହିଭଳି ପେଟ୍ରୋଲ ଓ ଡିଜେଲ ମୂଲ୍ୟ ଲିଟର ପିଛା ୯୦ ଉପରେ ରହିଥିବା ବେଳେ ଖାଇବାତେଲ ୧୨୦ରୁ ୧୮୦ ରେ ବିକ୍ରି ହେଉଥିବା ଜଣାପଡିଛି। ବର୍ତ୍ତମାନ କରୋନା ପାଇଁ ଔଷଧର ଚାହିଦା ଅଧିକ ରହିଥିବାରୁ ଏହାର ଦର ମଧ୍ୟ ୨% ବୃଦ୍ଧି ପାଇଥିବା ଜଣାପଡିଛି। ଦେଶରେ ଲଗାତର କରୋନା ସଂକ୍ରମଣ ବୃଦ୍ଧି ସହ ରାଜଧାନୀ ଦିଲ୍ଲୀରେ ଲକ୍ଡାଉନ ଜାରି ରହିଛି। ଦେଶର ଅନ୍ୟ ରାଜ୍ୟଗୁଡ଼ିକରେ ମଧ୍ୟ ନାଇଟ୍ କର୍ଫ୍ୟୁ, ସପ୍ତାହାନ୍ତ ଶଟ୍ଡାଉନ ଆଦି ହୋଇଥିବାରୁ ରୋଜଗାର ଏବଂ ବେରୋଜଗାରୀ ସେହି ଅନୁପାତରେ ବୃଦ୍ଧି ପାଉଛି ବୋଲି ଜଣାପଡ଼ିଛି।