ଭୁବନେଶ୍ୱର, ୧୧।୧ (ବନ୍ଦନା ସେଠୀ)ରାଜଧାନୀ ଭୁବନେଶ୍ୱରରେ ବୁଲା କୁକୁରଙ୍କ ଉପଦ୍ରବ କମିବ, ତା’ ସାଙ୍ଗକୁ ସହରକୁ ‘ରାବିଜ୍ ଫ୍ରି’ ସିଟି କରାଯିବ। ସହରବାସୀଙ୍କୁ ଏଭଳି କିଛି ସ୍ବପ୍ନ ଦେଖାଉଛି ବିଏମ୍ସି। ସୋମବାର ହାଇକୋର୍ଟ କୁକୁରଙ୍କ ବନ୍ଧ୍ୟାକରଣ ଉପରେ ଲାଗିଥିବା ରହିତାଦେଶ ହଟାଇବା ପରେ ସପ୍ତାହକ ମଧ୍ୟରେ ବିଏମ୍ସି ପୁନର୍ବାର କୁକୁରଙ୍କ ଅସ୍ତ୍ରୋପଚାର କରିବ ବୋଲି କହିଛି। ଏଥିସହ ୨୦୨୫ ସୁଦ୍ଧା ଭୁବନେଶ୍ୱରକୁ ରାବିଜ୍ ଫ୍ରି ସହର କରିବା ସହ ଦେଢବର୍ଷ ମଧ୍ୟରେ ସମସ୍ତ କୁକୁରଙ୍କ ବନ୍ଧ୍ୟାକରଣ କରାଯିବ ବୋଲି ବିଏମ୍ସି ଅଧିକାରୀ ସୂଚନା ଦେଇଛନ୍ତି। ମାତ୍ର ଏହି ସ୍ବପ୍ନ କେତେଦୂର ସାକାର ହୋଇ ପାରିବ ସେ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। କାରଣ ସହରରେ କେତେ କୁକୁର ଅଛନ୍ତି ତାହାର ଠିକ୍ ହିସାବ ବିଏମ୍ସି ପାଖରେ ନାହିଁ। କେବଳ ଉପର ଠାଉରିଆ ଭାବେ କୁକୁରଙ୍କ ସଂଖ୍ୟା ଆକଳନ କରାଯାଉଛି। ବର୍ତ୍ତମାନ ସହରର ଜନସଂଖ୍ୟା ପ୍ରାୟ ୧୫ଲକ୍ଷ ଥିବାବେଳେ ଏହାର ୩ ପ୍ରତିଶତ ଅର୍ଥାତ୍ ୪୫ହଜାର କୁକୁର ସହରରେ ଅଛନ୍ତି। ଏହି ଅନୁପାତରେ ଦିନକୁ ୧୦୦ କୁକୁରଙ୍କ ଅସ୍ତ୍ରୋପଚାର କଲେ ଦେଢବର୍ଷ ମଧ୍ୟରେ ସମସ୍ତ କୁକୁରଙ୍କ ଅସ୍ତ୍ରୋପଚାର ସହ ଟୀକାକରଣ ସରିଯିବ ବୋଲି ଅଧିକାରୀମାନେ କହୁଛନ୍ତି। ମାତ୍ର ବାସ୍ତବରେ ଭିତ୍ତିଭୂମି ନ ସଜାଡ଼ି ବିଏମ୍ସି କର୍ତ୍ତୃପକ୍ଷ କେବଳ ଅନ୍ଧାରରେ ବାଡ଼ି ବୁଲାଇ ଚାଲିଛନ୍ତି। ଗତ ୫ମାସ ତଳେ ସହରରେ ୫୦ହଜାରରୁ ଊର୍ଦ୍ଧ୍ୱ କୁକୁର ଥିବାବେଳେ ଏବେ ତାହା ବଢି ୬୦ହଜାର ପାଖାପାଖି ହୋଇଥିବା ଏକ ଆକଳନରୁ ଜଣାଯାଇଛି। ମାତ୍ର ବାସ୍ତବ ସଂଖ୍ୟା ଜାଣିବା ପାଇଁ କୁକୁରଙ୍କ ଗଣନା କରିବାକୁ ଦୀର୍ଘଦିନ ତଳୁ ବିଏମ୍ସି ଯେଉଁ ଯୋଜନା କରିଥିଲା ତାହା କାର୍ଯ୍ୟକାରୀ ହୋଇପାରି ନାହିଁ। ସହରର ପ୍ରତି ୱାର୍ଡ ବୁଲି କେଉଁଠି କେତେ କୁକୁର ଅଛନ୍ତି ତାହାର ତାଲିକା ପ୍ରସ୍ତୁତ କରିବା ପାଇଁ ଟେଣ୍ଡର ଦ୍ୱାରା ଏକ ସଂସ୍ଥାକୁ ନିଯୁକ୍ତ କରାଯାଇଥାନ୍ତା। ଏହାଦ୍ୱାରା ସହରରେ କେତେ ବୁଲା କୁକୁର ଅଛନ୍ତି ତାହାର ତଥ୍ୟ ବିଏମ୍ସି ପାଖରେ ରହିବା ସହ ଏବିସି କାର୍ଯ୍ୟକ୍ରମରେ ସହାୟକ ହୋଇଥାନ୍ତା। ମାତ୍ର ବର୍ଷେ ହେବ ଏହି ଯୋଜନା ବିଏମ୍ସିର ନାଲି ଫିତା ତଳେ ଚାପି ହୋଇ ରହିଯାଇଛି। ଏଭଳି କ୍ଷେତ୍ରରେ କୁକୁରଙ୍କ ସଂଖ୍ୟା ନ ଜାଣି ଦେଢବର୍ଷ ମଧ୍ୟରେ ସବୁ ହୋଇଯିବ ବୋଲି ବିଏମ୍ସି ଯେଉଁ ସ୍ବପ୍ନ ଦେଖାଉଛି ତାହା ଅନିଶ୍ଚିତତା ଘେରରେ ରହିଛି। ତେବେ କୁକୁର ଖୁବ୍ଶୀଘ୍ର ଏଥିପାଇଁ ଟେଣ୍ଡର ପ୍ରକାଶ ପାଇବ ବୋଲି ବିଏମ୍ସି ଡେପୁଟି କମିଶନର ରମେଶ ଚନ୍ଦ୍ର ଜେନା ସୂଚନା ଦେଇଛନ୍ତି। ସେହିପରି ମଞ୍ଚେଶ୍ୱରରେ ତିଆରି ଚାଲିଥିବା କୁକୁର ହସ୍ପିଟାଲ ସପ୍ତାହ ଭିତରେ ଉଦ୍ଘାଟନ ହେବ ବୋଲି ସେ କହିଛନ୍ତି।