କିଭ୍, ୧୭ା୬:ରୁଷିଆ ଆକ୍ରମଣ ବିରୋଧରେ ୟୁକ୍ରେନ୍କୁ ସମର୍ଥନ ଜଣାଇବା ପାଇଁ ଜର୍ମାନୀ ଚାନ୍ସେଲର ଓଲାଫ୍ ସ୍କୋଲ୍ଜ, ଫ୍ରାନ୍ସ ରାଷ୍ଟ୍ରପତି ଇମାନୁଏଲ ମାକ୍ରଁ ଏବଂ ଇଟାଲୀ ପ୍ରଧାନମନ୍ତ୍ରୀ ମାରିଓ ଦ୍ରାଘି ଗୁରୁବାର କିଭ୍ରେ ପହଞ୍ଚିଛନ୍ତି। ୟୁରୋପୀୟ ସଂଘ(ଇୟୁ)ର ଏହି ୩ ନେତା ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କିଙ୍କୁ ଭେଟିଛନ୍ତି। ରୁଷିଆ ସହ ଲଢ଼ିବା ପାଇଁ ୟୁକ୍ରେନ୍ ପାଶ୍ଚାତ୍ୟ ଦେଶଗୁଡ଼ିକ ପକ୍ଷରୁ ଅଧିକ ସହାୟତା ଦାବି କରୁଥିବାବେଳେ ସମର୍ଥନ ଦେବାକୁ ୩ ପ୍ରମୁଖ ରାଷ୍ଟ୍ରର ମୁଖ୍ୟ ୟୁକ୍ରେନ୍ ଗସ୍ତ କରିଛନ୍ତି। ରୋମାନିଆ ରାଷ୍ଟ୍ରପତି କ୍ଲସ୍ ଇଓହାନିସ୍ ମଧ୍ୟ ସେମାନଙ୍କ ସହ ସାମିଲ ହୋଇଛନ୍ତି। ଇୟୁ ଲିଡରମାନେ ଯୁଦ୍ଧରେ ବିଧ୍ୱସ୍ତ ୟୁକ୍ରେନୀୟ ସହର ଇରପିନ୍ ବୁଲି ରୁଷିଆ ଆକ୍ରମଣ ପରବର୍ତ୍ତୀ ଦୃଶ୍ୟ ଦେଖିବା ସହ ମସ୍କୋର ଏଭଳି ବର୍ବରତାକୁ ନିନ୍ଦା କରିଛନ୍ତି। ଇୟୁ ସହାୟତାରେ ୟୁକ୍ରେନ୍କୁ ପୁଣି ଥରେ ଛିଡ଼ା କରାଇବା ପାଇଁ ସମସ୍ତ ପଦକ୍ଷେପ ନିଆଯିବ ବୋଲି ସେମାନେ ପ୍ରତିଶ୍ରୁତି ଦେଇଛନ୍ତି। ଫେବୃୟାରୀ ୨୪ରେ ୟୁକ୍ରେନ୍ ଉପରେ ରୁଷିଆ ଆକ୍ରମଣ କରିବା ପରଠାରୁ ସ୍କୋଲ୍ଜ, ମାକ୍ରଁ କିଭ୍ ଗସ୍ତ ନ କରିବାକୁ ନେଇ ସେମାନଙ୍କୁ ସମାଲୋଚନା କରାଯାଇଥିଲା। ୨ ମାସ ପୂର୍ବରୁ ବ୍ରିଟେନ ପ୍ରଧାନମନ୍ତ୍ରୀ ବୋରିସ୍ ଜନ୍ସନ୍ କିଭ୍ ଗସ୍ତ କରି ଜେଲେନ୍ସ୍କିଙ୍କୁ ଭେଟିଥିଲେ। ତେବେ ଇୟୁ ଲିଡରଙ୍କ ଗସ୍ତକୁ ଜେଲେନ୍ସ୍କି ସ୍ବାଗତ କରିବା ସହ ରୁଷିଆ ବିରୋଧରେ ଆତ୍ମରକ୍ଷା ପାଇଁ ଅଧିକ ସାମରିକ ସହାୟତା ମାଗିଛନ୍ତି। ଜୁନ୍ ୨୯-୩୦ରେ ମାଦ୍ରିଦ୍ରେ ନାଟୋ ସମ୍ମିଳନୀ ହେବା ପୂର୍ବରୁ ଜୁନ୍ ୨୪ ସୁଦ୍ଧା ୟୁକ୍ରେନ୍କୁ ୟୁରୋପୀୟ ସଂଘରେ ସାମିଲ କରିବା ଉପରେ ନିଷ୍ପତ୍ତି ନେବା ପାଇଁ ଇୟୁ ପକ୍ଷରୁ ପ୍ରସ୍ତୁତି ଚାଲିଛି। ଏପରି ସମୟରେ ଏହି ୩ ରାଷ୍ଟ୍ରନେତାଙ୍କ ୟୁକ୍ରେନ୍ ଗସ୍ତ ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି।