ଗଡାନସ୍କ,୨୮।୫(ଏପି): ୟୁରୋପା ଲିଗ୍ ଫୁଟ୍ବଲରେ ଭିଲ୍ଲାରିୟଲ ପ୍ରଥମଥର ପାଇଁ ଟାଇଟଲ ହାସଲ କରିବାର ଗୌରବ ଅର୍ଜନ କରିଛି। ଗୁରୁବାର ଖେଳାଯାଇଥିବା ଲିଗ୍ର ସଂଘର୍ଷପୂର୍ଣ୍ଣ ତଥା ରୋମାଞ୍ଚକ ଫାଇନାଲ ମ୍ୟାଚ୍ରେ ଭିଲ୍ଲାରିୟଲ ୧୧-୧୦ରେ ଶକ୍ତିଶାଳୀ ମାଞ୍ଚେଷ୍ଟର ୟୁନାଇଟେଡକୁ ପରାସ୍ତ କରି ପ୍ରଥମଥର ପାଇଁ କୌଣସି ମେଜର ଟାଇଟଲ ହାସଲ କରିବାରେ ସକ୍ଷମ ହୋଇଛି। ୯୮ ବର୍ଷର ଇତିହାସରେ ସ୍ପେନର ଏହି କ୍ଲବ କୌଣସି ବଡ଼ ଟ୍ରଫି ଜିତି ଇତିହାସ ସୃଷ୍ଟି କରିଛି। ଫାଇନାଲରେ ୟୁନାଇଟେଡ ଭଳି ଶୀର୍ଷସ୍ତରୀୟ କ୍ଲବକୁ ହରାଇବା ମଧ୍ୟ ଏହି କ୍ଲବ ପାଇଁ ଏକ ବଡ଼ ଉପଲବ୍ଧି ସାବ୍ୟସ୍ତ ହୋଇଛି।
ଟାଇଟଲ ମୁକାବିଲାରେ ଜବରଦସ୍ତ ସଂଘର୍ଷ ଦେଖିବାକୁ ମିଳିଥିଲା। ନିର୍ଦ୍ଧାରିତ ସମୟ ଶେଷ ସୁଦ୍ଧା ମ୍ୟାଚ୍ ୧-୧ ଗୋଲରେ ଅମୀମାଂସିତ ରହିଥିଲା। ୨୯ତମ ମିନିଟ୍ରେ ଭିଲ୍ଲାରିୟଲ ତରଫରୁ ଗେରାର୍ଡ ମୋରେନୋ ଫିଲ୍ଡ ଗୋଲ ଦେଇ ଦଳକୁ ୧-୦ରେ ଅଗ୍ରଣୀ କରାଇଥିଲେ। କିନ୍ତୁ ୫୫ତମ ମିନିଟରେ ମାଞ୍ଚେଷ୍ଟର ୟୁନାଟେଡ ତରଫରୁ ଏଡିନଶନ କାଭାନି ଗୋଲ ଦେଇ ମ୍ୟାଚ୍କୁ ୧-୧ ବରାବର ସ୍ଥିତିକୁ ଆଣିଥିଲେ ଓ ଏକ୍ସଟ୍ରା ଟାଇମ ପରେ ମଧ୍ୟ ମ୍ୟାଚ୍ ଡ୍ର ହୋଇଥିଲା। ଫଳାଫଳ ପାଇଁ ପେନାଲ୍ଟି ଶୁଟ୍ ଆଉଟ୍ର ସହାୟତା ନିଆଯାଇଥିଲା। ଏଥିରେ ଭିଲ୍ଲାରିୟଲ ୧୧-୧୦ରେ ବାଜିମାରି ଥିଲା ଓ ଚାମ୍ପିୟନ ହେବା ସହ ଇତିହାସ ସୃଷ୍ଟି କରିଥିଲା। ମାଞ୍ଚେଷ୍ଟର ୟୁନାଇଟେଡ ଗୋଲକିପର ଡେଭିଡ୍ ଡି ଜିଆ ଭଲ ପ୍ରଦର୍ଶନ କରିପାରି ନ ଥିଲେ। ଫଳରେ ୟୁନାଇଟେଡ ମ୍ୟାଚ୍ ହାତଛଡ଼ା କରିବା ସହ ରନର୍ସ ଅପ୍ରେ ସନ୍ତୁଷ୍ଟ ହେବାକୁ ବାଧ୍ୟ ହୋଇଥିଲା। ଭିଲ୍ଲାରିୟଲ କୋଚ୍ ଉନାଇ ଇମରୀଙ୍କ ପାଇଁ ଏହି ବିଜୟ ଏକ ଉପଲବ୍ଧି ସଦୃଶ ହୋଇଛି। ଇମରୀ ଏହାପୂର୍ବରୁ ୨୦୧୪ ଓ ୨୦୧୬ରେ ସେବିଲାର କୋଚ୍ ହିସାବରେ ଏହି ଟାଇଟଲ ଜିତିଥିଲେ। ଦଳର ପ୍ରଦର୍ଶନରେ ସେ ଖୁସି ଜାହିର କରିଛନ୍ତି।
