ନିଶ୍ଚିନ୍ତକୋଇଲି,୨୭।୭(ଅଶୋକ କୁମାର ମହାପାତ୍ର)କଟକ-ଚାନ୍ଦବାଲି ରାସ୍ତା କଡ଼ରେ ଥିବା କେନ୍ଦୁପାଟଣା ନିୟନ୍ତ୍ରିତ ବଜାର କମିଟି ପରିସରରେ କରୋନା ସମୟରେ କୋଟି କୋଟି ଟଙ୍କା ବ୍ୟୟରେ ଅସ୍ଥାୟୀ ୧୦୦ ଶଯ୍ୟା ବିଶିଷ୍ଟ କୋଭିଡ୍ ହସ୍ପିଟାଲ ନିର୍ମାଣ କରାଯାଇଥିଲା। କରୋନା ଛାଡ଼ି ଯିବା ପରେ ଏହି ହସ୍ପିଟାଲ ଭୂତକୋଠି ହୋଇ ପଡ଼ି ରହିଥିଲା। ଏବେ ଏହି ହସ୍ପିଟାଲର ଉଚ୍ଛେଦ ପ୍ରକ୍ରିୟା ଚାଲିଛି। ହସ୍ପିଟାଲର ଯନ୍ତ୍ରାଂଶ ଗୁଡ଼ିକୁ କଟକ ଜିଲାର ୭ଟି ସ୍ବାସ୍ଥ୍ୟକେନ୍ଦ୍ରକୁ ପ୍ରଦାନ କରାଯାଇଛି। ସାମାଜିକ କର୍ମୀ ରମେଶ ଚନ୍ଦ୍ର ସ୍ବାଇଁ କହିଛନ୍ତି, ସରକାର ମହତ ଉଦ୍ଦେଶ୍ୟରେ କୋଭିହ୍ ହସ୍ପିଟାଲ କରିଥିଲେ। ବ୍ଲକରୁ ଲକ୍ଷାଧିକ ଟଙ୍କା ଦିଆଯାଇ ଭିତ୍ତିଭୂମିର ବିକାଶ କରାଯାଇଥିଲା। ନିଶ୍ଚିନ୍ତକୋଇଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଦୁର୍ଘଟଣା ରୋଗୀଙ୍କ ପାଇଁ ଉପଯୁକ୍ତ ସୁବିଧା ନ ଥିବାରୁ ଏଠାରେ ସରକାର ଟ୍ରମା କେୟାର ସେଣ୍ଟର କରିଥିଲେ ବହୁ ଲୋକ ଉପକୃତ ହୋଇଥାନ୍ତେ।
ରାଜ୍ୟ ସରକାରଙ୍କ ପକ୍ଷରୁ ନିଶ୍ଚିନ୍ତକୋଇଲି ବ୍ଲ୍ଳକ ପ୍ରଶାସନ ପ୍ରାୟ ୬୫ ଲକ୍ଷ ଟଙ୍କା ବ୍ୟୟ କରି ଏହି ହସ୍ପିଟାଲର ଭିତ୍ତିଭୂମି ନିର୍ମାଣ କରାଯାଇଥିଲା। ଏବେ ଯନ୍ତ୍ରାଂଶ ବଣ୍ଟାଯିବା ପରେ ନିର୍ମାଣ ହୋଇଥିବା ଘର କିଏ ନେବ ସେ ନେଇ ସ୍ଥାନୀୟ ଅଞ୍ଚଳରେ ଚର୍ଚ୍ଚା ଜୋର ଧରିଛି। ଆମେରିକାନ ଫାଉଣ୍ଡେଶନ ଓ ରାଜ୍ୟ ସରକାରଙ୍କ ମିଳିତ ସହଯୋଗରେ ଏହି ଅସ୍ଥାୟୀ କୋଭିଡ ହସ୍ପିଟାଲରେ ୫ କୋଟିରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ ହୋଇଥିଲା। ୨୦୨୨ ଜାନୁଆରୀ ୭ରେ ତକତ୍ାଳୀନ ଗୃହ ଓ ନଗର ଉନ୍ନୟନ ମନ୍ତ୍ରୀ ପ୍ରତାପ ଜେନା ଓ କଟକ ସଦର ବିଧାୟକ ଚନ୍ଦ୍ରସାରଥି ବେହେରା, ସାଲେପୁର ବିଧାୟକ ପ୍ରଶାନ୍ତ ବେହେରା, ପାଟକୁରା ବିଧାୟକ ସାବିତ୍ରୀ ଅଗ୍ରୱାଲାଙ୍କ ସମେତ କଟକ ଜିଲାପାଳ ଭବାନୀ ଶଙ୍କର ଚୟନି ଏହି ଅସ୍ଥାୟୀ କୋଭିଡ ହସ୍ପିଟାଲକୁ ଲୋକାର୍ପଣ କରିଥିଲେ। ରାଜ୍ୟରେ କୋଭିଡ ସଂକ୍ରମଣ ହ୍ରାସ ପାଇବା ପରେ ଏହି ହସ୍ପିଟାଲର ଗୁରୁତ୍ୱ ହରାଇଥିଲା। ଉଦ୍ଘାଟନ ପରଠାରୁ ଏହି ହସ୍ପିଟାଲଟି କାର୍ଯ୍ୟକ୍ଷମ ନ ହୋଇ ଭୂତକୋଠିରେ ପରିଣତ ହୋଇଛି। ଏ ନେଇ ବିଭିନ୍ନ ଗଣମାଧ୍ୟମରେ ଚର୍ଚ୍ଚା ହେବା ପରେ ସରକାର ତୁରିତ ପଦକ୍ଷେପ ନେଇ ହସପିଟାଲରେ ଥିବା ବିଭିନ୍ନ ମେଡିକାଲ ସରଞ୍ଜାମ, ଶଯ୍ୟା, ଏସସି ଓ ଗୁରୁତ୍ୱପୂର୍ଣ୍ଣ ଯନ୍ତ୍ରାଂଶକୁ ୭ଟି ହସ୍ପିଟାଲକୁ ବଣ୍ଟନ କରାଯାଇଛି। ତେବେ ଏହି ହସ୍ପିଟାଲଟି ରାସ୍ତା କଡରେ ଥିବା ଓ ଭିତ୍ତିଭୂମି ବିକଶିତ ହୋଇଥିବାରୁ ଏଠାରେ ଏକ ଟ୍ରମା କେୟାର ସେଣ୍ଟର ନିର୍ମାଣ ପାଇଁ ସାଧାରଣରେ ଦାବି ହୋଇଆସୁଥିଲା। ସରକାର ଯଦି ଏହି ଭିତ୍ତିଭୂମି ଉପରେ ଟ୍ରମା କେୟାର ସେଣ୍ଟର ନିର୍ମାଣ କରିଥାନ୍ତେ ତେବେ ଦୁର୍ଘଟଣାଜନିତ ରୋଗୀମାନେ ଉପକୃତ ହୋଇପାରିଥାନ୍ତେ। କିନ୍ତୁ ପରିତାପର ବିଷୟ ବିଭାଗୀୟ ଉଚ୍ଚ କର୍ତ୍ତୃପକ୍ଷ ତଥା ଜିଲା ପ୍ରଶାସନ ଏହି ଅସ୍ଥାୟୀ ହସ୍ପିଟାଲକୁ ସମ୍ପୂର୍ଣ୍ଣ ବନ୍ଦ କରିବା ପାଇଁ ନିଷ୍ପତ୍ତି ନେଇଥିଲେ। ଏ ସମ୍ପର୍କରେ ନିଶ୍ଚିନ୍ତକୋଇଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ମୁଖ୍ୟ ଚିକିତ୍ସାଧିକାରୀ ଅମିତ କୁମାର ଜେନାଙ୍କୁ ପଚାରିବାରେ ସରକାରଙ୍କ ନିଷ୍ପତିକ୍ରମେ ହସ୍ପିଟାଲ ବନ୍ଦ ହେବା ପରେ ଏହାର ଯନ୍ତ୍ରାଂଶକୁ କଟକ ଜିଲାର ୧୪ଟି ସ୍ବାସ୍ଥ୍ୟକେନ୍ଦ୍ରକୁ ବଣ୍ଟନ କରିବାକୁ ନିଷ୍ପତି ହୋଇଥିଲା। ୭ଟି ସ୍ବାସ୍ଥକେନ୍ଦ୍ରକୁ ନିଜ ନିଜ ର ଆବଶ୍ୟକତା ଦୃଷ୍ଟିରୁ ଡାକ୍ତରୀ ସାମଗ୍ରୀ ଯୋଗାଇ ଦିଆଯାଇଛି। ବଳକା ଥିବା ଜିନିଷକୁ ଅନ୍ୟ ମେଡିକାଲ ଗୁଡିକୁ ଯୋଗାଇ ଦିଆଯିବ। ତେବେ ଅସ୍ଥାୟୀ ଘର ଗୁଡିକୁ କ’ଣ କରାଯିବ ସେନେଇ ନିଷ୍ପତ୍ତିି ହୋଇନାହିଁ।