କଟକ ଅଫିସ,୨୯।୯:କଟକ ମହାନଗର ନିଗମ ଅଧୀନ ୫୯ ନମ୍ବର ୱାର୍ଡର ଅନେକ ବାସିନ୍ଦା ୨୦୧୭ ଡିସେମ୍ବର ୨୯ରେ ପ୍ରଧାନମନ୍ତ୍ରୀ ଆବାସ ଯୋଜନାରେ ପକ୍କାଘର ନିର୍ମାଣ ପାଇଁ କାର୍ଯ୍ୟାଦେଶ ପାଇଥିଲେ। ଏହାପରେ ସେମାନେ ନିଜ ଅର୍ଥରେ ଘର ନିର୍ମାଣ ଆରମ୍ଭ କରିଥିଲେ। ଘର କରିବାର କିଛି ଦିନ ପରେ ଟଙ୍କା ମିଳିବ ବୋଲି କୁହାଗଲା। ତେବେ ଇତିମଧ୍ୟରେ ଦୀର୍ଘ ୨ବର୍ଷରୁ ଊର୍ଦ୍ଧ୍ୱ ବିତିଗଲାଣି। କିନ୍ତୁ ସମ୍ପୃକ୍ତ ହିତାଧିକାରୀଙ୍କୁ ଆବାସ ଯୋଜନାରେ ଟଙ୍କାଟିଏ ବି ମିଳି ନାହିଁ। ଏ ନେଇ ସିଏମ୍ସିରେ ବାରମ୍ବାର ଜଣାଇ ନିରାଶ ହେବାକୁ ପଡ଼ିଛି। ତେଣୁ ହିତାଧିକାରୀମାନେ ସିଏମସି କାର୍ଯ୍ୟାଳୟ ଆଗରେ ଅନଶନରେ ବସିବେ ବୋଲି କହିଛନ୍ତି।
ସୂଚନା ଅନୁଯାୟୀ, ୫୯ ନମ୍ବର ୱାର୍ଡ ମୁଗଭଙ୍ଗା ଅଞ୍ଚଳର ଗୀତା ଦାସ ୨୦୧୭ ଡିସେମ୍ବର ୨୯ରେ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ନିର୍ମାଣ ଲାଗି କାର୍ଯ୍ୟାଦେଶ ପାଇଥିଲେ। ସେ ପ୍ରଥମେ ନିଜ ସଞ୍ଚିତ ଟଙ୍କା ଖର୍ଚ୍ଚ କରି କାମ ଆରମ୍ଭ କରିଥିଲେ। ସରକାରୀ ଅଫିସରମାନେ ଘର ପରିଦର୍ଶନରେ ଆସି ଖୁବଶୀଘ୍ର ଟଙ୍କା ମିଳିବ ବୋଲି କହିଥିଲେ। ମାତ୍ର ଘର ନିର୍ମାଣ ଲାଗି ଧାର କରଜ କରିଥିବା ଟଙ୍କା ଶୁଝି ନ ପାରି ଗୀତାଙ୍କ ସ୍ବାମୀ ବାବୁଲି ଦାସ ପ୍ରାଣ ହରାଇଲେ। ଏହାପରେ ଗୀତା ସିଏମସି ଅଧିକାରୀଙ୍କୁ ଭେଟି ଗୁହାରି ଜଣାଇଥିଲେ। ମାତ୍ର ପଦକ୍ଷେପ ନିଆଗଲା ନାହିଁ। ସେହିପରି ଉକ୍ତ ୱାର୍ଡର ଅନ୍ୟଜଣେ ହିତାଧିକାରୀ ରଞ୍ଚୁ ଦାସ। ତାଙ୍କୁ ମଧ୍ୟ ଗତ ୨୦୧୭ ଡିସେମ୍ବରରେ ଘର ପାଇଁ କାର୍ଯ୍ୟାଦେଶ ମିଳିଥିଲା। ନିର୍ମାଣର କିଛି ଦିନ ପରେ ପ୍ରଥମ ପର୍ଯ୍ୟାୟରେ ୪୦ ହଜାର ଟଙ୍କା ମିଳିଲା। କିନ୍ତୁ ପରେ ଆଉ ଟଙ୍କା ନ ମିଳିବାରୁ ଘର ଅଧପନ୍ତରିଆ ହୋଇପଡ଼ି ରହିଲା। ଏ ନେଇ ହିତାଧିକାରୀ ଦ୍ୱୟ ସୋମବାର ସିଏମ୍ସି କମିଶନର ଅନନ୍ୟା ଦାସଙ୍କୁ ଭେଟି ଦାବିପତ୍ର ଦେଇଛନ୍ତି। ଆଗାମୀ ୭ଦିନ ମଧ୍ୟରେ ପ୍ରାପ୍ୟ ଅର୍ଥ ନ ମିଳିଲେ ସେମାନେ ପରିବାର ସହ ସିଏମ୍ସି କାର୍ଯ୍ୟାଳୟ ସମ୍ମୁଖରେ ଧାରଣା ଦେବେ ବୋଲି କହିଛନ୍ତି। ଅନ୍ୟପକ୍ଷରେ ସିଏମ୍ସି କମିଶନର ଦାସ କହିଛନ୍ତି, ଏ ବିଷୟରେ ସମ୍ପୃକ୍ତ ହିତାଧିକାରୀ ମୋତେ ଅବଗତ କରାଇଛନ୍ତି। କେଉଁ କାରଣ ଯୋଗୁ ସେମାନଙ୍କୁ ଟଙ୍କା ଦିଆଯାଇନାହିଁ ତାହାର ତଦନ୍ତ ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।