କଳିଙ୍ଗନଗର,୧୮ା୫(ଡି.ଏନ.ଏ.): ଯାଜପୁର ଜିଲା ବ୍ୟାସନଗରସ୍ଥିତ ସେନ୍କୋ ଜୁଏଲେରି ଶୋ’ରୁମ୍ ଲୁଟ୍ ଘଟଣାକୁ ବୁଧବାର ୩ ଦିନ ବିତିଛି। ହେଲେ ଡକାୟତମାନଙ୍କୁ ଠାବ କରିବାରେ ପୋଲିସ ବିଫଳ ହୋଇଛି । ମଙ୍ଗଳବାର ପୋଲିସ ଅଭିଯୁକ୍ତମାନଙ୍କ ଫଟୋ ଜାରି କରିବା ସହିତ ସୂଚନାଦାତାଙ୍କୁ ପୁରସ୍କାର ଦେବାକୁ ଘୋଷଣା କରିଥିଲା।ଏଥିପାଇଁ ୭ ପୃଥକ୍ ଟିମ୍ ଗଠନ କରାଯାଇ ତନାଘନା ଚାଲିଛି ା ଉକ୍ତ ଟିମ୍ ବିଭିନ୍ନ ଅଞ୍ଚଳକୁ ଯାଇ ସିସିଟିଭି ଫୁଟେଜକୁ ଆଧାର କରି ଖୋଳତାଡ ଚଳାଇଛି । ବୁଧବାର କେନ୍ଦ୍ରାଞ୍ଚଳ ଆଇଜି ନରସିଂହ ଭୋଳ ଶୋ’ରୁମକୁ ଆସି ଘଟଣାର ତଦନ୍ତ କରିବା ସହିତ ସ୍ଥିତି ସମ୍ପର୍କରେ ଅନୁଧ୍ୟାନ କରିଛନ୍ତି । ଖୁବ୍ଶୀଘ୍ର ପୋଲିସ ହାତରେ ଡକାୟତମାନେ ଧରାପଡିବେ ବୋଲି ସେ ପ୍ରତିଶ୍ରୁତି ଦେଇଛନ୍ତି । ସହରର ବିଭିନ୍ନ ସୁନା ଅଳଙ୍କାର ବ୍ୟବସାୟୀ ମଧ୍ୟ ଆଇଜିଙ୍କୁ ଭେଟି ଉକ୍ତ ଘଟଣାକୁ ନେଇ ଚିନ୍ତାବ୍ୟକ୍ତ କରିଛନ୍ତି ା ଡକାୟତମାନଙ୍କୁ ଗିରଫ କରିବା ସହିତ ଲୁଟ ଅଳଙ୍କାର ଜବତ କରିବାକୁ ସେମାନେ ଅନୁରୋଧ କରିଛନ୍ତି । ସୁନା ବ୍ୟବସାୟୀଙ୍କୁ ସୁରକ୍ଷା ପାଇଁ ଅତିରିକ୍ତ ଥାନା ଖୋଲିବାକୁ ଉକ୍ତ ବ୍ୟବସାୟୀମାନେ ଦାବି କରିଛନ୍ତି ।
ଏହି ଡକାୟତ ସମ୍ପର୍କରେ ଅନୁଧ୍ୟାନ ପାଇଁ ବୁଧବାର ଯାଜପୁର ଏସ୍ପି ଭିନିତ ଅଗ୍ରଓ୍ବାଲ ଓ ଆଇଜି ଭୋଳ ପ୍ରଥମେ ଯାଜପୁର ରୋଡ ଥାନାକୁ ଯାଇ ସେଠାରୁ ଜୁଏଲେରି ଶୋ’ରୁମକୁ ଆସିଥିଲେ । ଶୋ’ରୁମରେ ମାଲିକ ଏବଂ କର୍ମଚାରୀଙ୍କୁ ଘଟଣା ସମ୍ପର୍କରେ ପଚାରି ବୁଝିଥିଲେ । ଡକାୟତମାନେ ପ୍ରାୟ ସମସ୍ତ ସିସିଟିଭି କ୍ୟାମେରା ଓ କମ୍ପ୍ୟୁଟର ହାର୍ଡଡିସ ଖୋଲି ନେଇଥିଲେ। ମାତ୍ର ଗୋଟିଏ ହାର୍ଡଡିସ ସୁରକ୍ଷିତ ଥିବାରୁ ତାହାକୁ ଆଧାର କରି କିଛି ସିସିଟିଭି ଫୁଟେଜ ସଂଗ୍ରହ କରିଥିଲା ପୋଲିସ । ପରେ ତଳେ ଥିବା ହିରୋ ଶୋ’ରୁମ, ସମ୍ମୁଖରେ ଥିବା ପେଟ୍ରୋଲ ପମ୍ପ, ନିକଟସ୍ଥ ଷ୍ଟେଟବ୍ୟାଙ୍କ ଆଦିର ସିସିଟିଭି ଫୁଟେଜ ଯାଞ୍ଚ କରୁଛି ପୋଲିସ। ଯାହାକୁ ଆଧାର କରି ପୋଲିସକୁ ଆଉ କିଛି ଅଧିକ ତଥ୍ୟ ମିଳିଥିବା ଅନୁମାନ କରାଯାଉଛି। ତେବେ ସେମାନେ ଆନ୍ତଃରାଜ୍ୟ ଡକାୟତ ଏବଂ ପଶ୍ଚିମବଙ୍ଗ ସହ ଲିଙ୍କ ଥିବା ଅନୁମାନ କରିଛି ପୋଲିସ। ପୋଲିସ ପୂର୍ବରୁ ୪ ଟି ଟିମ ଗଠନ କରି ତଦନ୍ତ ପାଇଁ ପଠାଇଥିବା ବେଳେ ମଙ୍ଗଳବାର ରାତିରେ ଆଉ ୩ ଟିମ୍ ରାଜ୍ୟ ତଥା ରାଜ୍ୟ ବାହାରକୁ ପଠାଇଛି।