ଜଗତ୍ସିଂହପୁର ଅଫିସ,୫।୫:୨୦୧୯ରେ ଫନୀ ବାତ୍ୟାରେ ଜଗତ୍ସିଂହପୁର ସମେତ ମୋଟ ୧୦ ଜିଲା ପ୍ରଭାବିତ ହୋଇଥିଲା। ବାତ୍ୟା ପରେ ରାଜ୍ୟ ସରକାର କ୍ଷତିଗ୍ରସ୍ତ ଚାଷୀଙ୍କୁ ସହାୟତା ଦେବେ ବୋଲି ଘୋଷଣା କରିଥିଲେ। ଇତିମଧ୍ୟରେ ୪ ବର୍ଷ ଅତିକ୍ରାନ୍ତ ହୋଇ ଯାଇଥିଲେ ସୁଦ୍ଧା ଜିଲାର ସହସ୍ରାଧିକ ଚାଷୀ ବିପର୍ଯ୍ୟୟ ସହାୟତା ପାଇପାରିଲେ ନାହିଁ। ଏନେଇ ଅସନ୍ତୋଷ ବୃଦ୍ଧି ପାଇବାରେ ଲାଗିଛି । ଆଗକୁ ଆଉ ଏକ ବାତ୍ୟା ଆଶଙ୍କା ଥିବାରୁ ଚାଷୀକୁଳ ଭୟରେ ଦିନ କାଟୁଛନ୍ତି। ଏହା ଜିଲା ପ୍ରଶାସନର ଅପାରଗତାକୁ ପାଦରେ ପକାଇଛି ବୋଲି ନବ ନିର୍ମାଣ କୃଷକ ସଙ୍ଗଠନ ପକ୍ଷରୁ ଅଭିଯୋଗ କରାଯାଇଛି। ଆଗାମୀ ଦିନରେ ଚାଷୀଙ୍କୁ ନ୍ୟାୟ ନ ମିଳିଲେ ଆନ୍ଦୋଳନାତ୍ମକ ପଦକ୍ଷେପ ନିଆଯିବ ବୋଲି ସଙ୍ଗଠନର ରାଜ୍ୟ ସହ ସଂଯୋଜକ ରଶ୍ମିରଞ୍ଜନ ସ୍ବାଇଁ ଚେତାବନୀ ଦେଇଛନ୍ତି।
ସ୍ବାଇଁ କହିଛନ୍ତି, ଫନୀ ପ୍ରଭାବରେ ଜିଲାର ବହୁ ସଂଖ୍ୟକ ବାସଗୃହ, ଗୁହାଳ, ଉଦ୍ୟାନ କୃଷି କ୍ଷତିଗ୍ରସ୍ତ ହୋଇଥିଲା। ଜିଲାର ୧୮୩ ପଞ୍ଚାୟତର ୧୦୫୦ ରାଜସ୍ବ ଗ୍ରାମ ଓ ଗୋଟିଏ ପୌର ପରିଷଦର ମୋଟ ୨୨୨୪୫.୪୪ ହେକ୍ଟର ଚାଷ ଜମି ପ୍ରଭାବିତ ହୋଇଥିଲା ବୋଲି ଆକଳନରୁ ଜଣାଯାଇଥିଲା। ଏ ପରିପ୍ରେକ୍ଷୀରେ ବିପର୍ଯ୍ୟୟ କ୍ଷୟକ୍ଷତିର ଠିକ୍ ଆକଳନ ସହ କ୍ଷତିଗ୍ରସ୍ତଙ୍କୁ ଠିକଣା ସମୟରେ ଉପଯୁକ୍ତ ସହାୟତା ରାଶି ପ୍ରଦାନ ପାଇଁ ଦାବି ହୋଇଥିଲା। ଜିଲାପାଳଙ୍କ ପକ୍ଷରୁ କ୍ଷେତ୍ର ପରିଦର୍ଶନ ରିପୋର୍ଟ ରାଜସ୍ବ ଓ ବିପର୍ଯୟ ପରିଚାଳନା ବିଭାଗରେ ପହଞ୍ଚତ୍ଲା ପରେ ସ୍ବତନ୍ତ୍ର ରିଲିଫ କମିଶନରଙ୍କ ପକ୍ଷରୁ ସରକାରୀ ବିଜ୍ଞପ୍ତି ପ୍ରକାଶ ପାଇଥିଲେ ମଧ୍ୟ ଏ ପର୍ଯ୍ୟନ୍ତ ସମସ୍ତ କ୍ଷତିଗ୍ରସ୍ତ ଚାଷୀଙ୍କୁ ସହାୟତା ରାଶି ମିଳିପାରିନାହିଁ। ଏ ସମ୍ପର୍କରେ ଜିଲା ମୁଖ୍ୟ କୃଷି ଅଧିକାରୀ ନବ କିଶୋର ମହାପାତ୍ରଙ୍କୁ ପଚାରିବାରୁ,ସେ ନୂତନ ଭାବେ କାର୍ଯ୍ୟରେ ଯୋଗଦେଇଛନ୍ତି। ବାସ୍ତବସ୍ଥିତି ଉପରେ ସମ୍ପୂର୍ଣ୍ଣଭାବେ ଅବଗତ ନାହାନ୍ତି। ତଥାପି କେତେଜଣ କ୍ଷତିଗ୍ରସ୍ତ ସହାୟତା ପାଇନାହାନ୍ତି ତାହାବୁଝି ପରବର୍ତ୍ତୀ ପଦକ୍ଷେପ ନେବେ ବୋଲି କହିଛନ୍ତି। ଏ ସମ୍ପର୍କରେ ଉଦ୍ୟାନ କୃଷି ସହକାରୀ ନିର୍ଦ୍ଦେଶକ ପ୍ରଦୀପ କୁମାର ବଳ କହିଛନ୍ତି, ପ୍ରକୃତରେ ଅନେକ ଚାଷୀ ସହାୟତା ରାଶିପାଇନାହାନ୍ତି। ତେଣୁ ସେମାନଙ୍କୁ ସହାୟତା ମିଳିବା ପାଇଁ ବିଭାଗୀୟ ନିର୍ଦ୍ଦେଶକଙ୍କୁ ଅବଗତ କରାଯାଇଛି।