କର୍ଲାମୁଣ୍ଡା,୩ା୧୨(ଡି.ଏନ୍.ଏ.): କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକରେ ଥିବା ୩ ଟି ପ୍ରାଥମିକ କୃଷି ସମବାୟ ସମିତି ଜରିଆରେ ସିଧାସଳଖ ଭାବେ ଚାଷୀଙ୍କଠାରୁ ଧାନ କ୍ରୟ ପାଇଁ ମଣ୍ଡିଗୁଡ଼ିକୁ ସ୍ଥାନୀୟ ତହସିଲଦାର ମିଳନ କୁମାର ଝାଙ୍କର ଉଦ୍ଘାଟନ କରିଥିଲେ। ତେବେ ଉଦ୍ଘାଟନ ହେବାର ୪୮ଘଣ୍ଟା ବିତିଥିଲେ ହେଁ ମଣ୍ଡିଗୁଡ଼ିକରେ ପଡ଼ିଥିବା ଚାଷୀଙ୍କ ଧାନ ବର୍ତ୍ତମାନ ସୁଦ୍ଧା ଉଠି ନ ଥିବା ଓ ମିଲ୍ ମାଲିକମାନେ କ୍ୱିଣ୍ଟାଲ ପିଛା ୭ କେଜି କଟ୍ନୀ ପାଇଁ ଅଡ଼ି ବସିଥିବାରୁ ଏପରି ପରିସ୍ଥିତି ସୃଷ୍ଟି ହୋଇ ଥିବା ଚାଷୀ ଲିଙ୍ଗରାଜ ସାହୁ ଅଭିଯୋଗ କରିଛନ୍ତି। ଏନେଇ ତହସିଲଦାର ମିଳନ କୁମାର ଝାଙ୍କରଙ୍କୁ ପଚାରିବାରୁ ଏ ବିଷୟରେ ମୋ ପାଖରେ ସୁଚନା ନାହିଁ ବୋଲି କହିଥିବା ବେଳେ କର୍ଲାମୁଣ୍ଡା ସମବାୟ ସମିତିର ସମ୍ପାଦକ ଭବାନୀ ଶଙ୍କର ସାହୁ ଏହି ସମସ୍ୟା ବିଷୟରେ ସମସ୍ତଙ୍କୁ ସୂଚନା ଦେଇଥିବା ପ୍ରକାଶ କରିଛନ୍ତି।
ସୂଚନାଯୋଗ୍ୟ, କର୍ଲାମୁଣ୍ଡା ମଣ୍ଡିରେ ୧୦ ଜଣ ଚାଷୀଙ୍କ ୧୦୨୭ ବସ୍ତା ଧାନ, ଜୋରାଡବରା ସମବାୟ ସମିତିର ମଣ୍ଡିରେ ୧୩ ଜଣ ଚାଷୀଙ୍କ ୧୨୫୨ ବସ୍ତା ଧାନ ପଡ଼ି ରହିଥିବା ଦେଖିବାକୁ ମିଳିଛି।