ଭବାନୀପାଟଣା,୧୨।୯(ଉତ୍ତମ କୁମାର ଦାଶ): ଗୋଟେ ବର୍ଷ ନୁହଁ କି ୨ ବର୍ଷ ନୁହଁ। ଦୀର୍ଘ ୭୨ ବର୍ଷର ପୌରପାଳିକାର ନିଜସ୍ବ କାର୍ଯ୍ୟାଳୟ ଗୃହ ନ ଥିବା ସାଧାରଣରେ ଏବେ ଚର୍ଚ୍ଚାର ବିଷୟ। ପୌରପାଳିକା ସ୍ଥାପନରୁ ବର୍ତ୍ତମାନ ଯାଏଁ ରାଜୁଡା ଅମଳର ନିର୍ମିତ ଏକ କୋଠାରେ ଚାଲିଛି ଏହି କାର୍ଯ୍ୟାଳୟ। ଯାହାକି ଏବେ ବିପଦସଙ୍କୁଳ ଅବସ୍ଥାରେ ରହିଛି। ଏଭଳି ଦୃଶ୍ୟ ଦେଖିବାକୁ ମିଳିଛି କଳାହାଣ୍ଡି ଜିଲା ଭବାନୀପାଟଣା ପୌରପାଳିକାରେ। ଭବାନୀପାଟଣା ପୌରପାଳିକା ୧୯୫୧ରେ ସ୍ଥାପନ ହୋଇଥିବାବେଳେ ବର୍ତ୍ତମାନ ଯାଏଁ ୩୫ଜଣ ଅଧ୍ୟକ୍ଷା/ଅଧ୍ୟକ୍ଷ ପଦବୀ ନିର୍ବାଚିତ ହୋଇଥିବା ଓ ଅଧିକାରୀ ଦାୟିତ୍ୱରେ ରହିଥିବା ସୂଚନା ଫଳକରୁ ଜଣାପଡିଛି। ରାଜ୍ୟର ପୁରାତନ ପୌରପାଳିକାରେ ଭବାନୀପାଟଣା ସହର ନାମ ମଧ୍ୟ ରହିଛି। ଭବାନୀପାଟଣା ପୌରପାଳିକାରେ ୨୦ଟି ୱାର୍ଡ ରହିଥିବାବେଳେ ସହରର ଜନସଂଖ୍ୟା ପାଖାପାଖି ଚଳିତବର୍ଷର ରିପୋର୍ଟ ଅନୁଯାୟୀ ୯୦ ହଜାରରୁ ଟପିଲାଣି। ଗତ ଦିନରେ ପୌରପାଳିକା ପକ୍ଷରୁ ସହରରେ ବିଭିନ୍ନ ଯୋଜନାରେ ଅନେକ ଉନ୍ନତିମୂଳକ କାର୍ଯ୍ୟ କରାଯିବା ସହ ଏଥିପାଇଁ କୋଟି କୋଟି ଟଙ୍କା ମଧ୍ୟ ଖର୍ଚ୍ଚ ହୋଇସାରିଲାଣି। ହେଲେ ଏହି ୭୨ ବର୍ଷର ପୌରପାଳିକାର ବର୍ତ୍ତମାନ ଯାଏଁ ନିଜସ୍ବ କୋଠା ନ ହୋଇପାରିବା ଦୁଃଖ ଓ ପରିତାପର ବିଷୟ। ଏହା ପ୍ରଶାସନିକ ଅବହେଳା ନା ପୌରପାଳିକାର ଅବହେଳା ତାହାକୁ ନେଇ ସାଧାରଣରେ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି। ପୌରପାଳିକା ଆରମ୍ଭରୁ ବର୍ତ୍ତମାନ ଯାଏଁ ଯେଉଁ କୋଠାରେ ଏହି କାର୍ଯ୍ୟାଳୟ ଚାଲୁଛି ତାହା କଳାହାଣ୍ଡି ରାଜା ରାଜୁଡା ଶାସନ ସମୟର ହୋଇଥିବା ଜଣାପଡିଛି। ଏହି କୋଠାଟିକୁ ତକତ୍ାଳୀନ ରାଜା ନିର୍ମାଣ କରିଥିବାବବେଳେ ଏହି କୋଠାରେ ରାଜା ବିଲିଆଡ୍ସ ଖେଳ ଖେଳିବା ପାଇଁ ଓ ଲାଇବ୍ରେରୀ ରୁମ ପାଇଁ ନିର୍ମିତ ହୋଇଥିଲା ବୋଲି ସ୍ଥାନୀୟ ଲୋକଙ୍କଠୁ ଜଣାପଡିଛି। ଦେଶ ସ୍ବାଧୀନତା ଆଗରୁ ନିର୍ମିତ ହୋଇଥିବା ଏହି କୋଠାଟି ବର୍ତ୍ତମାନ ବିପଦସଙ୍କୁଳ ଅବସ୍ଥାରେ ରହିଥିବା ପାରିପାର୍ଶ୍ୱିକ ଚିତ୍ରରୁ ଦେଖିବାକୁ ମିଳିଛି। ବର୍ଷା ହେଲେ ଛାତରୁ ପାଣି ଗଳୁଥିବାବେଳେ ଓ ସିମେଣ୍ଟ ଚଟାଣଗୁଡିକ ମଧ୍ୟ ପଡିଯାଉଥିବା ଜଣାପଡିଛି। ଫଳରେ ଅଫିସ କାମରେ ବେଳେ ବେଳେ ବାଧା ମଧ୍ୟ ସୃଷ୍ଟି ହେଉଥିବା ନିଜର ରହିଛି। ସିମେଣ୍ଟ ଖଣ୍ଡ ପଡିଯାଇଥିବା ସ୍ଥାନରେ ଲୁହା ରଡଗୁଡିକ ଜଳ ଜଳ ହୋଇ ଦେଖାଯାଉଛି। ବିଭିନ୍ନ ସମୟରେ ଛାତରୁ ସିମେଣ୍ଟ ଖଣ୍ଡଗୁଡିକ ପଡୁଥିବାରୁ ତଳେ ବସୁଥିବା ଅଧିକାରୀ, କର୍ମଚାରୀଙ୍କ ପ୍ରତି ମଧ୍ୟ ବିପଦ ରହିଛି। କୋଠାର ଅବସ୍ଥା ଯେକୌଣିସି ଲୋକ ଦେଖିଲେ ମଧ୍ୟ ଏହା ବିପଦସଙ୍କୁଳ ଅବସ୍ଥାରେ ରହିଛି ବୋଲି କହିବ। ଏ ନେଇ ଭବାନୀପାଟଣା ପୌରଧ୍ୟକ୍ଷା ସଂଯୁକ୍ତା ବେହେରାଙ୍କୁ ପଚାରିବାରୁ ନୂତନ କାର୍ଯ୍ୟାଳୟ କୋଠା ପାଇଁ ସହରରେ ସ୍ଥାନ ଚିହ୍ନଟ ହୋଇସାରିଛି। ସେହିପରି ନୂତନ କୋଠା ପାଇଁ ପ୍ରସ୍ତାବ ଯାଇଥିବାବେଳେ ଖୁବଶୀଘ୍ର ଅନୁମୋଦନ ହୋଇ ଆସିଲେ କୋଠା କାମ ନିର୍ମାଣ କରାଯିବ ବୋଲି କହିଥିଲେ।