ଲଣ୍ଡନ,୬।୨: ଅଫିସ କ୍ୟାଣ୍ଟିନରୁ ସାଣ୍ଡୱିଚ୍ ଚୋରି କରିବା ପଡ଼ିଲା ମହଙ୍ଗା। ଏଭଳି ଏକ ଆଶ୍ଚର୍ଯ୍ୟଜନକ ଘଟଣା କେନରି ୱାର୍ଫରେ ଥିବା ସିଟିବ୍ୟାଙ୍କ ୟୁରୋପୀୟ ମୁଖ୍ୟାଳୟରୁ ଆସିଛି। ମିଳିଥିବା ସୂଚନାନୁଯାୟୀ, ଲଣ୍ଡନରେ ଥିବା ଏକ ଅଫିସ କ୍ୟାଣ୍ଟିନରୁ ସାଣ୍ଡୱିଚ୍ ଚୋରି କରିଥିବାରୁ ହାଇ ପ୍ରୋଫାଇଲ ଭାରତୀୟ ବ୍ୟାଙ୍କର ପାରସ ଶାହାଙ୍କୁ ଚାକିରିରୁ ବରଖାସ୍ତ କରିଦିଆଯାଇଛି। ପାରସ ଶାହାଙ୍କ ବାର୍ଷିକ ଦରମା ପ୍ରାୟ ୯.୨ କୋଟି ଟଙ୍କା ଥିଲା। ବ୍ୟାଙ୍କର ଏଭଳି କାର୍ଯ୍ୟାନୁଷ୍ଠାନ ପରେ ଏହା ଶାହାଙ୍କ ପ୍ରତିଷ୍ଠାକୁ କ୍ଷତି ପହଞ୍ଚାଉଥିବା କିଛି ଲୋକେ କହୁଥିବା ବେଳେ ଆଉ କେତେକ ବ୍ୟାଙ୍କ ପରିଚାଳନାର କଠୋର ମନୋଭାବକୁ ପ୍ରଶଂସା କରୁଛନ୍ତି।
ଶାହା ୨୦୧୦ରେ ବାଥ ବିଶ୍ୱବିଦ୍ୟାଳୟରୁ ଅର୍ଥନୀତିରେ ଡିଗ୍ରୀ ହାସଲ କରିଥିଲେ। ଏହା ପରେ ସେ ଏଚ୍ଏସ୍ବିସିର ଫିକ୍ସଡ ଇନକମ ଟ୍ରେଡିଂ ବିଭାଗରେ ଥିଲେ। ପରେ ୨୦୧୭ରେ ସିଟିବ୍ୟାଙ୍କ ଗ୍ରୁପରେ ସେ ଯୋଗ ଦେଇଥିଲେ। ସୂଚନା ଅନୁଯାୟୀ, ପାରସ ଶାହାଙ୍କ ବିରୋଧରେ ଏହା ପ୍ରଥମ ମାମଲା ନୁହେଁ। ଏହାପୂର୍ବରୁ ମଧ୍ୟ ତାଙ୍କ ନାଁରେ ଚୋରି ଅଭିଯୋଗ ହୋଇଛି।
