ମାଲକାନଗିରି,୧୭ା୭(ଦୁର୍ଯ୍ୟୋଧନ ପାତ୍ର): ମାଲକାନଗିରି ଜିଲା ସଦର ମହକୁମାଠାରୁ ୫ କି.ମି.ଦୂର ସତୀଗୁଡା ଜଳଭଣ୍ଡାରକୁ ଲାଗି ପ୍ରାକୃତିକ ପର୍ଯ୍ୟଟନ ସ୍ଥଳି ରହିଛି। ମାଲକାନଗିରି-ଜୟପୁର ଜାତୀୟ ରାଜପଥ ଡ୍ୟାମ୍ ସାଇଡ୍ ଛକଠାରୁ ପର୍ଯ୍ୟଟନ ସ୍ଥଳୀ ଯିବା ପାଇଁ ୫ କି.ମି.ରାସ୍ତା ୪ ବର୍ଷ ହେଲା ଶୋଚନୀୟ ହୋଇପଡିଛି। ବହୁବର୍ଷ ପୂର୍ବେ ଡ୍ୟାମ୍ସାଇଡ ଛକଠାକୁ ଏମ୍.ଭି. ୧୧୧ ପର୍ଯ୍ୟନ୍ତ ଅଣ ଓସାରିଆ ପିଚୁ ରାସ୍ତା ହୋଇଥିଲେ ମଧ୍ୟ ତାହା ନଷ୍ଟ ହୋଇଯାଇଛି। ଡ୍ୟାମ ଉପର ଦେଇ ପାର୍କକୁ ଯିବା ରାସ୍ତା ମଧ୍ୟ ଖାଲ ଖମାରରେ ଭର୍ତ୍ତି ହୋଇ ରହିଛି। ଏମ୍.ଭି. ୧୧୧ରୁ ଡ୍ୟାମ୍ ତଳ ରାସ୍ତା କାଦୁଅ ଏବଂ ବର୍ଷା ପାଣି ଜମି ରହିଛି। ଯାହାଦ୍ୱାରା ଚାଲି ଯିବା ମଧ୍ୟ ସମ୍ଭବ ହେଉନି। ଏହି ପାର୍କ ସିନ୍ଧ୍ରିମାଳ ପଞ୍ଚାୟତ ଅଧୀନରେ ଥିବା ବେଳେ ସରପଞ୍ଚ ଘାସି ନାୟକ ଏବଂ ସେହି ପଞ୍ଚାୟତ ଗ୍ରାମବାସୀ ଏହି ରାସ୍ତାର ପୁନଃ ନିର୍ମାଣ ପାଇଁ ବିଭିନ୍ନ ସମୟରେ ପ୍ରଶାସନ ଓ ରାଜ୍ୟ ସରକାରଙ୍କ ଦୃଷ୍ଟି ଆକର୍ଷଣ କରିଛନ୍ତି। କେବଳ ତିଆରି କରାଯିବ ବୋଲି ପ୍ରତିଶ୍ରୁତି ମିଳିଛି, କିନ୍ତୁ ୫ ବର୍ଷ ହେଲା କାମ ହେଉନାହିଁ। ମାର୍ଚ୍ଚ ୨୯ରେ ୫-ଟି ସଚିବ ଭି.କେ. ପାଣ୍ଡିଆନ୍ ପ୍ରାକୃତିକ ପର୍ଯ୍ୟଟନସ୍ଥଳୀ ପରିଦର୍ଶନ ସହ ଏହାର ଉନ୍ନତି କରାଯିବ ବୋଲି କହିଥିଲେ। ଉକ୍ତ ଦିନ ପଞ୍ଚାୟତବାସୀ ୫-ଟି ସଚିବଙ୍କୁ ଏହି ରାସ୍ତା ସମ୍ବନ୍ଧରେ ଅବଗତ ସହ ଏକ ଲିଖିତ ଅଭିଯୋଗ କରିଥିଲେ।
କିନ୍ତୁ ସଚିବଙ୍କ ଗସ୍ତପରେ ମାଲକାନଗିରି ଜିଲାକୁ ଶିକ୍ଷା ବିଭାଗ, ବିଭିନ୍ନ ଧର୍ମାନୁଷ୍ଠାନକୁ ଅର୍ଥ ମଞ୍ଜୁର ହୋଇଥିବା ବେଳେ ଉକ୍ତ ରାସ୍ତା ପାଇଁ ଅଦ୍ୟାବଧି କୌଣସି ଅର୍ଥ ମଞ୍ଜୁର ହୋଇନାହିଁ । ରାସ୍ତା କେବ ହେବ ଅଞ୍ଚଳବାସୀ ଅପେକ୍ଷା କରିଛନ୍ତି ବୋଲି ସରପଞ୍ଚ ଘାସି ନାୟକ ଓ ଯୁବ ନେତା ସଦାନନ୍ଦ ଖରା କହିଛନ୍ତି।