ଭୁବନେଶ୍ୱର,୩।୨(ବ୍ୟୁରୋ):ଭୁବନେଶ୍ୱର ମହାନଗର ନିଗମ (ବିଏମ୍ସି) ପକ୍ଷରୁ ଘାଟିକିଆରେ ଅତ୍ୟାଧୁନିକ ମାଂସ ମାର୍କେଟ ଖୋଲାଯାଇଛି। ଏଠାରେ ଆବଶ୍ୟକ ବ୍ୟବସ୍ଥା କରାଯିବା ସହ ବ୍ୟବସାୟୀଙ୍କୁ ଏସି, ଡିପ୍ ଫ୍ରିଜର୍ ଓ ମାଂସ କାଟିବା ପାଇଁ ହତିଆର ଯୋଗାଇ ଦିଆଯାଇଛି। ଏହା କାର୍ଯ୍ୟକ୍ଷମ ହେଲେ ନାକାଗେଟ୍, ରେଣ୍ଟାଲ, ଷ୍ଟୁଡିଓ ଛକ ଓ ଘାଟିକିଆ ଅଞ୍ଚଳରେ ରାସ୍ତାକଡ଼ରେ ଚାଲିଥିବା ମାଂସ ବେପାର ବନ୍ଦ ହୋଇଯିବ ବୋଲି ଆଶା କରାଯାଉଥିଲା। ହେଲେ ସେପରି କିଛି ହେଲା ନାହିଁ। ବ୍ୟବସାୟୀମାନେ ଏହି ମାର୍କେଟରେ ଦୋକାନ ଘର ପାଇ ମଧ୍ୟ ପୂର୍ବପରି ରାସ୍ତାକଡ଼ରେ ମାଂସ କାଟି ବିକୁଛନ୍ତି।
ଭରତପୁରସ୍ଥିତ ଆୟୁର୍ବିଜ୍ଞାନ ପ୍ରତିଷ୍ଠାନ ସମ୍ମୁଖରେ ଏହି ବ୍ୟବସାୟୀମାନେ ମଟନ ବେପାର ଜାରି ରଖିଛନ୍ତି। ବିଶେଷକରି ବୁଧବାର, ଶୁକ୍ରବାର ଓ ରବିବାର ସଂପୃକ୍ତ ରାସ୍ତାରେ ଗ୍ରାହକଙ୍କ ଭିଡ଼ ଜମୁଛି। ବ୍ୟବସାୟୀମାନେ ମାଂସ ମାର୍କେଟରେ ଖାସି ମାରିବା ପରେ ଏଠାକୁ ଆଣି କାଟି ବିକୁଛନ୍ତି। ତେଣୁ ଆଖପାଖ ଅଞ୍ଚଳର ଲୋକମାନେ ମାଂସ ମାର୍କେଟ ଯିବା ପରିବର୍ତ୍ତେ ପୂର୍ବପରି ରାସ୍ତାକଡ଼ରୁ ମାଂସ କିଣି ନେଉଛନ୍ତି। ସମାନ ଚିତ୍ର ମଧ୍ୟ ଘାଟିକିଆ ସିଇଟି କଲେଜ୍ ରୋଡ୍ରେ ଦେଖିବାକୁ ମିଳୁଛି। ଆମିଷ ବାରରେ ପୂର୍ବପରି ସେଠାରେ ଜମୁଛି ବେପାର। ଟ୍ରାଫିକ୍ ସମସ୍ୟା ସୃଷ୍ଟି ହେବା ଫଳରେ ଯାନବାହନ ଚଳାଚଳ ବାଧାପ୍ରାପ୍ତ ହେଉଛି। ସବୁଠାରୁ ଉଦ୍ବେଗଜନକ ପ୍ରସଙ୍ଗ ହେଉଛି, ଆମ୍ବୁଲାନ୍ସ ମଧ୍ୟ ଅନେକ ସମୟରେ ଫସି ରହୁଛି। ଏଥିସହ ସହରର ସୌନ୍ଦର୍ଯ୍ୟ ନଷ୍ଟ ହେଉଛି। ଫଳରେ ବିଏମ୍ସିର ଲକ୍ଷ୍ୟ ସାଧନ ହୋଇପାରୁ ନ ଥିବାବେଳେ ବିପୁଳ ଅର୍ଥ ପାଣିରେ ପଡୁଛି।
ଏ ସମ୍ପର୍କରେ ଆମିଷ ବ୍ୟବସାୟୀ ସେକ୍ ମୁଜିବୁର୍ ରେହମାନ କୁହନ୍ତି, ଘାଟିକିଆଠାରେ ଖୋଲାଯାଇଥିବା ମାଂସ ମାର୍କେଟ ସମ୍ପର୍କରେ ଅନେକ ଲୋକ ଜାଣିନାହାନ୍ତି। କେବଳ ଲୋକଙ୍କୁ ସୂଚନା ଦେବା ପାଇଁ ଆମେ କିଛିଦିନ ପୂର୍ବ ସ୍ଥାନରେ ବେପାର କରୁଛୁ। ନିୟମିତ ଆସୁଥିବା ଗ୍ରାହକମାନେ ମାଂସ ମାର୍କେଟ ବିଷୟରେ ଅବଗତ ହେବା ପରେ ଆମେ ଏଠାରେ ଆଉ ବ୍ୟବସାୟ କରିବୁ ନାହିଁ। ତେବେ ଲୋକ ଗହଳି ଯେପରି ବେଶି ନ ହେବ ତାହାକୁ ଆମେ ଦୃଷ୍ଟି ଦେଉଛୁ। ଅନ୍ୟଜଣେ ଆମିଷ ବ୍ୟବସାୟୀ ଆୟୁବୁ ଖାନ୍ଙ୍କ କହିବା ଅନୁସାରେ, ଆମେ ଦୋକାନ ଏଠାରେ ଲଗାଇଛୁ, କିନ୍ତୁ ସେପରି ବେପାର କରୁନାହୁଁ। ଗ୍ରାହକଙ୍କୁ ଆମିଷ ବଜାରକୁ ପଠାଉଛୁ। କେହି ଗ୍ରାହକ ଦୂରରୁ ଆସିଥିଲେ କିମ୍ବା ବ୍ୟସ୍ତ ଥିଲେ ସେମାନଙ୍କୁ ଫେରାଉନାହୁଁ। ତେବେ ଆଗକୁ ଏପରି ରାସ୍ତାକଡ଼ରେ ଆଉ ମଟନ୍ କାଟିବେ ନାହିଁ ବୋଲି ସେ କହିଛନ୍ତି।
ସୂଚନାଥାଉକି, ୨୦୧୮ ମସିହାରୁ ନିର୍ମିତ ଏହି ମାଂସ ବଜାର ବିଭିନ୍ନ ସମସ୍ୟା କାରଣରୁ ଖୋଲାଯାଇପାରି ନ ଥିଲା। ଆବଶ୍ୟକ ବ୍ୟବସ୍ଥା ସହ ୨୦୨୨ ଶେଷଆଡ଼କୁ ଏହି ବଜାର କାର୍ଯ୍ୟକ୍ଷମ ହୋଇଥିଲା। ତେବେ ଯେଉଁ ଉଦ୍ଦେଶ୍ୟ ନେଇ ଏହା କାର୍ଯ୍ୟକ୍ଷମ ହୋଇଥିଲା ତାହା ପୂରଣ ହୋଇ ନ ଥିବାରୁ ବିଭିନ୍ନ ମହଲରେ ଅସନ୍ତୋଷ ପ୍ରକାଶ ପାଇଛି।