ଅହମଦାବାଦ,୨୦।୧୧: ଅଷ୍ଟ୍ରେଲିଆ ବିପକ୍ଷ ବିଶ୍ୱକପ ୨୦୨୩ର ଫାଇନାଲରେ ଭାରତକୁ ପରାଜୟର ସମ୍ମୁଖୀନ ହେବାକୁ ପଡିଲା। କଙ୍ଗାରୁ ଭାରତକୁ ୬ଟି ୱିକେଟରେ ପରାସ୍ତ କରିଛି। ଏହି ପରାଜୟ ପରେ ଭାରତୀୟ ଖେଳାଳିମାନେ ଡ୍ରେସିଂ ରୁମକୁ ଯାଇ ସେମାନଙ୍କ ଭାବପ୍ରବଣ ହେବାର ଫଟୋ ମଧ୍ୟ ପ୍ରକାଶ ପାଇଲା। ରୋହିତ ଶର୍ମା, ମହମ୍ମଦ ସିରାଜ ଏବଂ ବିରାଟ କୋହଲିଙ୍କ ସମେତ ସମସ୍ତ ଖେଳାଳି ଭାବପ୍ରବଣ ହୋଇଥିଲେ। ଅଷ୍ଟ୍ରେଲିଆଠାରୁ ହାରିବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଡ୍ରେସିଂ ରୁମରେ ଭାରତୀୟ କ୍ରିକେଟରଙ୍କୁ ଭେଟିଥିଲେ। ଏହାର ଫଟୋ ଏବେ ସାମ୍ନାକୁ ଆସିଛି। ଏହି ସମୟରେ ସେ ଭାରତୀୟ ଖେଳାଳିଙ୍କୁ ଉତ୍ସାହିତ କରିଥିଲେ।
ଭାରତର ତାରକା ଅଲରାଉଣ୍ଡର ରବିନ୍ଦ୍ର ଜାଡେଜା ଡ୍ରେସିଂ ରୁମକୁ ଆସୁଥିବା ପ୍ରଧାନମନ୍ତ୍ରୀଙ୍କ ଫଟୋ ଶେୟାର କରିଛନ୍ତି। ସେ ଲେଖିଛନ୍ତି- ଆମର ଟୁର୍ନାମେଣ୍ଟ ବହୁତ ଭଲ ଥିଲା, କିନ୍ତୁ ଆମେ ଫାଇନାଲରେ ହାରିଗଲୁ। ଆମେ ସମସ୍ତେ ଦୁଃଖିତ, କିନ୍ତୁ ଆମ ଦେଶର ଲୋକଙ୍କ ସମର୍ଥନ ଆମକୁ ଆଗକୁ ବଢାଉଛି। ପ୍ରଧାନମନ୍ତ୍ରୀ ଡ୍ରେସିଂ ରୁମରେ ପହଞ୍ଚିଥିଲେ। ତାଙ୍କର ଏହି ଗସ୍ତ ବିଶେଷ ଏବଂ ଅତ୍ୟନ୍ତ ପ୍ରେରଣାଦାୟକ ଥିଲା।